ನ್ಯಾಷನಲ್ ಕ್ರಶ್ ರಶ್ಮಿಕಾ ಮಂದಣ್ಣ ಮತ್ತೊಮ್ಮೆ ತಮ್ಮ ಹೇಳಿಕೆಯ ಮೂಲಕ ವಿವಾದದ ಕೇಂದ್ರಬಿಂದುವಾಗಿದ್ದಾರೆ. ಕನ್ನಡದ ‘ಕಿರಿಕ್ ಪಾರ್ಟಿ’ ಚಿತ್ರದ ಮೂಲಕ ನಾಡಿನ ಮನೆಮಾತಾಗಿ, ನಂತರ ತೆಲುಗು, ತಮಿಳು ಮತ್ತು ಹಿಂದಿ ಚಿತ್ರರಂಗದಲ್ಲಿ ಪ್ಯಾನ್ ಇಂಡಿಯಾ ತಾರೆಯಾಗಿ ಬೆಳೆದ ರಶ್ಮಿಕಾ, ತಮ್ಮ ಮೊದಲ ಸಿನಿಮಾದ ಕುರಿತು ನೀಡಿದ ಹೇಳಿಕೆ ಕನ್ನಡಿಗರ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ. ತಮ್ಮನ್ನು ಚಿತ್ರರಂಗಕ್ಕೆ ಪರಿಚಯಿಸಿದ ‘ಕಿರಿಕ್ ಪಾರ್ಟಿ’ ತಮ್ಮ ಮೊದಲ ಚಿತ್ರವಲ್ಲ ಎಂದು ಹೇಳುವ ಮೂಲಕ ಅವರು ಹೊಸ ವಿವಾದವನ್ನು ಮೈಮೇಲೆ ಎಳೆದುಕೊಂಡಿದ್ದಾರೆ.
ವಿವಾದಕ್ಕೆ ಕಾರಣವಾದ ಹೇಳಿಕೆ ಏನು?
ಇತ್ತೀಚೆಗೆ ಎನ್ಟಿವಿ ವಾಹಿನಿಗೆ ನೀಡಿದ ಸಂದರ್ಶನವೊಂದರಲ್ಲಿ ತಮ್ಮ ಸಿನಿ ಜರ್ನಿಯ ಬಗ್ಗೆ ಮಾತನಾಡಿದ ರಶ್ಮಿಕಾ, “ನನ್ನ ವೃತ್ತಿಜೀವನ ಆರಂಭವಾಗಿ 9 ವರ್ಷಗಳಾಗಿವೆ, ಈ ಅವಧಿಯಲ್ಲಿ 25 ಸಿನಿಮಾಗಳಲ್ಲಿ ನಟಿಸಿದ್ದೇನೆ. ಆದರೆ ಎಲ್ಲರೂ ಭಾವಿಸಿರುವಂತೆ ‘ಕಿರಿಕ್ ಪಾರ್ಟಿ’ ನನ್ನ ಮೊದಲ ಚಿತ್ರವಲ್ಲ. ಅದಕ್ಕೂ ಮುನ್ನ ನಾನು ‘ಗೆಳೆಯರೇ ಗೆಳತಿಯರೇ’ ಎಂಬ ಹೆಸರಿನ ಚಿತ್ರಕ್ಕೆ ಆಯ್ಕೆಯಾಗಿದ್ದೆ. ಆ ಚಿತ್ರಕ್ಕಾಗಿ ಸುಮಾರು ನಾಲ್ಕೈದು ತಿಂಗಳುಗಳ ಕಾಲ ತಯಾರಿ ಮತ್ತು ರಿಹರ್ಸಲ್ ಕೂಡ ಮಾಡಿದ್ದೆವು. ಆದರೆ, ಚಿತ್ರೀಕರಣ ಆರಂಭವಾಗುವ ಮೊದಲೇ ಆ ಪ್ರಾಜೆಕ್ಟ್ ನಿಂತುಹೋಯಿತು. ಹೀಗಾಗಿ ತಾಂತ್ರಿಕವಾಗಿ ಅದು ನನ್ನ ಮೊದಲ ಸಿನಿಮಾ” ಎಂದು ಸ್ಪಷ್ಟಪಡಿಸಿದ್ದಾರೆ.
