ರಾಮನಗರ: ನೈಸ್ ಯೋಜನೆ ವಿಚಾರವಾಗಿ ಡಿ ಕೆ ಶಿವಕುಮಾರ್ ವಿರುದ್ಧ ಸಮರ ಸಾರಿರುವ ಹೆಚ್ ಡಿ ಕುಮಾರಸ್ವಾಮಿ ಅವರಿಗೆ ಸಚಿವ ಹೆಚ್ ಸಿ ಬಾಲಕೃಷ್ಣ ಅತ್ಯಂತ ಕಟುವಾದ ಪದಗಳಲ್ಲಿ ತಿರುಗೇಟು ನೀಡಿದ್ದಾರೆ. ಕುಮಾರಸ್ವಾಮಿ ಅವರನ್ನು ಹಫ್ತಾ ವಸೂಲಿ ಗಿರಾಕಿ ಎಂದು ಕರೆದಿರುವ ಬಾಲಕೃಷ್ಣ, ಹೆಚ್ ಡಿಕೆ ಅವರ ಅಕ್ರಮಗಳ ಕೆಜಿಎಫ್-2 ಮತ್ತು ಕೆಜಿಎಫ್-3 ಮಟ್ಟದ ದಾಖಲೆಗಳು ನಮ್ಮ ಬಳಿಯಿವೆ, ಸಮಯ ಬಂದಾಗ ಅವುಗಳನ್ನು ಬಿಡುಗಡೆ ಮಾಡುತ್ತೇವೆ ಎಂದು ಎಚ್ಚರಿಸಿದ್ದಾರೆ.
ಕುಮಾರಸ್ವಾಮಿ ಅವರು 3B ಗಳಿಗೆ ಫೇಮಸ್ ಬ್ಲ್ಯಾಕ್ ಮೇಲ್ ಮಂತ್ರಗಾರ
Related posts
ಕುಮಾರಸ್ವಾಮಿ ಅವರ ರಾಜಕೀಯ ಚರಿತ್ರೆಯನ್ನು ಕೆದಕಿದ ಬಾಲಕೃಷ್ಣ, ಹೆಚ್ ಡಿಕೆ ಎಂದರೆ 3B ಗೆ ಅಂದರೆ ಬ್ಲ್ಯಾಕ್ ಮೇಲಿಂಗ್, ಬ್ಯಾಕ್ ಸ್ಟ್ಯಾಬಿಂಗ್ ಚೂರಿ ಮತ್ತು ಬ್ಲ್ಯಾಕ್ ಮ್ಯಾಜಿಕ್ ಮಾಡುವುದಕ್ಕೆ ಸಿದ್ಧಹಸ್ತರು ಎಂದು ಲೇವಡಿ ಮಾಡಿದರು. ಹಿಂದೆ ಧರ್ಮಸಿಂಗ್ ಮತ್ತು ಯಡಿಯೂರಪ್ಪ ಅವರಿಗೆ ಬೆನ್ನಿಗೆ ಚೂರಿ ಹಾಕಿದ್ದೇ ಕುಮಾರಸ್ವಾಮಿ ಅವರ ಸಾಧನೆ. ಪ್ರತಿದಿನ ಯಾರನ್ನಾದರೂ ಬ್ಲ್ಯಾಕ್ ಮೇಲ್ ಮಾಡುವುದೇ ಅವರ ಕಾಯಕವಾಗಿದೆ. ಕೆಲಸವಿಲ್ಲದ ಕುಂಬಾರ ಏನು ಮಾಡಿದ ಎನ್ನುವ ಗಾದೆಯಂತೆ ಕುಮಾರಸ್ವಾಮಿ ಈಗ ಕೆಲಸವಿಲ್ಲದೆ ಏನೇನೋ ಮಾತನಾಡುತ್ತಿದ್ದಾರೆ ಎಂದು ವ್ಯಂಗ್ಯವಾಡಿದರು.
ಡಿಕೆಶಿ ಪ್ರಬಲರಾಗುತ್ತಿರುವುದಕ್ಕೆ ಕುಮಾರಸ್ವಾಮಿಗೆ ನಿದ್ದೆಯಿಲ್ಲ
ಉಪಮುಖ್ಯಮಂತ್ರಿ ಡಿ ಕೆ ಶಿವಕುಮಾರ್ ಅವರ ರಾಜಕೀಯ ಬೆಳವಣಿಗೆಯನ್ನು ಕುಮಾರಸ್ವಾಮಿ ಅವರಿಗೆ ಅರಗಿಸಿಕೊಳ್ಳಲು ಸಾಧ್ಯವಾಗುತ್ತಿಲ್ಲ. ಇದೇ ಕಾರಣಕ್ಕೆ ಅವರಿಗೆ ರಾತ್ರಿ ನಿದ್ರೆಯೂ ಬರುತ್ತಿಲ್ಲ ಎಂದು ಬಾಲಕೃಷ್ಣ ಕಿಡಿಕಾರಿದರು. ಸಿದ್ದರಾಮಯ್ಯ ಮತ್ತು ಡಿ ಕೆ ಶಿವಕುಮಾರ್ ಸರ್ಕಾರದ ಬಗ್ಗೆ ಸುಳ್ಳು ದಾಖಲೆಗಳನ್ನು ಸೃಷ್ಟಿಸಿ ಗೊಂದಲ ಮೂಡಿಸುತ್ತಿದ್ದಾರೆ. ಮೊದಲು ಕುಮಾರಸ್ವಾಮಿ ಅವರು ತಮ್ಮ ಆರೋಗ್ಯದ ಕಡೆ ಗಮನ ಕೊಡಲಿ, ಸರಿಯಾಗಿ ನಿದ್ರೆ ಮಾಡಲಿ. ಒಂದು ವೇಳೆ ಅವರ ಆರೋಗ್ಯ ಕೈಕೊಟ್ಟರೆ ಅದಕ್ಕೂ ಡಿ ಕೆ ಶಿವಕುಮಾರ್ ಅವರೇ ಕಾರಣ ಎಂದು ಹೇಳಿದರೂ ಅಚ್ಚರಿಯಿಲ್ಲ ಎಂದು ಅವರು ಕುಟುಕಿದರು.
