ಐಪಿಎಲ್ 2021- ಶಿಖರ್ ಧವನ್ ಜಬರ್ದಸ್ತ್ ಆಟಕ್ಕೆ ತಲೆಬಾಗಿದ ಪಂಜಾಬ್ ಕಿಂಗ್ಸ್…!
14ನೇ ಆವೃತ್ತಿಯ ಐಪಿಎಲ್ ಟೂರ್ನಿಯ 11 ನೇ ಪಂದ್ಯದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ಆರು ವಿಕೆಟ್ ಗಳಿಂದ ಪಂಜಾಬ್ ಕಿಂಗ್ಸ್ ತಂಡವನ್ನು ಪರಾಭವಗೊಳಿಸಿತ್ತು. ಈ ಮೂಲಕ ಡೆಲ್ಲಿ ಕ್ಯಾಪಿಟಲ್ಸ್ ಆಡಿರುವ ಮೂರು ಪಂದ್ಯಗಳಲ್ಲಿ ಎರಡನೇ ಗೆಲುವು ದಾಖಲಿಸಿದೆ.
ಮುಂಬೈ ನಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ಮೊದಲು ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡಿತ್ತು. ಆದ್ರೆ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಲೆಕ್ಕಾಚಾರಗಳನ್ನು ಪಂಜಾಬ್ ಕಿಂಗ್ಸ್ ತಂಡದ ಆರಂಭಿಕರು ತಲೆಕೆಳಗೆ ಮಾಡಿದ್ರು.
ಪಂಜಾಬ್ ಕಿಂಗ್ಸ್ ತಂಡದ ನಾಯಕ ಕೆ.ಎಲ್. ರಾಹುಲ್ ಆಕರ್ಷಕ 61 ರನ್ ದಾಖಲಿಸಿದ್ರೆ, ಮಯಾಂಕ್ ಅಗರ್ ವಾಲ್ ಮಿಂಚಿನ 69 ರನ್ ಸಿಡಿಸಿದ್ರು.
ಇನ್ನೊಂದೆಡೆ ಕ್ರಿಸ್ ಗೇಲ್ 11 ರನ್ ಹಾಗೂ ದೀಪಕ್ ಹೂಡ ಅಜೇಯ 22 ರನ್ ಹಾಗೂ ನಿಕೊಲಾಸ್ ಪೂರನ್ 9 ರನ್ ಗಳಿಸಿದ್ರೆ, ಶಾರೂಕ್ ಖಾನ್ ಅಜೇಯ 15 ರನ್ ದಾಖಲಿಸಿದ್ರು. ಪರಿಣಾಮ ಪಂಜಾಬ್ ಕಿಂಗ್ಸ್ 4 ವಿಕೆಟ್ ಕಳೆದುಕೊಂಡು 195 ರನ್ ಗಳಿಸಿತ್ತು.
ಗೆಲ್ಲಲು ಕಠಿಣ ಸವಾಲನ್ನು ಬೆನ್ನಟ್ಟಿದ್ದ ಡೆಲ್ಲಿ ತಂಡಕ್ಕೆ ಪೃಥ್ವಿ ಶಾ ಮತ್ತು ಶಿಖರ್ ಧವನ್ ಅಬ್ಬರ ಆರಂಭವನ್ನೇ ನೀಡಿದ್ರು.
ಅದ್ರಲ್ಲೂ ಪೃಥ್ವಿ ಶಾ 17 ಎಸೆತಗಳಲ್ಲಿ ಮೂರು ಬೌಂಡರಿ ಮತ್ತು ಎರಡು ಸಿಕ್ಸರ್ ಗಳ ಸಹಾಯದಿಂದ 32 ರನ್ ಗಳಿಸಿ ಪೆವಿಲಿಯನ್ ದಾರಿ ಹಿಡಿದ್ರು. ಇನ್ನೊಂದೆಡೆ, ಶಿಖರ್ ಧವನ್ ಪಂಜಾಬ್ ಕಿಂಗ್ಸ್ ಬೌಲರ್ ಗಳನ್ನು ಮನಬಂದಂತೆ ದಂಡಿಸಿದ್ರು.
ಈ ನಡುವೆ, ಸ್ಟೀವನ್ ಸ್ಮಿತ್ 9 ರನ್ ಗೆ ಸೀಮಿತವಾದ್ರೆ, ನಾಯಕ ರಿಷಬ್ ಪಂತ್ ಹೋರಾಟ 15 ರನ್ ಗೆ ಅಂತ್ಯಗೊಂಡಿತ್ತು. ಏತನ್ಮಧ್ಯೆ, ಶಿಖರ್ ಧವನ್ 49 ಎಸೆತಗಳಲ್ಲಿ 13 ಬೌಂಡರಿ ಮತ್ತು ಎರಡು ಸಿಕ್ಸರ್ ಗಳ ಸಹಾಯದಿಂದ 92 ರನ್ ದಾಖಲಿಸಿದ್ರು.
ಕೊನೆಯ ಕ್ಷಣದಲ್ಲಿ ಮಾರ್ಕಸ್ ಸ್ಟೋನಿಸ್ ಅಜೇಯ 27 ರನ್ ಗಳಿಸಿದ್ರೆ, ಲಲಿತ್ ಯಾದವ್ ಅಜೇಯ 12 ರನ್ ದಾಖಲಿಸಿ ತಂಡವನ್ನು ಗೆಲುವಿನ ದಡ ಸೇರಿಸಿದ್ರು. ಅಂತಿಮವಾಗಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡ 18.2 ಓವರ್ ಗಳಲ್ಲಿ 4 ವಿಕೆಟ್ ಗೆ 198 ರನ್ ಗಳಿಸಿ ಗೆಲುವಿನ ನಗೆ ಬೀರಿತ್ತು.
ಅಮೋಘ ಆಟವಾಡಿ ತಂಡದ ಗೆಲುವಿಗೆ ಕಾರಣರಾದ ಶಿಖರ್ ಧವನ್ ಅವರು ಪಂದ್ಯ ಶ್ರೇಷ್ಠ ಪ್ರಶಸ್ತಿ ಪಡೆದ್ರು.