ಬೆಂಗಳೂರು: ‘ಕಾಂಬಿಫ್ಲಾಮ್’, ‘ಅಲೆಗ್ರಾ’ ದಂತಹ ಜನಪ್ರಿಯ ಔಷಧಿಗಳ ತಯಾರಕ ಕಂಪನಿ ‘ಸನೋಫಿ ಕನ್ಸ್ಯೂಮರ್ ಹೆಲ್ತ್‌ಕೇರ್ ಇಂಡಿಯಾ’ 3ನೇ ತ್ರೈಮಾಸಿಕದಲ್ಲಿ ಭರ್ಜರಿ ಸಾಧನೆ ಮಾಡಿದೆ. ಕಂಪನಿಯ ನಿವ್ವಳ ಲಾಭ ಶೇ. 22ರಷ್ಟು ಏರಿಕೆ ಕಂಡಿರುವ ಬೆನ್ನಲ್ಲೇ, ಕಂಪನಿಯ ಷೇರುಗಳ ಬೆಲೆ ಗಣನೀಯವಾಗಿ ಜಿಗಿದಿವೆ.
ಕಂಪನಿಯ ಅದ್ಭುತ ತ್ರೈಮಾಸಿಕ ವರದಿಯ ಬೆನ್ನಲ್ಲೇ ಹೂಡಿಕೆದಾರರು ಸನೋಫಿ ಷೇರು ಬೆಲೆ ಬೆಳಗ್ಗಿನ ವಹಿವಾಟಿನಲ್ಲಿ ಶೇ. 13ಕ್ಕಿಂತ ಹೆಚ್ಚು ಏರಿಕೆ ಕಂಡು ಇಂಟ್ರಾಡೇ ವಹಿವಾಟಿನಲ್ಲಿ ಗರಿಷ್ಠ 3,751.70 ರೂ. ತಲುಪಿತ್ತು. ಇಂಟ್ರಾಡೇ ಕನಿಷ್ಠ ದರ 3,430 ರೂ. ಆಗಿದೆ.
ಮೂರನೇ ತ್ರೈಮಾಸಿಕದಲ್ಲಿ ಭರ್ಜರಿ ಸಾಧನೆ
ಕಂಪನಿಯು ಮೂರನೇ ತ್ರೈಮಾಸಿಕದಲ್ಲಿ ಅತ್ಯುತ್ತಮ ಪ್ರದರ್ಶನ ದಾಖಲಿಸಿದ್ದು ನಿವ್ವಳ ಲಾಭವು ಕಳೆದ ವರ್ಷದ ಇದೇ ಅವಧಿಯಲ್ಲಿದ್ದ 63 ಕೋಟಿ ರೂ.ಗಳಿಂದ ಶೇ. 22.2ರಷ್ಟು ಗಣನೀಯ ಏರಿಕೆ ಕಂಡು 77 ಕೋಟಿ ರೂ.ಗಳಿಗೆ ತಲುಪಿದೆ.
ಅದೇ ರೀತಿ, ಕಂಪನಿಯ ಒಟ್ಟು ಆದಾಯವು ಕಳೆದ ವರ್ಷದ 234 ಕೋಟಿ ರೂ.ಗಳಿಗೆ ಹೋಲಿಸಿದರೆ ಶೇ. 12.4ರಷ್ಟು ಹೆಚ್ಚಾಗಿದ್ದು, ಒಟ್ಟು 263 ಕೋಟಿ ರೂ.ಗೆ ಮುಟ್ಟಿದೆ. ಕಾರ್ಯಾಚರಣೆಯ ಮಟ್ಟದಲ್ಲೂ ಉತ್ತಮ ಪ್ರಗತಿ ಕಂಡುಬಂದಿದ್ದು, ಕಾರ್ಯಾಚರಣೆ ಲಾಭ (ಎಬಿಟ್ಡಾ) ಶೇ. 19.5ರಷ್ಟು ಏರಿಕೆಯೊಂದಿಗೆ 85 ಕೋಟಿ ರೂ.ಗಳಿಂದ 102 ಕೋಟಿ ರೂ.ಗಳಿಗೆ ಮುಟ್ಟಿದೆ.
