IPL Playoffs | ಸನ್ ರೈಸರ್ಸ್ ದಾಖಲೆ ಮುರಿಯುತ್ತಾ ಆರ್ ಸಿಬಿ
ಇತರೆ ತಂಡಗಳ ಜಯಾಪಜಯಗಳ ಆಧಾರದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಅತೀ ಕಷ್ಟದ ಸ್ಥಿತಿಯಲ್ಲಿ ಈ ಆವೃತ್ತಿಯ ಇಂಡಿಯನ್ ಪ್ರಿಮಿಯರ್ ಲೀಗ್ ನ ಅಂತಿಮ ನಾಲ್ಕರ ಘಟ್ಟ ಪ್ರವೇಶ ಪಡೆದಿದೆ.
ಇದರೊಂದಿಗೆ ಆರ್ ಸಿಬಿ ತಂಡ ಇಂಡಿಯನ್ ಪ್ರಿಮಿಯರ್ ಲೀಗ್ ಇತಿಹಾಸದಲ್ಲಿ ಒಂದು ಅಪರೂಪದ ಸಾಧನೆ ಮಾಡಿದೆ.
ಕ್ಯಾಶ್ ರಿಚ್ ಲೀಗ್ ನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ಮತ್ತು ಮುಂಬೈ ಇಂಡಿಯನ್ಸ್ ತಂಡಗಳ ಬಳಿಕ ಅತಿ ಹೆಚ್ಚು ಬಾರಿ ಪ್ಲೇ ಆಫ್ಸ್ ಪ್ರವೇಶಿಸಿದ ತಂಡ ಎಂಬ ಹೆಗ್ಗಳಿಕೆಗೆ ಆರ್ ಸಿಬಿ ಭಾಜನವಾಗಿದೆ.
ಚೆನ್ನೈ ಸೂಪರ್ ಕಿಂಗ್ಸ್ 11 ಬಾರಿ, ಮುಂಬೈ ಇಂಡಿಯನ್ಸ್ ತಂಡ 9 ಬಾರಿ ಐಪಿಎಲ್ ನ ಪ್ಲೇ ಆಫ್ಸ್ ಪ್ರವೇಶಿಸಿವೆ.
ಚೆನ್ನೈ ಸೂಪರ್ ಕಿಂಗ್ಸ್ ತಂಡ 2008 ರಿಂದ 2015 ರವರೆಗೆ ಸತತ 8 ಸೀಸನ್ ಗಳಲ್ಲಿ ಪ್ಲೇ-ಆಫ್ ಗಳಿಗೆ ಅರ್ಹತೆ ಗಳಿಸಿತ್ತು. ನಂತರ 2018, 2019 ಮತ್ತು 2021 ಸೀಸನ್ ಗಳಲ್ಲಿ ಅಂತಿಮ ನಾಲ್ಕರ ಘಟ್ಟ ತಲುಪಿತ್ತು.
ಮುಂಬೈ ಇಂಡಿಯನ್ಸ್ ತಂಡವು 2010-2015 ರಿಂದ ಸತತ ಆರು ಸೀಸನ್ ಗಳಲ್ಲಿ ಪ್ಲೇ-ಆಫ್ಸ್ ತಲುಪಿತ್ತು. ನಂತರ 2017, 2018 ಮತ್ತು 2021 ರ ಋತುವಿನಲ್ಲಿ ಮುಂಬೈ ಪ್ಲೆ ಆಫ್ಸ್ ಪ್ರವೇಶ ಪಡೆದಿತ್ತು.
ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ 2009 ರಿಂದ 2011 ರವರೆಗೆ ಸತತ 3 ಸೀಸನ್ಗಳು, ನಂತರ 2015, 2016 ಸೀಸನ್ಗಳು, ಮತ್ತು ಮತ್ತೆ 2020 ರಿಂದ 2022ರವೆಗೆ ಸತತ ಮೂರು ಸೀಸನ್ ಗಳಲ್ಲಿ ಪ್ಲೇಆಫ್ ತಲುಪಿದೆ.
ಇಂಡಿಯನ್ ಪ್ರಿಮಿಯರ್ ಲೀಗ್ 15 ನೇ ಸೀಸನ್ ನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ನಾಲ್ಕನೇ ತಂಡವಾಗಿ ಪ್ಲೆ ಆಫ್ಸ್ ಗೆ ಎಂಟ್ರಿ ಪಡೆದಿದೆ.
