ಸ್ಕೈ ಗ್ಯಾಂಗ್ನಲ್ಲಿ ಆಡುವ 11 ಆಟಗಾರರು ಇವರೇ…!
ಸದ್ಯ ಟೀಮ್ ಇಂಡಿಯಾದ ಟಿ-20 ತಂಡವನ್ನು ಆಯ್ಕೆ ಮಾಡೋದೇ ಆಯ್ಕೆ ಸಮಿತಿಗೆ ದೊಡ್ಡ ತಲೆನೋವು. ಕೊನೆಗೆ ಏನೇನೋ ಸರ್ಕಸ್ ಮಾಡಿ 15 ಸದಸ್ಯರ ತಂಡವನ್ನು ಪ್ರಕಟಿಸಿದ್ರೂ ಟೀಕೆ ಟಿಪ್ಪಣಿಗಳು ಮಾಮೂಲಿ. ಇದು ಇಷ್ಟಕ್ಕೆ ಮುಗಿಯಲ್ಲ. ಪಂದ್ಯ ಆರಂಭಕ್ಕೆ ಮುನ್ನ ಟೀಮ್ ಮ್ಯಾನೇಜ್ಮೆಂಟ್ಗೆ ಶುರುವಾಗುತ್ತೆ ಚಿಂತೆ. ಆಡುವ 11ರ ಬಳಗವನ್ನು ಆಯ್ಕೆ ಮಾಡುವ ಟೆನ್ಶನ್. ಯಾಕಂದ್ರೆ ಟೀಮ್ ಇಂಡಿಯಾದಲ್ಲಿ ಟಿ-20ಯ ಪಂಟರ್ ಆಟಗಾರರು ಕ್ಯೂನಲ್ಲಿ ನಿಂತಿದ್ದಾರೆ. ಇದಕ್ಕೆಲ್ಲ ಮುಖ್ಯ ಕಾರಣ ಐಪಿಎಲ್ ಎಂಬ ಹೈಫೈ ದೇಸಿ ಟೂರ್ನಿ.
ಹೌದು, ಐಪಿಎಲ್ ಬಿಸಿಸಿಐಗೆ ದುಡ್ಡಿನ ಗಣಿಯಾದ್ರೆ, ಭಾರತದ ಯುವ ಕ್ರಿಕೆಟಿಗರಿಗೆ ಮಹಾ ವೇದಿಕೆ. ಸಾಕಷ್ಟು ಯುವ ಕ್ರಿಕೆಟಿಗರು ಐಪಿಎಲ್ ಮೂಲಕವೇ ಬೆಳಕಿಗೆ ಬಂದಿದ್ದಾರೆ. ಇನ್ನು ಕೆಲವರು ದೇಸಿ ಟೂರ್ನಿಯಲ್ಲಿ ಗಮನ ಸೆಳೆದು ಟೀಮ್ ಇಂಡಿಯಾದ ಕದತಟ್ಟುತ್ತಿದ್ದಾರೆ. ಹೀಗಾಗಿ ತಂಡವನ್ನು ಆಯ್ಕೆ ಮಾಡೋದೇ ಆಯ್ಕೆ ಸಮಿತಿಗೆ ದೊಡ್ಡ ಸವಾಲು.
ಇದೀಗ ಟೀಮ್ ಇಂಡಿಯಾ ಮುಂದಿನ ಟಿ-20 ವಿಶ್ವಕಪ್ಗೆ ರೆಡಿಯಾಗುತ್ತಿದೆ. 2026 ಫೆಬ್ರವರಿಯಲ್ಲಿ ನಡೆಯುವ ಚುಟುಕು ವಿಶ್ವ ಸಮರಕ್ಕೆ ಅಳೆದು ತೂಗಿ ತಂಡವನ್ನು ಆಯ್ಕೆ ಮಾಡಬೇಕು. ವಿಶ್ವಕಪ್ಗೆ ಮುನ್ನ ಸ್ಕೈ ಗ್ಯಾಂಗ್ ಹತ್ತು ಟಿ-20 ಪಂದ್ಯಗಳನ್ನು ಆಡಲಿದೆ. ಇದರಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ದ ಐದು ಹಾಗೂ ಮುಂದಿನ ತಿಂಗಳು ನ್ಯೂಜಿಲೆಂಡ್ ವಿರುದ್ಧ ಐದು ಪಂದ್ಯಗಳನ್ನು ಆಡಲಿದೆ.
