ಹೊಸ ಹುದ್ದೆ, ಹೊಸ ಜವಾಬ್ದಾರಿ: ಸ್ವಿಗ್ಗಿ ನಾಯಕತ್ವ ತಂಡದಲ್ಲಿ ಮಹತ್ವದ ಬದಲಾವಣೆ!
ಬೆಂಗಳೂರು: ಆನ್ಲೈನ್ ಫುಡ್ ಡೆಲಿವರಿ ಹಾಗೂ ಕ್ವಿಕ್ ಕಾಮರ್ಸ್ ವಲಯದಲ್ಲಿ ಮುಂಚೂಣಿಯಲ್ಲಿರುವ ಸ್ವಿಗ್ಗಿ ತನ್ನ ಆಡಳಿತ ಮಂಡಳಿಯಲ್ಲಿ ಕೆಲವು ಮಹತ್ವದ ಬದಲಾವಣೆಗಳನ್ನು ಮಾಡಿದೆ. ಕಂಪನಿಯ ಫುಡ್ ಮಾರ್ಕೆಟ್ಪ್ಲೇಸ್ ಮತ್ತು ಇನ್ಸ್ಟಾಮಾರ್ಟ್ ವ್ಯವಹಾರಗಳು ಅತಿ ವೇಗವಾಗಿ ಬೆಳೆಯುತ್ತಿದ್ದು, ಈ ಬೆಳವಣಿಗೆಗೆ ಮತ್ತಷ್ಟು ವೇಗ ನೀಡಲು ಮೂವರು ಹಿರಿಯ ಅಧಿಕಾರಿಗಳಿಗೆ ಕಂಪನಿ ಉನ್ನತ ಹುದ್ದೆಗಳ ಜೊತೆಗೆ ಹೆಚ್ಚಿನ ಜವಾಬ್ದಾರಿಗಳನ್ನು ನೀಡಿದೆ.
ಹಿಮವಂತ್ ಕುರ್ನಾಲಾ, ನಿತೇಶ್ ಗರ್ಗ್ ಮತ್ತು ಸೌರವ್ ಗೋಯಲ್ ಅವರಿಗೆ ಸ್ವಿಗ್ಗಿ ಬಡ್ತಿ ನೀಡಿದ್ದು, ಹೊಸ ಜವಾಬ್ದಾರಿಗಳನ್ನು ವಹಿಸಿದೆ.
ಯಾರಿಗೆ, ಯಾವ ಹುದ್ದೆ?
ಹಿಮವಂತ್ ಕುರ್ನಾಲಾ
2024ರಿಂದಲೇ ಇನ್ಸ್ಟಾಮಾರ್ಟ್ ವಿಭಾಗದ ಮುಖ್ಯಸ್ಥರಾಗಿರುವ ಹಿಮವಂತ್ ಅವರು, ಇದೀಗ ಇನ್ಸ್ಟಾಮಾರ್ಟ್ನ ‘ಮುಖ್ಯ ಬೆಳವಣಿಗೆ ಮತ್ತು ಉತ್ಪನ್ನ ಅಧಿಕಾರಿ’ಯಾಗಿ ಬಡ್ತಿ ಪಡೆದಿದ್ದಾರೆ. ಇನ್ಸ್ಟಾಮಾರ್ಟ್ನಲ್ಲಿ ಎಐ ತಂತ್ರಜ್ಞಾನದ ಬಳಕೆ, ಹೊಸ ಆ್ಯಪ್ ವಿನ್ಯಾಸ ಮತ್ತು ಗ್ರಾಹಕರಿಗೆ ತ್ವರಿತ ಸೇವೆ ಒದಗಿಸುವಲ್ಲಿ ಇವರ ಪಾತ್ರ ದೊಡ್ಡದು. ಮುಂದಿನ ದಿನಗಳಲ್ಲಿ ಇವರು ಮಾರ್ಕೆಟಿಂಗ್, ಪ್ರಾಡಕ್ಟ್ ಮತ್ತು ಡೇಟಾ ವಿಶ್ಲೇಷಣೆ ವಿಭಾಗಗಳನ್ನು ಒಟ್ಟಾಗಿ ಮುನ್ನಡೆಸಲಿದ್ದಾರೆ.
ನಿತೇಶ್ ಗರ್ಗ್
ಕಳೆದ 7 ವರ್ಷಗಳಿಂದ ಸ್ವಿಗ್ಗಿಯೊಂದಿಗೆ ಇರುವ ನಿತೇಶ್ ಗರ್ಗ್ ಅವರನ್ನು ಇನ್ಸ್ಟಾಮಾರ್ಟ್ನ ಮುಖ್ಯ ತಂತ್ರಜ್ಞಾನ ಅಧಿಕಾರಿ (ಸಿಟಿಒ) ಆಗಿ ನೇಮಿಸಲಾಗಿದೆ. ಇನ್ಸ್ಟಾಮಾರ್ಟ್ ಆರಂಭವಾದಾಗಿನಿಂದ ಇದರ ಇಂಜಿನಿಯರಿಂಗ್ ವಿಭಾಗವನ್ನು ಮುನ್ನಡೆಸುತ್ತಿರುವ ನಿತೇಶ್, ಡಿಸ್ಕೌಂಟ್ಗಳು, ಆಫರ್ಗಳು ಮತ್ತು ಎಐ ತಂತ್ರಜ್ಞಾನದ ಸುಗಮ ಕಾರ್ಯಾಚರಣೆಯ ಹಿಂದಿನ ಮಾಸ್ಟರ್ಮೈಂಡ್ ಆಗಿದ್ದಾರೆ. ಭವಿಷ್ಯದಲ್ಲಿ ತಂತ್ರಜ್ಞಾನದ ಮೂಲಕ ವ್ಯವಹಾರವನ್ನು ಮತ್ತಷ್ಟು ಬೆಳೆಸುವುದು ಇವರ ಗುರಿಯಾಗಿದೆ.
