ಕೊನೆಯ ಓವರ್ ನಲ್ಲಿ ಧೋನಿ ದರ್ಬಾರ್..!!
ಡಿ ವೈ ಪಾಟೀಲ್ ಮೈದಾನದಲ್ಲಿ ನಡೆದ ಚೆನ್ನೈ ಸೂಪರ್ ಕಿಂಗ್ಸ್ ಮತ್ತು ಮುಂಬೈ ಇಂಡಿಯನ್ಸ್ ತಂಡದ ನಡುವಿನ ಪಂದ್ಯದಲ್ಲಿ ಚೆನ್ನೈ ತಂಡ ಗೆಲುವು ಸಾಧಿಸಿದೆ.
ಚೆನ್ನೈ ಪಂದ್ಯ ಗೆಲ್ಲಲು ಕೊನೆಯ ಓವರ್ ನಲ್ಲಿ 17 ರನ್ ಗಳ ಅಗತ್ಯವಿತ್ತು. ಮುಂಬೈ ತಂಡದ ಆಟಗಾರರ ಗೆಲುವು ತಮ್ಮದೇ ಅಂದುಕೊಂಡಿದ್ದರು.
ಆದ್ರೆ ಕ್ರಿಕೆಟ್ ಬಾಹುಬಲಿ ಎಂ.ಎಸ್. ಧೋನಿ ಮುಂಬೈ ಗೆಲುವಿನ ಕನಸಿಗೆ ತಣ್ಣೀರೆರಚಿದರು.
ಕೊನೆಯ ಓವರ್ ನಲ್ಲಿ ಧೋನಿ, 1 ಸಿಕ್ಸ್ ಹಾಗೂ 2 ಬೌಂಡರಿ ಸಹಿತ 16 ರನ್ ಸಿಡಿಸಿ ತಂಡಕ್ಕೆ ರೋಚಕ ಗೆಲುವು ತಂದುಕೊಡುವ ಮೂಲಕ ಗೆಲುವಿನ ಹೀರೋ ಆದರು.
ಇದರೊಂದಿಗೆ ಚೆನ್ನೈ ತಂಡ 3 ವಿಕೆಟ್ಗಳ ರೋಚಕ ಗೆಲುವು ಸಾಧಿಸಿತು.
ಟಾಸ್ ಸೋತು ಮೊದಲು ಬ್ಯಾಟಿಂಗ್ ಅವಕಾಶ ಪಡೆದ ಮುಂಬೈ, ಮಧ್ಯಮ ಕ್ರಮಾಂಕದ ಬ್ಯಾಟ್ಸ್ಮನ್ಗಳ ಜವಾಬ್ದಾರಿಯುತ ಆಟದಿಂದ 20 ಓವರ್ಗಳಲ್ಲಿ 7 ವಿಕೆಟ್ಗೆ 155 ರನ್ಗಳ ಪೈಪೋಟಿಯ ಮೊತ್ತ ಕಲೆಹಾಕಿತು.
ಮುಂಬೈ ಪರ ರೋಹಿತ್ ಶರ್ಮ(0), ಇಶಾನ್ ಕಿಶನ್(0) ಶೂನ್ಯಕ್ಕೆ ಔಟ್ ಆದರು. ಬೇಬಿ ಎಬಿಡಿ ಡೆವಾಲ್ಡ್ ಬ್ರೆವಿಸ್ 4 ರನ್ ಗಳಿಗೆ ಹೋರಾಟ ನಿಲ್ಲಿಸಿದ್ರು.
ಸಂಕಷ್ಟದ ಸ್ಥಿತಿಯಲ್ಲಿ ಮುಂಬೈ ತಂಡಕ್ಕೆ ಸೂರ್ಯಕುಮಾರ್ ಯಾದವ್ ನೆರವಾದ್ರು. ಸೂರ್ಯ 21 ಎಸೆತಗಳಲ್ಲಿ 3 ಬೌಂಡರಿ, 1 ಸಿಕ್ಸರ್ ನೆರವಿನಿಂದ 32 ರನ್ ಗಳಿಸಿದರು.
ಇತ್ತ ತಾಳ್ಮೆಯ ಆಟವಾಡಿದ ತಿಲಕ್ ವರ್ಮ 43 ಎಸೆತಗಳಲ್ಲಿ ಮೂರು ಬೌಂಡರಿ, 2 ಸಿಕ್ಸರ್ ನೆರವಿನಿಂದ 51 ರನ್ ಗಳಿಸಿದರು.
