Jos Buttler : ವಾರ್ನ್ ನಮ್ಮ ಆಟವನ್ನ ನೋಡುತ್ತಿರುತ್ತಾರೆ.. ಬಟ್ಲರ್ ಭಾವುಕ
ಈ ಋತುವಿನಲ್ಲಿ ಯಾವುದೇ ನಿರೀಕ್ಷೆ ಇಲ್ಲದೆ ಕಣಕ್ಕೆ ಇಳಿದೆ. ಆದರೆ, ಮಾಲೀಕತ್ವ ಮತ್ತು ಸಹ ಆಟಗಾರರ ಪ್ರೋತ್ಸಾಹದಿಂದ ನಾನು ಇಲ್ಲಿಗೆ ಬಂದಿದ್ದೇನೆ. ಸಾಮೂಹಿಕ ಪ್ರಯತ್ನದಿಂದ ಫೈನಲ್ ಪ್ರವೇಶಿಸಿದ್ದೇವೆ.
ಕುಮಾರ ಸಂಗಕ್ಕಾರ ಮತ್ತು ಟ್ರೆವರ್ ಪೆನ್ನಿ ಅವರೊಂದಿಗಿನ ಸಂಭಾಷಣೆಯನ್ನು ಎಂದಿಗೂ ಮರೆಯಲಾಗುವುದಿಲ್ಲ ಎಂದು ಕ್ವಾಲಿಫೈಯರ್-2 ಹೀರೋ, ರಾಜಸ್ಥಾನ ರಾಯಲ್ಸ್ ಆಟಗಾರ ಜೋಸ್ ಬಟ್ಲರ್ ಹೇಳಿದ್ದಾರೆ.
ಕ್ವಾಲಿಫೈಯರ್-2ರಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ವಿರುದ್ಧದ ಪಂದ್ಯದಲ್ಲಿ ಬಟ್ಲರ್, 60 ಎಸೆತಗಳಲ್ಲಿ 10 ಬೌಂಡರಿ ಮತ್ತು 6 ಸಿಕ್ಸರ್ಗಳ ನೆರವಿನಿಂದ ಅಜೇಯ 106 ರನ್ ಗಳಿಸಿ ರಾಜಸ್ಥಾನವನ್ನು ಫೈನಲ್ಗೆ ತಲುಪಿಸಿದರು.
ಪಂದ್ಯ ಶ್ರೇಷ್ಠ ಪ್ರಶಸ್ತಿ ಪಡೆದ ಬಳಿಕ ಮಾತನಾಡಿದ ಅವರು, ಆರ್ ಸಿಬಿ ವಿರುದ್ಧದ ಪಂದ್ಯದಲ್ಲಿ ಬ್ಯಾಟಿಂಗ್ ಎಂಜಾಯ್ ಮಾಡಿದ್ದೇನೆ.
ಸಾವಿರಾರು ಪ್ರೇಕ್ಷಕರ ನಡುವೆ, ಅಭಿಮಾನಿಗಳ ಬೆಂಬಲದ ಮಧ್ಯೆ ಇಂತಹ ಇನಿಂಗ್ಸ್ ಆಡಿದ ತೃಪ್ತಿ ಇದೆ ಎಂದು ಸಂತಸ ವ್ಯಕ್ತಪಡಿಸಿದರು.
ಈ ಸಂದರ್ಭದಲ್ಲಿ ರಾಜಸ್ಥಾನಕ್ಕೆ ಐಪಿಎಲ್ ಪ್ರಶಸ್ತಿ ಗೆಲ್ಲಿಸಿಕೊಟ್ಟ ಆಸ್ಟ್ರೇಲಿಯಾದ ದಿಗ್ಗಜ ಶೇನ್ ವಾರ್ನ್ ಅವರನ್ನು ಬಟ್ಲರ್ ಸ್ಮರಿಸಿದರು.
“ರಾಜಸ್ಥಾನ್ ರಾಯಲ್ಸ್ ಮೇಲೆ ಪ್ರಭಾವ ಬೀರಿದ ವ್ಯಕ್ತಿ ಶೇನ್ ವಾರ್ನ್. ಮೊದಲ ಋತುವಿನಲ್ಲಿ ಅವರು ಕಪ್ ಗೆದ್ದುಕೊಟ್ಟರು.
ನಾವು ಅವನನ್ನು ತುಂಬಾ ಮಿಸ್ ಮಾಡಿಕೊಳ್ಳುತ್ತೇವೆ. ಅವರು ನಮ್ಮ ಯಶಸ್ಸನ್ನು ಮೇಲಿನಿಂದ ನೋಡುತ್ತಲೇ ಇರುತ್ತಾರೆ.
ಇಂದು ನಮ್ಮ ಆಟದ ಶೈಲಿಯ ಬಗ್ಗೆ ನಮಗೆ ತುಂಬಾ ಹೆಮ್ಮೆ ಇದೆ ಎಂದಿದ್ದಾರೆ ಬಟ್ಲರ್.