ಸೂಟ್ ಕೇಸ್ ತಲುಪಿದ ತಕ್ಷಣ ಮಾತು ಬದಲಿಸುವುದು ಇವರ ಚಾಳಿ
ಕುಮಾರಸ್ವಾಮಿ ಅವರ ಹಳೆಯ ಆಡಳಿತವನ್ನೂ ಪ್ರಶ್ನಿಸಿದ ಬಾಲಕೃಷ್ಣ, ರಾತ್ರಿ ಸೂಟ್ ಕೇಸ್ ತಲುಪಿದ ತಕ್ಷಣ ಹೇಳಿಕೆ ಬದಲಿಸುವುದು ಕುಮಾರಸ್ವಾಮಿ ಅವರ ಹಳೆಯ ಚಾಳಿ. ಎರಡು ಬಾರಿ ಸಿಎಂ ಆಗಿದ್ದಾಗ ಅವರು ಏನು ಮಾಡಿದ್ದಾರೆ ಎಂಬುದು ರಾಜ್ಯಕ್ಕೆ ಗೊತ್ತು. ಕುಮಾರಸ್ವಾಮಿ ಮುಖ್ಯಮಂತ್ರಿಯಾಗಿದ್ದಾಗ ಅವರ ಸಹೋದರ ಬಾಲಕೃಷ್ಣ ಗೌಡ ಅವರ ಆಸ್ತಿ ಒಂದೇ ವರ್ಷದಲ್ಲಿ 1,000 ಕೋಟಿಗೆ ಜಿಗಿದಿದ್ದು ಹೇಗೆ? ಈ ಬಗ್ಗೆ ಮೊದಲು ತನಿಖೆಯಾಗಲಿ ಎಂದು ಸವಾಲು ಹಾಕಿದರು. ಚನ್ನಮ್ಮ ಅವರಿಗೆ ಐಟಿ ನೋಟಿಸ್ ಬಂದ ತಕ್ಷಣ ಪ್ರಧಾನಿ ಮೋದಿ ಮತ್ತು ಅಮಿತ್ ಶಾ ಕಾಲಿಗೆ ಬಿದ್ದು ಮೈತ್ರಿ ಮಾಡಿಕೊಂಡ ಬ್ಲ್ಯಾಕ್ ಮೇಲರ್ ಕುಮಾರಸ್ವಾಮಿ ಎಂದು ಅವರು ಆಕ್ರೋಶ ಹೊರಹಾಕಿದ್ದಾರೆ.
ರೈತರಿಗೆ ಪರಿಹಾರ ಕೊಡಿಸಿ ನಿಮ್ಮ ಮೈತ್ರಿ ಶಕ್ತಿ ತೋರಿಸಿ
ಕೇಂದ್ರ ಸಚಿವರಾಗಿರುವ ಕುಮಾರಸ್ವಾಮಿ ಅವರು ಮೊದಲು ರಾಜ್ಯದ ರೈತರಿಗೆ ಎಕರೆಗೆ 50 ಸಾವಿರ ರೂಪಾಯಿ ಬರ ಪರಿಹಾರ ಕೊಡಿಸಲಿ. ಕೇಂದ್ರದಲ್ಲಿ ಮಂತ್ರಿಯಾಗಿ ರಾಜ್ಯಕ್ಕೆ ಏನು ತಂದಿದ್ದೀರಿ ಎಂಬುದನ್ನು ತೋರಿಸಿ. ಬರಿ ಸುಳ್ಳು ದಾಖಲೆಗಳ ಮೂಲಕ ಬ್ಲ್ಯಾಕ್ ಮೇಲ್ ಮಾಡುವುದನ್ನು ಬಿಟ್ಟು ಜನೋಪಕಾರಿ ಕೆಲಸ ಮಾಡಿ ಎಂದು ಬಾಲಕೃಷ್ಣ ಚಾಟಿ ಬೀಸಿದ್ದಾರೆ. ಈ ಹಿಂದೆ ತಮ್ಮ ಫ್ರೆಂಡ್ ಆಗಿದ್ದ ಕುಮಾರಸ್ವಾಮಿ ಬಗ್ಗೆ ಈಗ ಪ್ರಾಯಶ್ಚಿತ ಮಾಡಿಕೊಳ್ಳುತ್ತಿದ್ದೇನೆ ಎಂದು ಹೇಳುವ ಮೂಲಕ ತಮ್ಮ ನಡುವಿನ ಸ್ನೇಹಕ್ಕೆ ಎಳ್ಳುನೀರು ಬಿಟ್ಟರು.