ಇದರ ಪರಿಣಾಮವಾಗಿ ಕಾರ್ಯಾಚರಣೆಯ ಮಾರ್ಜಿನ್ ಶೇ. 36.4ರಿಂದ ಶೇ. 38.7ಕ್ಕೆ ಸುಧಾರಣೆ ಕಂಡಿದೆ. ಇವೆಲ್ಲದರ ಜೊತೆಗೆ, ಭಾರತದೊಳಗಿನ ದೇಶೀಯ ಮಾರಾಟದಲ್ಲಿ ಶೇ. 19ರಷ್ಟು ಭಾರಿ ಏರಿಕೆಯಾಗಿದೆ.
ಕಳೆದ 9 ತಿಂಗಳಲ್ಲೂ ಉತ್ತಮ ಸಾಧನೆ
ಕೇವಲ 3ನೇ ತ್ರೈಮಾಸಿಕ ಮಾತ್ರವಲ್ಲ, ಈ ವರ್ಷದ ಕಳೆದ 9 ತಿಂಗಳ ಲೆಕ್ಕಾಚಾರದಲ್ಲೂ ಕಂಪನಿಯ ಆದಾಯ ಶೇ. 16 ರಷ್ಟು ಹಾಗೂ ರಫ್ತು ಪ್ರಮಾಣ ಶೇ. 19ರಷ್ಟು ಪ್ರಗತಿ ಸಾಧಿಸಿದೆ.
ಈ ಸಾಧನೆಯ ಬಗ್ಗೆ ಹರ್ಷ ವ್ಯಕ್ತಪಡಿಸಿರುವ ಕಂಪನಿಯ ವ್ಯವಸ್ಥಾಪಕ ನಿರ್ದೇಶಕ ಹಿಮಾಂಶು ಬಕ್ಷಿ, “ನಮ್ಮ ಸ್ಪಷ್ಟ ಕಾರ್ಯತಂತ್ರ ಮತ್ತು ಬ್ರಾಂಡ್‌ಗಳ ಸಾಮರ್ಥ್ಯಕ್ಕೆ ಈ ಸಾಧನೆಯೇ ಕನ್ನಡಿಯಾಗಿದೆ. ಪ್ರಮುಖ ಬ್ರಾಂಡ್‌ಗಳ ಮಾರಾಟ ಹೆಚ್ಚಾಗಿದ್ದು, ಮಾರುಕಟ್ಟೆಯಲ್ಲಿ ನಮ್ಮ ಪಾಲು ವಿಸ್ತರಣೆಯಾಗಿದೆ. ವಿತರಣಾ ಜಾಲವನ್ನು ವಿಸ್ತರಿಸಲು ನಾವು ಮಾಡಿದ ಹೂಡಿಕೆಗಳು, ಇಂದು ಹೆಚ್ಚಿನ ಗ್ರಾಹಕರಿಗೆ ಸೇವೆ ಒದಗಿಸಲು ನಮಗೆ ನೆರವಾಗುತ್ತಿವೆ,” ಎಂದಿದ್ದಾರೆ.
2024ರ ಜೂನ್ 1 ರಂದು ‘ಸನೋಫಿ ಇಂಡಿಯಾ ಲಿಮಿಟೆಡ್’ನಿಂದ ಪ್ರತ್ಯೇಕಗೊಂಡು ಕನ್ಸ್ಯೂಮರ್ ವಿಭಾಗದಲ್ಲಿ ಕಾರ್ಯನಿರ್ವಹಿಸುತ್ತಿರುವ ಈ ಕಂಪನಿ, ಗ್ರಾಹಕರಿಗೆ ಚಿರಪರಿಚಿತವಾಗಿರುವ ಅಲೆಗ್ರಾ, ಡಿಪುರಾ, ಎವಿಲ್ ಮತ್ತು ಕಾಂಬಿಫ್ಲಾಮ್ನಂತಹ ಯಶಸ್ವಿ ಹೆಲ್ತ್‌ಕೇರ್ ಬ್ರಾಂಡ್‌ಗಳನ್ನು ಹೊಂದಿದೆ.