ಗಂಭೀರ್ಗೆ ಅಗ್ನಿಪರೀಕ್ಷೆ
ಹೀಗಾಗಿ ಟೀಮ್ ಇಂಡಿಯಾ ಹೊಸ ಪ್ರಯೋಗಗಳನ್ನು ನಡೆಸಬೇಕು. 15ರ ಬಳಗದ ಎಲ್ಲಾ ಆಟಗಾರರಿಗೂ ಅವಕಾಶ ನೀಡಬೇಕು. ಈ ಹಿಂದೆ ಇದೇ ರೀತಿಯ ಪ್ರಯೋಗವನ್ನು ರಾಹುಲ್ ದ್ರಾವಿಡ್ – ರೋಹಿತ್ ಶರ್ಮಾ ಕೂಡ ಮಾಡಿದ್ದರು. ಹಾಗೆ ಇದರಲ್ಲಿ ಯಶ ಕೂಡ ಸಾಧಿಸಿದ್ರು. 2024ರಲ್ಲಿ ಟಿ-20 ಚಾಂಪಿಯನ್ ಆಗಿದ್ದ ಟೀಮ್ ಇಂಡಿಯಾ ಇದೀಗ 2026ರ ವಿಶ್ವಕಪ್ ಮೇಲೆ ದೃಷ್ಟಿ ನೆಟ್ಟಿದೆ. ಇದು ಟೀಮ್ ಇಂಡಿಯಾಗೆ ಮಾತ್ರವಲ್ಲ ಹೆಡ್ ಕೋಚ್ ಗೌತಮ್ ಗಂಭೀರ್ಗೆ ಅಗ್ನಿಪರೀಕ್ಷೆ ಕೂಡ ಹೌದು. ಇಲ್ಲಿ ಸ್ವಾರ್ಥ, ಅಹಂ ಬಿಟ್ಟು ತಂಡದ ಹಿತಕ್ಕಾಗಿ ಬಲಿಷ್ಠ ತಂಡವನ್ನು ಆಯ್ಕೆ ಮಾಡೋ ದೊಡ್ಡ ಜವಾಬ್ದಾರಿ ಗಂಭೀರ್ ಮೇಲಿದೆ.
ಟೀಮ್ ಇಂಡಿಯಾ – ದಕ್ಷಿಣ ಆಫ್ರಿಕಾ ಅಂಕಿಅಂಶಗಳು
ಅಂದ ಹಾಗೇ ಇಂದು (ಡಿಸೆಂಬರ್ 9) ದಕ್ಷಿಣ ಆಫ್ರಿಕಾ ವಿರುದ್ದದ ಮೊದಲ ಟಿ-20 ಪಂದ್ಯ ಒಡಿಸ್ಸಾದ ಕಟಕ್ನಲ್ಲಿ ನಡೆಯಲಿದೆ. 2023ರಿಂದ ಟೀಮ್ ಇಂಡಿಯಾ 13 ಟಿ-20 ಸರಣಿಗಳಲ್ಲಿ 12 ಸರಣಿಗಳನ್ನು ಗೆದ್ದುಕೊಂಡಿದೆ. ಒಂದು ಸರಣಿ ಸಮಬಲಗೊಂಡಿದೆ. (ಇದರಲ್ಲಿ 2024ರ ಟಿ-20 ವಿಶ್ವಕಪ್ ಹಾಗೂ 2025ರ ಏಷ್ಯಾಕಪ್ ಸೇರಿಕೊಂಡಿದೆ) ಇನ್ನುಳಿದಂತೆ ಕಳೆದ ಟಿ-20 ವಿಶ್ವಕಪ್ ಬಳಿಕ ಆಡಿರುವ 30 ಪಂದ್ಯಗಳಲ್ಲಿ 26ರಲ್ಲಿ ಗೆಲುವಿನ ನಗೆ ಬೀರಿದೆ. ನಾಲ್ಕು ಪಂದ್ಯಗಳಲ್ಲಿ ಸೋತಿದೆ.
ಇನ್ನು ಇಂದಿನ ಪಂದ್ಯದ ಬಗ್ಗೆ ಹೇಳುವುದಾದ್ರೆ, ಅಂಕಿ ಅಂಶಗಳ ಪ್ರಕಾರ ದಕ್ಷಿಣ ಆಫ್ರಿಕಾ ತಂಡಕ್ಕಿಂತ ಟೀಮ್ ಇಂಡಿಯಾ ಮೇಲುಗೈ ಸಾಧಿಸಿದೆ. ಆಡಿರುವ 31 ಪಂದ್ಯಗಳಲ್ಲಿ 18ರಲ್ಲಿ ಟೀಮ್ ಇಂಡಿಯಾ ಗೆದ್ರೆ, 12 ಪಂದ್ಯಗಳಲ್ಲಿ ದಕ್ಷಿಣ ಆಫ್ರಿಕಾ ಗೆದ್ದಿದೆ. ಒಂದು ಪಂದ್ಯದ ಫಲಿತಾಂಶ ಬಂದಿಲ್ಲ. ಹಾಗೇ ಉಭಯ ತಂಡಗಳ ನಡುವೆ ಹತ್ತು ಟಿ-20 ಸರಣಿ ನಡೆದಿದ್ದು, ಭಾರತ ಐದು ಸರಣಿ ಗೆದ್ದಿದೆ. ದಕ್ಷಿಣ ಆಫ್ರಿಕಾ ಒಂದು ಬಾರಿ ತವರಿನಲ್ಲಿ ಮತ್ತು ಇನ್ನೊಂದು ಬಾರಿ ಭಾರತದಲ್ಲಿ ಒಟ್ಟು ಎರಡು ಸರಣಿಗಳನ್ನು ಗೆದ್ದುಕೊಂಡಿದೆ. ಮೂರು ಸರಣಿಗಳು ಸಮಬಲದಲ್ಲಿ ಅಂತ್ಯಗೊಂಡಿವೆ.
