ಭಾರತದ ತಾರಾ ಶಟ್ಲರ್ ಎಚ್.ಎಸ್.ಪ್ರಣಯ್ ಚೈನೀಸ್ ತೈಪೇ ಓಪನ್ ಟೂರ್ನಿಯಲ್ಲಿ ಕ್ವಾರ್ಟರ್ ಫೈನಲ್ ಪ್ರವೇಶಿಸಿದ್ದಾರೆ.
ಗುರುವಾರ ನಡೆದ ಪುರುಷರ ಸಿಂಗಲ್ಸ್ ವಿಭಾಗದ ಪ್ರಿ ಕ್ವಾರ್ಟರ್ ಫೈನಲ್ನಲ್ಲಿ ಪ್ರಣಯ್ ಇಂಡೋನೆಷ್ಯಾದ ಸುಗಿಯಾರ್ಟೊ ವಿರುದ್ಧ 36 ನಿಮಿಷಗಳ ಕಾಲ ಹೋರಡಿ 21-9, 21-17 ಅಂಕಗಳಿಂದ ಗೆದ್ದರು. ಪ್ರಣಯ್ ಕ್ವಾರ್ಟರ್ ಫೈನಲ್ನಲ್ಲಿ ಹಾಂಗ್ ಕಾಂಗ್ನ ಐದನೆ ಶ್ರೇಯಾಂಕಿತ ಆಟಗಾರ ಆ್ಯಂಗಸ್ ಕಾ ಲಾಂಗ್ ಅವರನ್ನು ಎದುರಿಸಲಿದ್ದಾರೆ. ಪ್ರಣಯ್ ಟೂರ್ನಿಯಲ್ಲಿ ಉಳಿದಿರುವ ಏಕೈಕ ಭಾರತೀಯ ಆಟಗಾರರಾಗಿದ್ದಾರೆ.
ಕಳೆದ ಮಲೇಷ್ಯಾ ಮಾಸ್ಟರ್ಸ್ ಗೆದ್ದ ಪ್ರಣಯ್ ಒಳ್ಳೆಯ ಲಯದಲ್ಲಿದ್ದಾರೆ.ಕಳೆದ ವಾರ ಇಂಡೋನೇಷ್ಯಾ ಓಪನ್ ಟೂರ್ನಿಯಲ್ಲೂ ಅಮೋಘ ಪ್ರದರ್ಶನ ನೀಡಿದ್ದಾರೆ. ಸೆಮಿಫೈನಲ್ನಲ್ಲಿ ಡೆನ್ಮಾರ್ಕ್ನ ವಿಕ್ಟೋರ್ ಆ್ಯಕ್ಸಲೆಸನ್ ವಿರುದ್ಧ ಸೋತಿದ್ದರು.
ಮಾಜಿ ಕಾಮನ್ವೆಲ್ತ್ ಪದಕ ವಿಜೇತ ಪಾರುಪಲ್ಲಿ ಕಶ್ಯಪ್ ಇಲ್ಲಿನ ಸ್ಥಳೀಯ ಆಟಗರ ಸು ಲಿ ಯಾಂಗ್ ವಿರುದ್ಧ 16-21, 17-21 ಅಂಕಗಳಿಂದ ಸೋತರು. ಮಿಶ್ರ ಡಬಲ್ಸ್ನಲ್ಲಿ ಸಿಕ್ಕಿ ರೆಡ್ಡಿ ಮತ್ತು ರೋಹನ್ ಕಪೂರ್ ಸೋತು ಟೂರ್ನಿಯಿಂದ ಹೊರಬಿದ್ದಿದ್ದಾರೆ. ತೈಪೇ ಜೋಡಿ ಚಿಯು ಹ್ಸಿಸಿಯಾಂಗ್ ಹಾಗೂ ಲಿನ್ ವಿರುದ್ಧ 13-21, 18-21 ಅಂಕಗಳಿಂದ ಸೋತಿತ್ತು. ಮಹಿಳಾ ಸಿಂಗಲ್ಸ್ನಲ್ಲಿ ತಾಯಿ ತ್ಜು ಯಿಂಗ್ ವಿರುದ್ಧ ತನ್ಯಕಾಮತ್ 11-21, 6-21 ಅಂಕಗಳಿಂದ ಮಣಿದರು.
