ಟೀಮ್ ಇಂಡಿಯಾದ ಮುಂದಿನ ಧೋನಿ ಯಾರು ಅನ್ನೋ ಪ್ರಶ್ನೆಗೆ ರೈನಾ ಉತ್ತರ ರೋಹಿತ್ ಶರ್ಮಾ..!
ಟೀಮ್ ಇಂಡಿಯಾದ ನಾಯಕನಾಗಿ ಮಹೇಂದ್ರ ಸಿಂಗ್ ಧೋನಿಯ ಕೊಡುಗೆ ಅದ್ಭುತ. ಎರಡು ವಿಶ್ವಕಪ್ ಮತ್ತು ಐಸಿಸಿ ಚಾಂಪಿಯನ್ಸ್ ಟ್ರೋಫಿ ಗೆದ್ದಿರುವ ಮಹೇಂದ್ರ ಸಿಂಗ್ ಧೋನಿಯ ನಾಯಕತ್ವದ ವೈಖರಿಯೇ ಅಮೋಘವಾಗಿತ್ತು. ಸದಾ ಕೂಲ್ ಆಗಿಯೇ ತಂಡವನ್ನು ಮುನ್ನಡೆಸುತ್ತಿದ್ದ ಧೋನಿಗೆ ಕೂಲ್ ಕ್ಯಾಪ್ಟನ್ ಎಂಬ ಬಿರುದೂ ಇದೆ. ಇದೆಲ್ಲಾ ಈಗ ಇತಿಹಾಸ ಸೇರಿಕೊಂಡಾಗಿದೆ. ಆದ್ರೆ ಸುರೇಶ್ ರೈನಾ ಮತ್ತೆ ಧೋನಿಯನ್ನು ನೆನಪು ಮಾಡಿಕೊಂಡಿದ್ದಾರೆ. ಐಪಿಎಲ್ ನಲ್ಲಿ ಸಿಎಸ್ಕೆ ಪರ ಆಡುತ್ತಿರುವ ರೈನಾ ಧೋನಿಯ ಆಪ್ತ ಗೆಳೆಯನೂ ಹೌದು.
ಇದೀಗ ಸುರೇಶ್ ರೈನಾ ರೋಹಿತ್ ಶರ್ಮಾನ ಬಗ್ಗೆ ಮಾತನಾಡಿದ್ದಾರೆ. ರೋಹಿತ್ ಶರ್ಮಾನನ್ನು ಧೋನಿಯ ಜೊತೆಗೂ ಹೋಲಿಕೆ ಮಾಡಿದ್ದಾರೆ. ರೋಹಿತ್ ಶರ್ಮ ಟೀಮ್ ಇಂಡಿಯಾದ ಮತ್ತೊಬ್ಬ ಮಹೇಂದ್ರ ಸಿಂಗ್ ಧೋನಿ ಅಂತ ಬಣ್ಣಿಸಿದ್ದಾರೆ.
ರೋಹಿತ್ ಶರ್ಮಾನಲ್ಲಿ ಅದ್ಭುತವಾದ ನಾಯಕನ ಗುಣಗಳಿವೆ. ನಾನು ರೋಹಿತ್ನನ್ನು ಹತ್ತಿರದಿಂದ ನೋಡಿದ್ದೇನೆ. ಯಾವಾಗಲೂ ಕೂಲ್ ಆಗಿಯೇ ಇರುತ್ತಾನೆ. ಸಹ ಆಟಗಾರರ ಮಾತನ್ನು ಕೇಳುವ ತಾಳ್ಮೆ ಆತನಲ್ಲಿದೆ. ಹಾಗೇ ಆಟಗಾರರಿಗೆ ಮನೋಸ್ಥೈರ್ಯ ತುಂಬುತ್ತಾನೆ. ತಂಡವನ್ನು ಮುಂದೆ ನಿಂತು ಮುನ್ನಡೆಸುತ್ತಾನೆ. ಡ್ರೆಸಿಂಗ್ ರೂಮ್ ನ ವಾತಾವರಣವನ್ನು ಚೆನ್ನಾಗಿ ನೋಡಿಕೊಳ್ಳುತ್ತಾನೆ. ಹಾಗಾಗಿ ನನ್ನ ಪ್ರಕಾರ ರೋಹಿತ್ ಶರ್ಮಾ ಭವಿಷ್ಯದ ಟೀಮ್ ಇಂಡಿಯಾದ ಧೋನಿ ಅಂತ ಸುರೇಶ್ ರೈನಾ ಹೇಳಿದ್ದಾರೆ.
