ನವದೆಹಲಿ: ಮಾಜಿ ರೈಲ್ವೆ ಸಚಿವ ಲಾಲು ಪ್ರಸಾದ್ ಯಾದವ್ ವಿರುದ್ಧದ ‘ಉದ್ಯೋಗಕ್ಕಾಗಿ ಭೂಮಿ ಪಡೆದ ಹಗರಣದಲ್ಲಿ ಇಡಿ ತನಿಖೆಗೆ ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರು ಅಧಿಕೃತ ಅನುಮೋದನೆ ನೀಡಿದ್ದಾರೆ.
ಈ ಪ್ರಕರಣವು 2004ರಿಂದ 2009ರ ನಡುವೆ ಲಾಲು ಪ್ರಸಾದ್ ಅವರು ಕೇಂದ್ರ ರೈಲ್ವೆ ಸಚಿವರಾಗಿದ್ದ ಕಾಲಕ್ಕೆ ಸಂಬಂಧಿಸಿದೆ. ಈ ಅವಧಿಯಲ್ಲಿ ಕೆಲವರು ಗ್ರೂಪ್-ಡಿ ಹುದ್ದೆಗಳನ್ನು ಪಡೆಯಲು ಲಂಚವಾಗಿ ತಮ್ಮ ಸ್ವಂತ ಭೂಮಿಯನ್ನು ಲಾಲು ಅವರ ಕುಟುಂಬದವರಿಗೆ ನೀಡಿದ್ದರೆಂದು ಆರೋಪಿಸಲಾಗಿದೆ.
2022ರಲ್ಲೇ ಆರಂಭವಾದ ತನಿಖೆ
ಈ ಪ್ರಕರಣ ಸಂಬಂಧ 2022ರಲ್ಲೇ ED ತನಿಖೆ ಪ್ರಾರಂಭಿಸಿತ್ತು. ಲಾಲು ಪ್ರಸಾದ್ ಯಾದವ್, ಅವರ ಪತ್ನಿ ರಾಬ್ರಿ ದೇವಿ, ಪುತ್ರರು ತೇಜಸ್ವಿ ಯಾದವ್ ಮತ್ತು ಇತರರು ಈ ಹಗರಣದಲ್ಲಿ ಭಾಗಿಯಾಗಿದ್ದಾರೆ ಎಂದು ಆರೋಪಿಸಲಾಗಿದೆ. ಆದರೆ, ಈ ತನಿಖೆ ಮುಂದುವರಿಯಲು ಕೇಂದ್ರ ಸರ್ಕಾರದಿಂದ ಅನುಮೋದನೆ ಅಗತ್ಯವಾಗಿತ್ತು. ಈಗ ರಾಷ್ಟ್ರಪತಿಗಳಿಂದ ಅದಕ್ಕೆ ಅಧಿಕೃತ ಒಪ್ಪಿಗೆ ದೊರೆತಿದೆ.
ED ಚಾರ್ಜ್‌ಶೀಟ್ ಸಲ್ಲಿಕೆ
ಈ ಹಗರಣದ ಬಗ್ಗೆ ED ಈಗಾಗಲೇ ಪ್ರಾಥಮಿಕ ತನಿಖೆ ನಡೆಸಿ ಚಾರ್ಜ್‌ಶೀಟ್ ಸಲ್ಲಿಸಿದೆ. ಈ ಚಾರ್ಜ್‌ಶೀಟ್‌ನಲ್ಲಿ ಹಲವು ದಾಖಲೆಗಳೊಂದಿಗೆ ಹಣಕಾಸು ಚಟುವಟಿಕೆಗಳ ಬಗ್ಗೆ ವಿವರ ನೀಡಲಾಗಿದೆ. ಲಾಲು ಕುಟುಂಬದ ಬ್ಯಾಂಕ್ ಲೆಕ್ಕಗಳು, ಜಮೀನಿನ ದಾಖಲೆಗಳು ಮತ್ತು ರೈಲ್ವೆ ನೇಮಕಾತಿಗಳ ವಿವರಗಳನ್ನು ಪರಿಶೀಲಿಸಲಾಗಿದೆ.
ಆಪ್ತ ಬಂಧುಗಳ ಹೆಸರು ಸಹ ಉಲ್ಲೇಖ
ED ಸಲ್ಲಿಸಿದ ದಾಖಲೆಯ ಪ್ರಕಾರ, ಲಾಲು ಯಾದವ್ ಅವರ ಕುಟುಂಬದ ಸದಸ್ಯರ ಹೆಸರಿನಲ್ಲಿರುವ ಬಿಪಿಎಸ್‌ಸಿ ಅರ್ಜಿ ನಮೂನೆಗಳು ಹಾಗೂ ಜಮೀನಿನ ದಾಖಲೆಗಳು ಮ್ಯೂಚುವಲ್ ಅಗ್ರಿಮೆಂಟ್ ಮೂಲಕ ವರ್ಗಾವಣೆಗೊಂಡಿರುವುದು ಕಂಡುಬಂದಿದೆ. ಈ ಎಲ್ಲಾ ಸಾಕ್ಷಿಗಳ ಆಧಾರದಿಂದಲೇ ED ಈಗ ತನಿಖೆ ನಡೆಸಲು ಮುಂದಾಗಿದೆ.
