Ranji Trophy 2022: ಮನೀಷ್ ಪಾಂಡೆ ದ್ವಿಶತಕದ ಅಬ್ಬರ
ಮನೀಷ್ ಪಾಂಡೆ(208*) ಭರ್ಜರಿ ದ್ವಿಶತಕ ಹಾಗೂ ಆರ್.ಸಮರ್ಥ್(140) ಅವರ ಅಮೋಘ ಶತಕದ ನೆರವಿನಿಂದ ಪ್ರಸಕ್ತ ಸಾಲಿನ ರಣಜಿ ಟ್ರೋಫಿ ಪಂದ್ಯಾವಳಿಯಲ್ಲಿ ಗೋವಾ ವಿರುದ್ಧದ ಪಂದ್ಯದಲ್ಲಿ ಕರ್ನಾಟಕ 603 ರನ್ಗಳ ಬೃಹತ್ ಮೊತ್ತ ಪೇರಿಸಿದೆ.
ಗೋವಾ ಕ್ರಿಕೆಟ್ ಅಸೋಸಿಯೇಷನ್ ಮೈದಾನದಲ್ಲಿ ನಡೆಯುತ್ತಿರುವ ಪಂದ್ಯದ 2ನೇ ದಿನವೂ ಸಹ ಕರ್ನಾಟಕದ ಬ್ಯಾಟ್ಸ್ಮನ್ಗಳ ಅಬ್ಬರದ ಪ್ರದರ್ಶನ ನೀಡಿದರು.
ಗೋವಾ ಬೌಲಿಂಗ್ ದಾಳಿಯನ್ನ ಸಮರ್ಥವಾಗಿ ಎದುರಿಸಿದ ಕರ್ನಾಟಕ ಮೊದಲ ಇನ್ನಿಂಗ್ಸ್ನಲ್ಲಿ 7 ವಿಕೆಟ್ ನಷ್ಟಕ್ಕೆ 603 ರನ್ಗಳಿಸಿ ಇನ್ನಿಂಗ್ಸ್ ಡಿಕ್ಲೇರ್ ಮಾಡಿಕೊಂಡಿದೆ. ಇದಕ್ಕುತ್ತರವಾಗಿ ತನ್ನ ಮೊದಲ ಇನ್ನಿಂಗ್ಸ್ ಆರಂಭಿಸಿರುವ ಗೋವಾ 2ನೇ ದಿನದಂತ್ಯಕ್ಕೆ 1 ವಿಕೆಟ್ ನಷ್ಟಕ್ಕೆ 45 ರನ್ಗಳಿಸಿದೆ.
ಇದಕ್ಕೂ ಮುನ್ನ ದಿನದಾಟ ಆರಂಭಿಸಿದ ವಿಶಾಲ್ ಒನತ್(91) ರನ್ಗಳಿಸಿ ಶತಕ ವಂಚಿತರಾಗಿ ನಿರಾಸೆ ಅನುಭವಿಸಿದರು.
ಮಧ್ಯಮ ಕ್ರಮಾಂಕದಲ್ಲಿ ಜವಾಬ್ದಾರಿಯುತ ಆಟವಾಡಿದ ಮನೀಷ್ ಪಾಂಡೆ(208* ರನ್, 186 ಬಾಲ್, 14 ಬೌಂಡರಿ ಹಾಗೂ 11 ಸಿಕ್ಸ್) ಸ್ಪೋಟಕ ಆಟವಾಡಿದರು.
ಗೋವಾ ಬೌಲಿಂಗ್ ದಾಳಿಯನ್ನ ಧೂಳಿಪಟ ಮಾಡಿದ ಪಾಂಡೆ, ಭರ್ಜರಿ ದ್ವಿಶತಕ ಬಾರಿಸಿ ಮಿಂಚಿದರು. ಉಳಿದಂತೆ ಕರ್ನಾಟಕದ ಪರ ಶರತ್(29), ಕೆ.ಗೌತಮ್(16) ಹಾಗೂ ಶುಭಾಂಗ್ ಹೆಗ್ಡೆ(39) ಉಪಯುಕ್ತ ಬ್ಯಾಟಿಂಗ್ ಮೂಲಕ ತಂಡಕ್ಕೆ ಆಸರೆಯಾದರು. ಗೋವಾ ಪರ ದರ್ಶನ್ ಮಿಸ್ಲಾ 3, ಅರ್ಜುನ್ ತೆಂಡುಲ್ಕರ್ 2 ಹಾಗೂ ಲಕ್ಷ್ಯಾ ಗಾರ್ಗ್ ಮತ್ತು ಎಸ್ ಲಾಡ್ ತಲಾ 1 ವಿಕೆಟ್ ಪಡೆದರು.
ಕರ್ನಾಟಕದ ಬೃಹತ್ ಮೊತ್ತಕ್ಕೆ ಪ್ರತಿಯಾಗಿ ತನ್ನ ಮೊದಲ ಇನ್ನಿಂಗ್ಸ್ ಆರಂಭಿಸಿದ ಗೋವಾ ನಿರೀಕ್ಷಿತ ಆರಂಭ ಪಡೆಯಲಿಲ್ಲ. ಆರಂಭಿಕನಾಗಿ ಕಣಕ್ಕಿಳಿದ ಸುನೀಲ್ ದೇಸಾಯಿ(5) ಬಹುಬೇಗನೆ ನಿರ್ಗಮಿಸಿದರು. ಉಳಿದಂತೆ ಸುಮೀರನ್ ಅಮೋನ್ಕರ್(30*) ಹಾಗೂ ಸುಯಾಶ್ ಪ್ರಭುದೇಸಾಯಿ(6*) ರನ್ಗಳಿಸಿ 3ನೇ ದಿನಕ್ಕೆ ಬ್ಯಾಟಿಂಗ್ ಕಾಯ್ದುಕೊಂಡಿದ್ದಾರೆ.