ಐಪಿಎಲ್ 2ನೇ ಇನ್ನಿಂಗ್ಸ್ ಆರಂಭಕ್ಕೆ ಕ್ಷಣಗಣನೆ ಶುರುವಾಗಿದೆ. ಯುಎಇ ಆವೃತ್ತಿಯ ಮೊದಲ ಪಂದ್ಯ ದುಬೈ ಇಂಟರ್ ನ್ಯಾಷನಲ್ ಸ್ಟೇಡಿಯಂನಲ್ಲಿ ನಡೆಯಲಿದೆ. ಹಾಲಿ ಚಾಂಪಿಯನ್ ಮುಂಬೈ ಮತ್ತು ಮಾಜಿ ಚಾಂಪಿಯನ್ ಚೆನ್ನೈ ಸೂಪರ್ ಕಿಂಗ್ಸ್ ನಡುವೆ ಮೊದಲ ಮ್ಯಾಚ್ ನಡೆಯಲಿದೆ. ಹೀಗಾಗಿ ಗೆಲ್ಲೋದು ನೀಲಿನಾ, ಹಳದಿನಾ ಅನ್ನೋ ಕುತೂಹಲ ಹೆಚ್ಚಿದೆ.
ಎರಡೂ ತಂಡಗಳಿಗೂ ಇದು 8ನೇ ಪಂದ್ಯ. ಅಂಕಪಟ್ಟಿಯಲ್ಲಿ ಯೆಲ್ಲೋ ಬ್ರಿಗೇಡ್ 10 ಅಂಕ ಸಂಪಾದಿಸಿ ಉತ್ತಮ ರನ್ ರೇಟ್ನೊಂದಿಗೆ 2ನೇ ಸ್ಥಾನದಲ್ಲಿದೆ. ಬ್ಲೂ ಬಾಯ್ಸ್ ಮುಂಬೈ ಇಂಡಿಯನ್ಸ್ 7 ಪಂದ್ಯಗಳಿಂದ 8 ಅಂಕಗಳೊಂದಿಗೆ 4ನೇ ಸ್ಥಾನದಲ್ಲಿದೆ. ಚೆನ್ನೈ ಈ ಪಂದ್ಯ ಗೆದ್ದರೆ 12 ಅಂಕಗಳೊಂದಿಗೆ ಮೊದಲ ಸ್ಥಾನಕ್ಕೆ ಜಿಗಿಯಲಿದೆ. ಮುಂಬೈ ಈ ಪಂದ್ಯ ಗೆದ್ದರೆ 10 ಅಂಕಗಳೊಂದಿಗೆ 3ನೇ ಸ್ಥಾನಕ್ಕೆ ಏರಲಿದೆ.
ಟೀಮ್ ಕಾಂಬಿನೇಷನ್ ಕಡೆ ಗಮನ ಕೊಟ್ರೆ ನೀಲಿನಾ, ಹಳದಿನಾ ಅನ್ನೋ ಮಟ್ಟಕ್ಕಿದೆ. ಚೆನ್ನೈ ರುತುರಾಜ್ ಗಾಯಕ್ವಾಡ್ ಮತ್ತು ಮೊಯಿನ್ ಆಲಿ ಜೊತೆ ಆರಂಭ ಮಾಡುವ ಸಾಧ್ಯತೆ ಇದೆ. ಫಾಫ್ ಫಿಟ್ ಆಗಿದ್ದರೆ ಮೊಯಿನ್ ಕೆಳಕ್ರಮಾಂಕದಲ್ಲಿ ಆಡಬಹುದು. ಸುರೇಶ್ ರೈನಾ ಮತ್ತು ಅಂಬಟಿ ರಾಯುಡು ಟಾಪ್ ಆರ್ಡರ್ನ ರಾಕೆಟ್ ಗಳು. ಕ್ಯಾಪ್ಟನ್ ಎಂ.ಎಸ್.ಧೋನಿ ಮತ್ತು ರವೀಂದ್ರ ಜಡೇಜಾ ಸಿಕ್ಸರ್ ಹಬ್ಬಕ್ಕೆ ಚಾಲನೆ ನೀಡುವ ತಯಾರಿಯಲ್ಲಿದ್ದಾರೆ. ಡ್ವೈನ್ ಬ್ರಾವೋ ಕೆರಿಬಿಯನ್ ಪ್ರೀಮಿಯರ್ ಲೀಗ್ ನಲ್ಲಿ ತೋರಿದ ಪ್ರದರ್ಶನವನ್ನು ಇಲ್ಲೂ ಮುಂದುವರೆಸಿದ್ರೂ ಚೆನ್ನೈ ಆರಾಮವಾಗಿರಬಹುದು. ಸ್ಯಾಮ್ ಕರ್ರನ್ ಎಲ್ಲಿಬೇಕೋ ಅಲ್ಲಿ ಬ್ಯಾಟಿಂಗ್ ಮಾಡಬಹುದು. ಶಾರ್ದೂಲ್ ಠಾಕೂರ್ ಮತ್ತು ದೀಪಕ್ ಚಹರ್ ಕೂಡ ಸಿಕ್ಸರ್, ಬೌಂಡರಿ ಸಿಡಿಸುವ ಸಾಮರ್ಥ್ಯ ಹೊಂದಿದ್ದಾರೆ. ಲುಂಗಿ ಎನ್ ಗಿಡಿ ಒಬ್ರೇ ಬ್ಯಾಟಿಂಗ್ ನಲ್ಲಿ ಹೆಸರು ಮಾಡಿಲ್ಲ. ಚೆನ್ನೈ ಬೌಲಿಂಗ್ ಕಾಂಬಿನೇಷನ್ ಕೂಡ ಸಖರ್ ಇದೆ. ಲುಂಗಿ, ಶಾರ್ದೂಲ್ ದೀಪಕ್ ಮತ್ತು ಸ್ಯಾಮ್ ಕರ್ರನ್ ವೇಗದ ಸಾರಥಿಗಳು. ಡ್ವೈನ್ ಬ್ರಾವೋ ಸ್ಲೋವರ್ ಮ್ಯಾಜಿಕ್ ದುಬೈನಲ್ಲಿ ತುಂಬಾ ಪ್ರಮುಖವಾಗಿರುತ್ತದೆ. ಜಡೇಜಾ ಮತ್ತು ಮೊಯಿನ್ ಆಲಿಯ ಸ್ಪಿನ್ ಮ್ಯಾಜಿಕ್ ಬಗ್ಗೆಯೂ ಸಖತ್ ನಂಬಿಕೆ ಇದೆ.
ಮುಂಬೈ ಇಂಡಿಯನ್ಸ್ ಕೂಡ ಸಾಮಾನ್ಯ ತಂಡವಲ್ಲ. ರೋಹಿತ್, ಕ್ವಿಂಟಾನ್ ಡಿ ಕಾಕ್, ಇಶಾನ್ ಕಿಶಾನ್, ಸೂರ್ಯ ಕುಮಾರ್ ಯಾದವ್ ಮತ್ತು ಸೌರಭ್ ತಿವಾರಿ ಬ್ಯಾಟಿಂಗ್ ಟ್ರಂಪ್ ಕಾರ್ಡ್ ಗಳು. ಕೈರಾನ್ ಪೊಲ್ಲಾರ್ಡ್, ಹಾರ್ಧಿಕ್ ಪಾಂಡ್ಯ ಮತ್ತು ಕ್ರುನಾಲ್ ಪಾಂಡ್ಯ ಬೌಂಡರಿ, ಸಿಕ್ಸರ್ ಗಳಿಗೆ ಫೇಮಸ್. ಇವರ ಜೊತೆಗೆ ಜೇಮ್ಸ್ ನಿಶಾಮ್ ಬಲವೂ ಇದೆ.ರಾಹಲ್ ಚಹರ್, ಜಸ್ಪ್ರೀತ್ ಬುಮ್ರಾ ಮತ್ತು ಟ್ರೆಂಟ್ ಬೋಲ್ಡ್ ಎಲ್ಲಾ ಪಿಚ್ ಗಳಲ್ಲೂ ಬ್ಯಾಟ್ಸ್ ಮನ್ಗಳಿಗೆ ಸವಾಲೊಡ್ಡುವುದು ಖಚಿತ.
ದುಬೈ ಇಂಟರ್ ನ್ಯಾಷನಲ್ ಸ್ಟೇಡಿಯಂ ಪಿಚ್ ಸ್ಪಿನ್ ಫ್ರೆಂಡ್ಲಿ ಆಗಿದ್ದರೂ ಮೊದಲ ಪಂದ್ಯವಾಗಿರುವುದರಿಂದ ದೊಡ್ಡ ತಿರುವು ಸಿಗುವುದು ಸಂಶಯ. ಹೀಗಾಗಿ ಬೌಲಿಂಗ್ ವೇರಿಯೇಷನ್ ಹೊಂದಿರುವ ಬೌಲರ್ ಗಳು ಟ್ರಂಪ್ ಕಾರ್ಡ್ ಆಗುವ ಸಾಧ್ಯತೆ ಹೆಚ್ಚಿದೆ. ಒಟ್ಟಿನಲ್ಲಿ ಐಪಿಎಲ್ ಧಮಾಕಾ ಆರಂಭವಾಗುತ್ತಿರುವುದು ಕ್ರಿಕೆಟ್ ಅಭಿಮಾನಿಗಳನ್ನು ಹುಚ್ಚೆದ್ದು ಕುಣಿಯುವಂತೆ ಮಾಡಿದೆ.
