ಕೊಡಗಿನ ಬೆಡಗಿ ರಶ್ಮಿಕಾ ಮಂದಣ್ಣ ಈಗ ಭಾರತೀಯ ಚಿತ್ರರಂಗದ ಅನಭಿಷಿಕ್ತ ಸುಲ್ತಾನಿ. ಖ್ಯಾತ ರಾಷ್ಟ್ರೀಯ ನಿಯತಕಾಲಿಕೆ ಇಂಡಿಯಾ ಟುಡೇ ದೇಶದ ಟಾಪ್ ನಾಯಕಿಯರ ಪಟ್ಟಿಯನ್ನು ಪ್ರಕಟಿಸಿದ್ದು, ರಶ್ಮಿಕಾ ಮಂದಣ್ಣ ಅವರನ್ನು ಭಾರತದ ನಂ 1 ನಾಯಕಿ ಎಂದು ಘೋಷಿಸಿದೆ. ಈ ಮೂಲಕ ಕನ್ನಡದ ಮಣ್ಣಿನ ಈ ನಟಿ ಬಾಲಿವುಡ್ ನಟಿಯರಿಗೂ ಸಡ್ಡು ಹೊಡೆದು ದೇಶದ ಗಲ್ಲಾಪೆಟ್ಟಿಗೆಯ ರಾಣಿಯಾಗಿ ಹೊರಹೊಮ್ಮಿದ್ದಾರೆ.
ಇಂಡಿಯಾ ಟುಡೇ ರಶ್ಮಿಕಾ ಅವರನ್ನು ದಿ ನ್ಯೂ ನ್ಯಾಷನಲ್ ಸ್ಟಾರ್ ಎಂದು ಬಣ್ಣಿಸಿದೆ. ಪುಷ್ಪ ದಿ ರೈಸ್, ಅನಿಮಲ್ ನಂತಹ ಬ್ಲಾಕ್ ಬಸ್ಟರ್ ಚಿತ್ರಗಳ ಬಳಿಕ ಈಗ ಪುಷ್ಪ 2 ದಿ ರೂಲ್ ಮತ್ತು ಛಾವಾ ಚಿತ್ರಗಳ ಮೂಲಕ ರಶ್ಮಿಕಾ ಕ್ರೇಜ್ ಮುಗಿಲು ಮುಟ್ಟಿದೆ. ದೀಪಿಕಾ ಪಡುಕೋಣೆ, ಶ್ರದ್ಧಾ ಕಪೂರ್, ಆಲಿಯಾ ಭಟ್ ಹಾಗೂ ಸಾಯಿ ಪಲ್ಲವಿಯಂತಹ ಘಟಾನುಘಟಿ ನಟಿಯರನ್ನು ಹಿಂದಿಕ್ಕಿ ರಶ್ಮಿಕಾ ಮೊದಲ ಸ್ಥಾನ ಪಡೆದಿರುವುದು ಅವರ ಮಾರುಕಟ್ಟೆ ಮೌಲ್ಯಕ್ಕೆ ಸಾಕ್ಷಿಯಾಗಿದೆ.
ವಿಜಯ್ ದೇವರಕೊಂಡ ಮೆಚ್ಚುಗೆ
ರಶ್ಮಿಕಾ ಈ ಐತಿಹಾಸಿಕ ಸಾಧನೆಯನ್ನು ಸಂಭ್ರಮಿಸಿರುವ ನಟ ವಿಜಯ್ ದೇವರಕೊಂಡ, ಇಂಡಿಯಾ ಟುಡೇ ಕವರ್ ಪೇಜ್ ಫೋಟೋವನ್ನು ಹಂಚಿಕೊಂಡಿದ್ದಾರೆ. ಇದು ಪೀಕ್ ಸ್ಟಫ್, ನಿನ್ನ ಬಗ್ಗೆ ಹೆಮ್ಮೆಯಿದೆ ಎಂದು ರಶ್ಮಿಕಾ ಅವರಿಗೆ ಶುಭ ಹಾರೈಸಿದ್ದಾರೆ. ವಿಜಯ್ ಅವರ ಈ ಪೋಸ್ಟ್ ಈಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ಇಬ್ಬರ ಅಭಿಮಾನಿಗಳು ಸಂಭ್ರಮಿಸುತ್ತಿದ್ದಾರೆ.
ಕೊಡಗಿನಿಂದ ಭಾರತದ ಶಿಖರಕ್ಕೆ
ರಶ್ಮಿಕಾ ಮಂದಣ್ಣ ಅವರ ಈ ಯಶಸ್ಸಿನ ಪಯಣ ಸಿನಿಮಾ ಸ್ಕ್ರಿಪ್ಟ್ ಗಿಂತಲೂ ರೋಚಕವಾಗಿದೆ. 1996 ರಲ್ಲಿ ಕೊಡಗಿನ ವಿರಾಜಪೇಟೆಯಲ್ಲಿ ಜನಿಸಿದ ರಶ್ಮಿಕಾ, ಬೆಂಗಳೂರಿನಲ್ಲಿ ವಿದ್ಯಾಭ್ಯಾಸ ಮಾಡುತ್ತಲೇ ಮಾಡೆಲಿಂಗ್ ಲೋಕಕ್ಕೆ ಕಾಲಿಟ್ಟವರು. 2016 ರಲ್ಲಿ ರಿಷಬ್ ಶೆಟ್ಟಿ ನಿರ್ದೇಶನದ ಕಿರಿಕ್ ಪಾರ್ಟಿ ಮೂಲಕ ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡಿದ ಈ ನಟಿ, ಮೊದಲ ಚಿತ್ರದಲ್ಲೇ ಸಾನ್ವಿ ಪಾತ್ರದ ಮೂಲಕ ಕನ್ನಡಿಗರ ಹೃದಯ ಗೆದ್ದಿದ್ದರು.
ಅಲ್ಲಿಂದ ಆರಂಭವಾದ ಇವರ ವಿಜಯಯಾತ್ರೆ ತೆಲುಗಿನ ಗೀತಾ ಗೋವಿಂದಂ ಮೂಲಕ ಪ್ಯಾನ್ ಇಂಡಿಯಾ ಮಟ್ಟಕ್ಕೆ ಬೆಳೆಯಿತು. ಶ್ರೀವಲ್ಲಿ ಪಾತ್ರವಂತೂ ಇವರನ್ನು ಮನೆಮಾತಾಗಿಸಿತು. ಕನ್ನಡದಿಂದ ಆರಂಭವಾಗಿ ತೆಲುಗು, ತಮಿಳು ಹಾಗೂ ಹಿಂದಿ ಚಿತ್ರರಂಗದಲ್ಲಿ ಮಿಂಚುತ್ತಿರುವ ರಶ್ಮಿಕಾ ಅವರನ್ನು ಇಂದು ನ್ಯಾಷನಲ್ ಕ್ರಶ್ ಎಂದು ಆರಾಧಿಸಲಾಗುತ್ತಿದೆ. ಒಂದು ಸಾಮಾನ್ಯ ಕೊಡವ ಕುಟುಂಬದ ಹುಡುಗಿ ಇಂದು ದೇಶದ ನಂ 1 ನಾಯಕಿಯಾಗಿ ಬೆಳೆದು ನಿಂತಿರುವುದು ನಿಜಕ್ಕೂ ಹೆಮ್ಮೆಯ ವಿಷಯ.
