Uttar pradesh : ಪ್ರಿಯಕರನ ಸಹಾಯದಿಂದ ಹೆತ್ತ ಮಕ್ಕಳನ್ನ ಕೊಂದ ತಾಯಿ….
ಹೆತ್ತ ತಾಯಿಯೊಬ್ಬಳು ಪ್ರಿಯಕರನ ಜೊತೆ ಸೇರಿ 10 ವರ್ಷದ ಮಗ ಮತ್ತು 6 ವರ್ಷದ ಮಗಳನ್ನು ಕೊಲೆ ಮಾಡಿರುವ ಆಘಾತಕಾರಿ ಘಟನೆ ಉತ್ತರ ಪ್ರದೇಶದ ಮೀರತ್ ನಲ್ಲಿ ನಡೆದಿದೆ.
ಉತ್ತರ ಪ್ರದೇಶ ಪೊಲೀಸರ ಪ್ರಕಾರ ಮಾರ್ಚ್ 22 ರಂದು ಘಟನೆ ಸಂಭವಿಸಿದೆ. ಮಕ್ಕಳನ್ನು ಕೊಂದ ನಂತರ ಅವರ ದೇಹಗಳನ್ನ ಕಾಲುವೆಗೆ ಎಸೆಯಲಾಗಿದೆ. ಮಹಿಳೆಯ ಪ್ರೇಮಿ ಸ್ಥಳೀಯ ಕೌನ್ಸಿಲರ್ ಆಗಿರುವುದು ಗಮನಾರ್ಹ. ಈ ಪ್ರಕರಣದಲ್ಲಿ ಮಹಿಳೆಯ ಕೆಲ ನೆರೆಹೊರೆಯವರೂ ಭಾಗಿಯಾಗಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸರು ಆರು ಮಂದಿಯನ್ನು ಬಂಧಿಸಿದ್ದಾರೆ.
ಆದರೆ, ಮಕ್ಕಳ ಮೃತದೇಹ ಇನ್ನೂ ಪತ್ತೆಯಾಗಿಲ್ಲ. “ಮಾರ್ಚ್ 22 ರಂದು, ಇಬ್ಬರೂ ಮಕ್ಕಳನ್ನ ಕೊಲೆ ಮಾಡಿ ತಾಯಿ ಮತ್ತು ಕೌನ್ಸಿಲರ್ ಪ್ರೇಮಿ ಸೇರಿಕೊಂಡು ಸೌದ್ ಕಾಲುವೆಗೆ ಎಸೆದಿದ್ದಾರೆ. ಮಕ್ಕಳು ನಾಪತ್ತೆಯಾದಾಗ ನೆರೆಹೊರೆಯವರು ಪ್ರಕರಣವನ್ನ ದಾಖಲಿಸಿದ್ದಾರೆ. ಪೊಲೀಸರು ತನಿಖೆ ಚುರುಕುಗೊಳಿಸಿದಾಗ ಸಂಚು ಬಹಿರಂಗಗೊಂಡಿದೆ ಎಂದು ಪೊಲೀಸ್ ಸೂಪರಿಂಟೆಂಡೆಂಟ್ (ನಗರ) ಪಿಯೂಷ್ ಸಿಂಗ್ ಹೇಳಿದ್ದಾರೆ.
“ಕೊಲೆಯಲ್ಲಿ ಮೂವರು ಮಹಿಳೆಯರು ಮತ್ತು ಮೂವರು ಪುರುಷರು ಭಾಗಿಯಾಗಿದ್ದಾರೆ. ಹುಡುಗಿಯನ್ನ ಆಕೆಯ ಸ್ವಂತ ಮನೆಯಲ್ಲಿ ಮತ್ತು ಹುಡುಗನನ್ನ ನೆರೆಯ ಮನೆಯಲ್ಲಿ ಕೊಲ್ಲಲಾಗಿದೆ. ಮಕ್ಕಳ ಶವಗಳು ಇನ್ನೂ ಪತ್ತೆಯಾಗಿಲ್ಲ. ಎಲ್ಲಾ ಆರೋಪಿಗಳನ್ನು ಬಂಧಿಸಲಾಗಿದೆ.” ಎಸ್ಪಿ ತಿಳಿಸಿದ್ದು, ಪ್ರಕರಣದ ಹೆಚ್ಚಿನ ತನಿಖೆ ನಡೆಯುತ್ತಿದೆ.
Uttar pradesh : Mother who killed her children with the help of lover…