ಸ್ಕೈ ಗ್ಯಾಂಗ್ ಲೆಕ್ಕಾಚಾರ
ಇನ್ನು, ಸ್ಕೈ ಗ್ಯಾಂಗ್ನಲ್ಲಿ ಆಡುವ 11ರ ಬಳಗದ ಲೆಕ್ಕಾಚಾರ. ಆರಂಭಿಕನಾಗಿ ಅಭಿಷೇಕ್ ಶರ್ಮಾ ಕಣಕ್ಕಿಳಿಯುವುದು ಪಕ್ಕಾ. ಇದಕ್ಕೆ ಸದ್ಯಕ್ಕೆ ಯಾರ ಅಡ್ಡಿಯೂ ಇರಲ್ಲ. ಆದ್ರೆ ಅಭಿ ಜೊತೆ ಶುಭ್ಮನ್ ಗಿಲ್ ಮತ್ತು ಸಂಜು ಸ್ಯಾಮ್ಸನ್ ಕಣಕ್ಕಿಳಿಸುವುದರ ಬಗ್ಗೆ ಗೊಂದಲ ಇದೆ. ಇನ್ನುಳಿದಂತೆ ನಾಯಕ ಸೂರ್ಯ ಕುಮಾರ್ ಯಾದವ್, ತಿಲಕ್ ವರ್ಮಾ, ಹಾರ್ದಿಕ್ ಪಾಂಡ್ಯ, ಅಕ್ಷರ್ ಪಟೇಲ್ ಜಸ್ಪ್ರಿತ್ ಬೂಮ್ರಾ, ಕುಲದೀಪ್ ಆಯ್ಕೆಗೆ ಯಾವ ಪ್ರಶ್ನೆಗಳು ಬರಲ್ಲ. ವಿಕೆಟ್ ಕೀಪಿಂಗ್ನಲ್ಲಿ ಸಂಜು ಮತ್ತು ಜಿತೇಶ್ ಶರ್ಮಾ ನಡುವೆ ಪೈಪೋಟಿ ಇದೆ. ಹಾಗೇ ವಾಷಿಂಗ್ಟನ್ ಸುಂದರ್ ಮತ್ತು ಶಿವಂ ದುಬೆ ನಡುವೆಯು ಸ್ಪರ್ಧೆ ತೀವ್ರ ಸ್ಪರ್ಧೆ ಇದೆ. ಶಿವಂದುಬೆಗೆ ಲಕ್ಕಿ ಚಾರ್ಮ್ ಎಂಬ ಟ್ಯಾಗ್ ಲೈನ್ ಕೂಡ ಇದೆ. ಮತ್ತೊಂದೆಡೆ, ಗಂಭೀರ್ನ ನೀಲಿಗಣ್ಣಿನ ಹುಡುಗ ಹರ್ಷಿತ್ ರಾಣಾ ಮತ್ತು ಆರ್ಶಾದೀಪ್ ಪೈಕಿ ಯಾರು 11ರ ಬಳಗದಲ್ಲಿ ಕಾಣಿಸಿಕೊಳ್ತಾರೆ ಎಂಬ ಕುತೂಹಲವೂ ಇದೆ.
ಟೀಮ್ ಇಂಡಿಯಾದ 11ರ ಬಳಗ
ಅಭಿಷೇಕ್ ಶರ್ಮಾ, ಶುಭ್ಮನ್ ಗಿಲ್, ತಿಲಕ್ ವರ್ಮಾ, ಸೂರ್ಯಕುಮಾರ್ ಯಾದವ್, ಸಂಜು ಸ್ಯಾಮ್ಸನ್ (ವಿಕೆಟ್ ಕೀಪರ್) ಹಾರ್ದಿಕ್ ಪಾಂಡ್ಯ, ಶಿವಂ ದುಬೆ, ಅಕ್ಷರ್ ಪಟೇಲ್, ಕುಲದೀಪ್ ಯಾದವ್, ಆರ್ಶಾದೀಪ್, ಜಸ್ಪ್ರಿತ್ ಬೂಮ್ರಾ.
ಸನತ್ ರೈ