ಸೌರವ್ ಗೋಯಲ್
2020ರಲ್ಲಿ ಸ್ವಿಗ್ಗಿಗೆ ಸೇರ್ಪಡೆಯಾದ ಸೌರವ್ ಗೋಯಲ್ ಅವರನ್ನು ಇದೀಗ ಫುಡ್ ಮಾರ್ಕೆಟ್ಪ್ಲೇಸ್ನ ಮುಖ್ಯ ಕಾರ್ಯಾಚರಣೆ ಅಧಿಕಾರಿ (ಸಿಒಒ) ಆಗಿ ನೇಮಿಸಲಾಗಿದೆ. ಇವರು ಸ್ವಿಗ್ಗಿಯ ಫುಡ್ ವಿಭಾಗದ ಆದಾಯ ಹೆಚ್ಚಿಸುವಲ್ಲಿ ಹಾಗೂ ಡೆಲಿವರಿ ಬಾಯ್ಗಳ ಕಾರ್ಯನಿರ್ವಹಣೆಯನ್ನು ಅತ್ಯುತ್ತಮವಾಗಿ ನಿರ್ವಹಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. ಇನ್ನು ಮುಂದೆ ಇವರು ಆಹಾರ ವಿಭಾಗದ ಡೆಲಿವರಿ ಮತ್ತು ಗ್ರಾಹಕರ ಸೇವೆಗಳ ಸಂಪೂರ್ಣ ಜವಾಬ್ದಾರಿಯನ್ನು ಹೊರಲಿದ್ದಾರೆ.
ಈ ನೇಮಕದ ಬಗ್ಗೆ ಮಾತನಾಡಿರುವ ಸ್ವಿಗ್ಗಿಯ ಎಚ್ಆರ್ ಮುಖ್ಯಸ್ಥ ಗಿರೀಶ್ ಮೆನನ್, “ನಮ್ಮಲ್ಲಿರುವ ಪ್ರತಿಭೆಗಳನ್ನು ಗುರುತಿಸಿ, ಅವರನ್ನು ಪ್ರೋತ್ಸಾಹಿಸಿ, ದೊಡ್ಡ ಜವಾಬ್ದಾರಿಗಳನ್ನು ನೀಡುವುದೇ ಸ್ವಿಗ್ಗಿಯ ಯಶಸ್ಸಿನ ಗುಟ್ಟಾಗಿದೆ. ಹೇಮಂತ್, ನಿತೇಶ್ ಮತ್ತು ಸೌರವ್ ಅವರು ನಮ್ಮ ಕಂಪನಿಯ ಬೆಳವಣಿಗೆಗೆ ಅಪಾರ ಕೊಡುಗೆ ನೀಡಿದ್ದಾರೆ. ಈ ಹೊಸ ಹುದ್ದೆಯು ಅವರಿಗೆ ಮತ್ತಷ್ಟು ದೊಡ್ಡ ಸವಾಲುಗಳನ್ನು ಎದುರಿಸಲು ಮತ್ತು ಸ್ವಿಗ್ಗಿಯ ಭವಿಷ್ಯವನ್ನು ರೂಪಿಸಲು ಅವಕಾಶ ಕಲ್ಪಿಸಲಿದೆ,” ಎಂದು ವಿಶ್ವಾಸ ವ್ಯಕ್ತಪಡಿಸಿದರು.
ಇತ್ತೀಚೆಗಷ್ಟೇ ನಂದಿತಾ ಸಿನ್ಹಾ ಅವರನ್ನು ಇನ್ಸ್ಟಾಮಾರ್ಟ್ನ ಸಿಇಒ ಆಗಿ ಹಾಗೂ ಸ್ವಪ್ನಿಲ್ ಬಾಜಪೇಯಿ ಅವರನ್ನು ಡೈನ್ಔಟ್ ವಿಭಾಗದ ಸಿಇಒ ಆಗಿ ಸ್ವಿಗ್ಗಿ ನೇಮಕ ಮಾಡಿತ್ತು. ಇದೀಗ ಈ ಮೂರು ಹೊಸ ನೇಮಕಾತಿಗಳ ಮೂಲಕ, ಸ್ವಿಗ್ಗಿ ತನ್ನ ನಾಯಕತ್ವವನ್ನು ಮತ್ತಷ್ಟು ಗಟ್ಟಿಗೊಳಿಸಿದೆ.