ಉಳಿದಂತೆ ಕಿರಾನ್ ಪೊಲಾರ್ಡ್ 12 ರನ್, ಡೆನಿಯಲ್ ಸ್ಯಾಮ್ಸ್ 5 ರನ್, ಜಯದೇವ್ ಉನಾದ್ಕಟ್ 19 ರನ್ ಗಳಿಸಿದರು.
ಈ ಸವಾಲು ಬೆನ್ನತ್ತಿದ ಚೆನ್ನೈ ಸೂಪರ್ ಕಿಂಗ್ಸ್, 20 ಓವರ್ಗಳಲ್ಲಿ 7 ವಿಕೆಟ್ಗೆ 156 ರನ್ಗಳಿಸಿ ಗೆಲುವಿನ ದಡಸೇರಿತು.
ಈ ಗೆಲುವಿನೊಂದಿಗೆ ಸಿಎಸ್ಕೆ, 2022ರ ಐಪಿಎಲ್ನಲ್ಲಿ 2ನೇ ಗೆಲುವು ಸಾಧಿಸಿತು.
ಟಾರ್ಗೆಟ್ ಬೆನ್ನತ್ತಿದ ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಪರ ಋತುರಾಜ್ ಗಾಯಕ್ವಾಡ್ ಶೂನ್ಯಕ್ಕೆ ಔಟ್ ಆದರು.
ಮಿಚೆನ್ ಸ್ಯಾಂಟ್ನರ್ 11 ರನ್ ಸಿಡಿಸಿ ಬಹುಬೇಗನೆ ವಿಕೆಟ್ ಒಪ್ಪಿಸಿದರು.
ಆದರೆ 3ನೇ ವಿಕೆಟ್ಗೆ ಜೊತೆಯಾದ ರಾಬಿನ್ ಉತ್ತಪ್ಪ, ಅಂಬಟಿ ರಾಯುಡು ಉತ್ತಮ ಜೊತೆಯಾಟವಾಡಿದರು.
ಉತ್ತಪ್ಪ 30 ರನ್ ಸಿಡಿಸಿ ಔಟ್ ಆದ್ರೆ ರಾಯುಡು 40 ರನ್ ಗಳಿಸಿದರು.
ಜವಾಬ್ದಾರಿಯ ಆಟವಾಡಿದ ಈ ಜೋಡಿ 3ನೇ ವಿಕೆಟ್ಗೆ 50 ರನ್ಗಳಿಸಿ ತಂಡದ ಗೆಲುವಿನ ಹಾದಿಯನ್ನು ಸುಗಮಗೊಳಿಸಿದರು.
ಆದರೆ ಮಧ್ಯಮ ಕ್ರಮಾಂಕದಲ್ಲಿ ಬಂದ ಶಿವಂ ದುಬೆ 13 ರನ್ ಹಾಗೂ ನಾಯಕ ರವೀಂದ್ರ ಜಡೇಜಾ ತಂಡಕ್ಕೆ ನೆರವಾಗಲಿಲ್ಲ.
ನಿರ್ಣಾಯಕ ಹಂತದಲ್ಲಿ ಪ್ರಮುಖ ವಿಕೆಟ್ ಕಳೆದುಕೊಂಡಿದ್ದ ಸಿಎಸ್ಕೆ, ಸೋಲಿನ ಸುಳಿಗೆ ಸಿಲುಕಿತು.
ಈ ಹಂತದಲ್ಲಿ ಜೊತೆಯಾದ ಎಂ.ಎಸ್. ಧೋನಿ – ಪ್ರಿಟೋರಿಯಸ್ ತಂಡವನ್ನ ಗೆಲುವಿನತ್ತ ಮುನ್ನೆಡಿಸಿದರು.
ದೋನಿ 13 ಎಸೆತಗಳಲ್ಲಿ ಮೂರು ಬೌಂಡರಿ 1 ಸಿಕ್ಸರ್ ನೆರವಿನಿಂದ 28 ರನ್, ಪ್ರಿಟೋರಿಯಸ್ 14 ಎಸೆತಗಳಲ್ಲಿ 2 ಬೌಂಡರಿ, 1 ಸಿಕ್ಸರ್ ನೆರವನಿಂದ 22 ರನ್ಗಳಿಸಿದರು.
MI vs CSK Highlights IPL 2022 Finisher MS Dhoni