ಐಪಿಎಲ್ 2020 ಡೆತ್ ಓವರ್ ಗಳಲ್ಲಿ ಬೌಲಿಂಗ್ ಮಾಡುವುದೇ ನನ್ನ ಗುರಿ – ಝಂಪಾ
#ಆಸ್ಟ್ರೇಲಿಯಾದ ಸ್ಪಿನ್ನರ್ ಆಡಂ ಝಂಪಾ ಅವರು ಈ ಬಾರಿಯ ಐಪಿಎಲ್ ನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡವನ್ನು ಪ್ರತಿನಿಧಿಸುತ್ತಿದ್ದಾರೆ. ಆಸ್ಟ್ರೇಲಿಯಾದ ಟ್ರಂಪ್ ಕಾರ್ಡ್ ಸ್ಪಿನ್ನರ್ ಝಂಪಾ ಅವರು ಐಪಿಎಲ್ ಟೂರ್ನಿಯಲ್ಲಿ ಆರ್ ಸಿಬಿ ಪರ ಶ್ರೇಷ್ಠ ಪ್ರದರ್ಶನವನ್ನು ನೀಡುವ ವಿಶ್ವಾಸವನ್ನು ವ್ಯಕ್ತಪಡಿಸಿದ್ದಾರೆ.
ಮುಖ್ಯವಾಗಿ ಆರ್ ಸಿಬಿ ಇನ್ನೊಬ್ಬ ಸ್ಪಿನ್ನರ್ ಯುಜುವೇಂದ್ರ ಚಾಹಲ್ ಜೊತೆ ಸೇರಿಕೊಂಡು ಬೌಲಿಂಗ್ ಮಾಡುವುದನ್ನು ಝಂಪಾ ಅವರು ಎದುರು ನೋಡುತ್ತಿದ್ದಾರೆ. ಡೆತ್ ಓವರ್ ಗಳಲ್ಲಿ ಬೌಲಿಂಗ್ ಮಾಡುವುದನ್ನು ನಾನು ತುಂಬಾನೇ ಇಷ್ಟಪಡುತ್ತೇನೆ. ಇದೊಂದು ರೀತಿಯ ಒತ್ತಡ ಹಾಗೂ ಸವಾಲು. ಇಂತಹ ಸವಾಲು ಹಾಗೂ ಒತ್ತಡಗಳನ್ನು ನಿಭಾಯಿಸಿಕೊಂಡು ಹೋಗುವಂತಹ ಸಾಮಥ್ರ್ಯ ಮತ್ತು ವಿಶ್ವಾಸ ನನ್ನಲ್ಲಿದೆ ಎಂದು ಝಂಪಾ ಆತ್ಮವಿಶ್ವಾಸದಿಂದಲೇ ಹೇಳಿಕೊಂಡಿದ್ದಾರೆ.
ಸದ್ಯ ಇಂಗ್ಲೆಂಡ್ ವಿರುದ್ಧ ನಡೆದ ಎರಡನೇ ಟಿ-ಟ್ವೆಂಟಿ ಪಂದ್ಯದಲ್ಲಿ ಕಡೆಯ ಓವರ್ ಗಳಲ್ಲಿ ಬೌಲಿಂಗ್ ಮಾಡುವ ಅವಕಾಶ ಸಿಗಲಿಲ್ಲ. ಇಂಗ್ಲೆಂಡ್ ಗೆ ಗೆಲ್ಲಲು 18 ರನ್ ಗಳು ಬೇಕಿದ್ದವು. ಆಗ ನಾನು ನಾಯಕ ಆರೋನ್ ಫಿಂಚ್ ಗೆ ಬೌಲಿಂಗ್ ಕೊಡುವಂತೆ ಕೇಳಿಕೊಂಡಿದ್ದೆ. ಆದ್ರೆ ಅದು ತಂಡದ ಯೋಜನೆಯಾಗಿರಲಿಲ್ಲ. ಹಾಗಂತ ನಾನು ನನ್ನ ಮನೋಭಾವನೆಯನ್ನು ಬದಲಾಯಿಸಿಕೊಂಡಿಲ್ಲ ಎಂದು ಝಂಪಾ ಹೇಳಿದ್ದಾರೆ.
ಇದೀಗ ಐಪಿಎಲ್ ನಲ್ಲಿ ಆರ್ ಸಿಬಿ ಪರ ಆಡುತ್ತಿದ್ದೇನೆ. ಚಾಹಲ್ ಜೊತೆ ಸೇರಿಕೊಂಡು ಡೆತ್ ಓವರ್ ಗಳಲ್ಲಿ ಬೌಲಿಂಗ್ ಮಾಡುವ ಅವಕಾಶ ಸಿಗಬಹುದು. ನನ್ನ ಸಾಮಥ್ರ್ಯವನ್ನು ಇನ್ನಷ್ಟು ಉತ್ತಮಗೊಳಿಸಲು ಐಪಿಎಲ್ ಕೂಡ ವೇದಿಕೆಯಾಗಲಿದೆ ಎಂದು ಝಂಪಾ ಅವರು ಅಭಿಪ್ರಾಯಪಟ್ಟಿದ್ದಾರೆ.
ಆದ್ರೆ ಝಂಪಾ ಅವರಿಗೆ ಇನ್ನೊಂದು ಸವಾಲಿದೆ. ಆರ್ ಸಿ ಬಿ ತಂಡದ 11ರ ಬಳಗದಲ್ಲಿ ಕಾಣಿಸಿಕೊಳ್ಳುವುದು ಮತ್ತೊಂದು ಸವಾಲಾಗಿದೆ. ಚಾಹಲ್ ಜೊತೆ ಭಾರತೀಯ ಸ್ಪಿನ್ನರ್ ಗಳಾದ ವಾಷಿಂಗ್ಟನ್ ಸುಂದರ್, ಪವನ್ ನೇಗಿ ಮತ್ತು ಇಂಗ್ಲೆಂಡ್ ನ ಆಲ್ ರೌಂಡರ್ ಮೋಯಿನ್ ಆಲಿ ಕೂಡ ಇರುವುದರಿಂದ ಝಂಪಾ ಅವರಿಗೆ 11ರ ಬಳಗದಲ್ಲಿ ಸ್ಥಾನ ಸಿಗುತ್ತಾ ಅನ್ನೋದನ್ನು ನೋಡಬೇಕಿದೆ.