ಕಿರಿಕ್ ಪಾರ್ಟಿ ಬಗ್ಗೆ ಮೆಚ್ಚುಗೆಯ ಮಾತು
‘ಗೆಳೆಯರೇ ಗೆಳತಿಯರೇ’ ಚಿತ್ರವನ್ನು ತಮ್ಮ ಮೊದಲ ಸಿನಿಮಾ ಎಂದು ಹೇಳಿಕೊಂಡರೂ, ‘ಕಿರಿಕ್ ಪಾರ್ಟಿ’ ಚಿತ್ರ ತಮ್ಮ ಬದುಕಿಗೆ ನೀಡಿದ ತಿರುವಿನ ಬಗ್ಗೆಯೂ ರಶ್ಮಿಕಾ ಮಾತನಾಡಿದ್ದಾರೆ. “ಕಿರಿಕ್ ಪಾರ್ಟಿ ಪ್ರೀಮಿಯರ್ ಶೋ ದಿನ ಇಡೀ ಚಿತ್ರಮಂದಿರ ನನ್ನ ಪಾತ್ರವಾದ ‘ಸಾನ್ವಿ ಜೋಸೆಫ್’ ಹೆಸರನ್ನು ಕೂಗುತ್ತಿತ್ತು. ಆ ಕ್ಷಣ ನನ್ನಲ್ಲಿ ಇನ್ನಷ್ಟು ಸಾಧಿಸಬೇಕು, ಇದು ಸಾಲದು ಎಂಬ ಹಸಿವನ್ನು ಹುಟ್ಟುಹಾಕಿತು. ಪ್ರೇಕ್ಷಕರ ಆ ಪ್ರೋತ್ಸಾಹವೇ ನನ್ನನ್ನು ಇಂದು ಈ ಮಟ್ಟಕ್ಕೆ ಬೆಳೆಸಿದೆ” ಎಂದು ರಶ್ಮಿಕಾ ತಮ್ಮ ಯಶಸ್ಸಿನ ಶ್ರೇಯಸ್ಸನ್ನು ಪ್ರೇಕ್ಷಕರಿಗೆ ನೀಡಿದ್ದಾರೆ.
ಭುಗಿಲೆದ್ದ ಕನ್ನಡಿಗರ ಆಕ್ರೋಶ
ರಶ್ಮಿಕಾ ಅವರ ಈ ಹೇಳಿಕೆ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದ್ದಂತೆ ಕನ್ನಡಿಗರಿಂದ ತೀವ್ರ ಟೀಕೆ ವ್ಯಕ್ತವಾಗಿದೆ. ಚಿತ್ರೀಕರಣವೇ ಆಗದ, ತೆರೆಗೇ ಬಾರದ ಒಂದು ಚಿತ್ರವನ್ನು ‘ಮೊದಲ ಸಿನಿಮಾ’ ಎಂದು ಪರಿಗಣಿಸುವುದು ಹೇಗೆ? ಎಂದು ನೆಟ್ಟಿಗರು ಪ್ರಶ್ನಿಸುತ್ತಿದ್ದಾರೆ.
“ಕಿರಿಕ್ ಪಾರ್ಟಿ ಇಲ್ಲದಿದ್ದರೆ ರಶ್ಮಿಕಾ ಮಂದಣ್ಣ ಎಂಬ ನಟಿಯೇ ಇರುತ್ತಿರಲಿಲ್ಲ. ಅವರಿಗೆ ಹೆಸರು, ಖ್ಯಾತಿ, ಅವಕಾಶ ಎಲ್ಲವನ್ನೂ ನೀಡಿದ್ದು ಕನ್ನಡ ಚಿತ್ರರಂಗ. ಆದರೆ, ಅದನ್ನು ಒಪ್ಪಿಕೊಳ್ಳಲು ಅವರಿಗೆ ಇಷ್ಟು ಅಹಂಕಾರವೇ?” ಎಂದು ಹಲವರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. “ಕೃತಜ್ಞತೆಯನ್ನು ಮರೆತ ನಟಿ,” “ಬೆಳೆಸಿದ ನಾಡಿಗೆ ಮತ್ತೆ ಮತ್ತೆ ಅವಮಾನ ಮಾಡುತ್ತಿದ್ದಾರೆ,” “ಬೆಂಗಳೂರಿನಿಂದ ಇವರನ್ನು ಬ್ಯಾನ್ ಮಾಡಿ” ಎಂಬಂತಹ ಕಮೆಂಟ್ಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿವೆ.
ರಶ್ಮಿಕಾ ಅವರ ಈ ಹೇಳಿಕೆಯು, ಅವರು ಕನ್ನಡ ಚಿತ್ರರಂಗದಿಂದ ಅಂತರ ಕಾಯ್ದುಕೊಳ್ಳುತ್ತಿದ್ದಾರೆ ಮತ್ತು ತಮ್ಮ ಮೂಲವನ್ನು ಮರೆಯುತ್ತಿದ್ದಾರೆ ಎಂಬ ಹಳೆಯ ಆರೋಪಗಳಿಗೆ ಮತ್ತಷ್ಟು ಪುಷ್ಟಿ ನೀಡಿದಂತಾಗಿದ್ದು, ಅವರನ್ನು ಕನ್ನಡಿಗರ ಕೋಪಕ್ಕೆ ಗುರಿಯಾಗಿಸಿದೆ.