ರೋಹಿತ್ ಶರ್ಮಾ ಪ್ರತಿಯೊಬ್ಬನನ್ನು ನಾಯಕನಾಗಿಯೇ ನೋಡುತ್ತಾನೆ. ನಾನು ಆತನನ್ನು ನೋಡಿದ್ದೇನೆ. ಆತನ ಜೊತೆ ಆಡಿದ್ದೇನೆ. ಆತನ ನಾಯಕತ್ವದಲ್ಲೂ ಆಡಿದ್ದೇನೆ. ಬಾಂಗ್ಲಾದೇಶದಲ್ಲಿ ಏಷ್ಯಾಕಪ್ ಗೆದ್ದಾಗ ಆತ ತಂಡದ ಆಟಗಾರರಿಗೆ ಯಾವ ರೀತಿ ಆತ್ಮವಿಶ್ವಾಸ ತುಂಬಿದ್ದ ಎಂಬುದು ಸಹ ನನಗೆ ನೆನಪಿದೆ. ಯುವ ಆಟಗಾರರಿಗೆ ಸದಾ ಪ್ರೋತ್ಸಾಹ ತುಂಬಿರುತ್ತಾನೆ ಎಂದು ರೈನಾ ರೋಹಿತ್ ಶರ್ಮಾ ಅವರ ನಾಯಕತ್ವದ ಗುಣಗಳನ್ನು ಕೊಂಡಾಡಿದ್ದಾರೆ.
ರೋಹಿತ್ ಶರ್ಮಾ ಧೋನಿಯ ನಂತರದ ಸ್ಥಾನದಲ್ಲಿ ನಿಲ್ಲುತ್ತಾರೆ. ಐಪಿಎಲ್ ನಲ್ಲಿ ನಾಯಕನಾಗಿ ಧೋನಿಗಿಂತ ಹೆಚ್ಚು ಟ್ರೋಫಿಗಳನ್ನು ಗೆದ್ದಿದ್ದಾರೆ. ರೋಹಿತ್ ಮತ್ತು ಧೋನಿ ನಡುವೆ ಸಾಕಷ್ಟು ಸಾಮ್ಯತೆಗಳಿವೆ. ಯಾವಾಗ ನಾಯಕನಾದವನು ಕೇಳಿಕೊಳ್ಳುತ್ತಾನೋ ಆಗ ಎಲ್ಲಾ ಸಮಸ್ಯೆಗಳಿಗೆ ಪರಿಹಾರ ಸಿಗುತ್ತದೆ. ಆಟಗಾರರ ಮಾನಸಿಕ ತೊಂದರೆಗಳು ಸಹ ನಿವಾರಣೆಯಾಗುತ್ತದೆ. ನನ್ನ ಪ್ರಕಾರ ಇಬ್ಬರು ಕೂಡ ಅದ್ಭುತ ನಾಯಕರು ಎಂದು ರೈನಾ ಬಣ್ಣಿಸಿದ್ದಾರೆ.
ಐಪಿಎಲ್ ಇತಿಹಾಸದಲ್ಲಿ ರೋಹಿತ್ ಶರ್ಮಾ ಅತ್ಯಂತ ಯಶಸ್ವಿ ನಾಯಕ. 8 ವರ್ಷಗಳಲ್ಲಿ ರೋಹಿತ್ ನಾಯಕತ್ವದಲ್ಲಿ ನಾಲ್ಕು ಬಾರಿ ಮುಂಬೈ ಇಂಡಿಯನ್ಸ್ ಪ್ರಶಸ್ತಿ ಗೆದ್ದುಕೊಂಡಿದೆ. ಹಾಗೇ ಟೀಮ್ ಇಂಡಿಯಾದ ನಾಯಕ ವಿರಾಟ್ ಕೊಹ್ಲಿಗೆ ವಿಶ್ರಾಂತಿ ನೀಡಿದಾಗ ರೋಹಿತ್ ಶರ್ಮಾ ತಂಡವನ್ನು ಮುನ್ನಡೆಸಿದ್ದರು. 2018ರ ಏಷ್ಯಾಕಪ್ ಪ್ರಶಸ್ತಿಯನ್ನು ಗೆದ್ದುಕೊಂಡಿದ್ದಾರೆ. ಒಟ್ಟಾರೆ, ರೋಹಿತ್ ಶರ್ಮಾ 10 ಏಕದಿನ ಪಂದ್ಯಗಳಲ್ಲಿ ಟೀಮ್ ಇಂಡಿಯಾವನ್ನು ಮುನ್ನಡೆಸಿದ್ದು, 8ರಲ್ಲಿ ಜಯ ಸಾಧಿಸಿದೆ. ಹಾಗೇ 20 ಟಿ-ಟ್ವೆಂಟಿ ಪಂದ್ಯಗಳಲ್ಲಿ 16 ಪಂದ್ಯಗಳಲ್ಲಿ ರೋಹಿತ್ ಸಾರಥ್ಯದಲ್ಲಿ ಟೀಮ್ ಇಂಡಿಯಾ ಗೆದ್ದಿದೆ.