ಗುಜರಾತ್ ಟೈಟಾನ್ಸ್, ರಾಜಸ್ಥಾನ್ ರಾಯಲ್ಸ್ ತಂಡಗಳು ಮೊದಲೆರಡು ಸ್ಥಾನದಲ್ಲಿದ್ದರೇ, ಲಕ್ನೋ ಸೂಪರ್ ಜೈಂಟ್ಸ್ ತಂಡಗಳು ಮೂರನೇ ಸ್ಥಾನದಲ್ಲಿ, ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ನಾಲ್ಕನೇ ಸ್ಥಾನದಲ್ಲಿದೆ.
ಹೀಗಾಗಿ ಆರ್ ಸಿಬಿ ತಂಡ ತನ್ನ ಎಲಿಮಿನೇಟರ್ ಪಂದ್ಯದಲ್ಲಿ ಕೆ.ಎಲ್.ರಾಹುಲ್ ನಾಯಕತ್ವದ ಲಕ್ನೋ ಸೂಪರ್ ಜೈಂಟ್ಸ್ ವಿರುದ್ಧ ಸೆಣಸಲಿದೆ.
ಈ ಪಂದ್ಯದಲ್ಲಿ ಗೆದ್ದರೆ ಎರಡನೇ ಕ್ವಾಲಿಫೈಯರ್ಗೆ ಮುನ್ನಡೆಯಲಿದ್ದು, ಅಂತಿಮವಾಗಿ ಫೈನಲ್ಗೆ ಪ್ರವೇಶಿಸಲಿದೆ.
ಈ ಪಂದ್ಯದಲ್ಲಿ ಗೆಲುವು ಸಾಧಿಸಿದ್ರೆ ಕ್ವಾಲಿಫೈಯರ್ ಪಂದ್ಯಕ್ಕೆ ಎಂಟ್ರಿ ಪಡೆಯಲಿದೆ. ಇಲ್ಲಿ ಬೆಂಗಳೂರು ತಂಡ ಕ್ವಾಲಿಫೈಯರ್ ಒಂದರಲ್ಲಿ ಸೋತ ತಂಡದ ವಿರುದ್ಧ ಸೆಣಸಲಿದೆ. ಇಲ್ಲಿ ಗೆದ್ದರೇ ಆರ್ ಸಿಬಿ ಫೈನಲ್ ಪ್ರವೇಶಿಸಲಿದೆ.
ಆದರೆ, ಲೀಗ್ ಇತಿಹಾಸದಲ್ಲಿ ಎಲಿಮಿನೇಟರ್ ಪಂದ್ಯ ಆಡಿದ ತಂಡಗಳು ಒಮ್ಮೆ ಮಾತ್ರ ಪ್ರಶಸ್ತಿ ಗೆದ್ದಿವೆ.
2016ರ ಸೀಸನ್ ನಲ್ಲಿ ಲೀಗ್ ಹಂತದಲ್ಲಿ ಮೂರನೇ ಸ್ಥಾನ ಪಡೆದಿದ್ದ ಸನ್ ರೈಸರ್ಸ್ ಎಲಿಮಿನೇಟರ್ ನಲ್ಲಿ ಕೆಕೆಆರ್ ಹಾಗೂ ಎರಡನೇ ಕ್ವಾಲಿಫೈಯರ್ ನಲ್ಲಿ ಗುಜರಾತ್ ಲಯನ್ಸ್ ತಂಡವನ್ನು ಸೋಲಿಸಿ ಫೈನಲ್ ತಲುಪಿತ್ತು. ನಂತರ ಫೈನಲ್ನಲ್ಲಿ ಆರ್ಸಿಬಿಯನ್ನು ಸೋಲಿಸಿ ಪ್ರಶಸ್ತಿ ಗೆದ್ದುಕೊಂಡಿತ್ತು.
ಸನ್ರೈಸರ್ಸ್ ಹೊರತುಪಡಿಸಿ, ಐಪಿಎಲ್ನಲ್ಲಿ ಎಲಿಮಿನೇಟರ್ ಪಂದ್ಯಗಳನ್ನು ಆಡಿದ ಇತರ ಎಲ್ಲಾ ತಂಡಗಳು ರನ್ನರ್ ಅಪ್ ಅಥವಾ ಮೂರ್ನಾಲ್ಕು ಸ್ಥಾನಗಳಲ್ಲಿ ಟೂರ್ನಿಯನ್ನ ಮುಕ್ತಾಯಗೊಳಿಸಿವೆ.
ಆದರೆ ಇದೀಗ ಆರ್ಸಿಬಿ ಈ ದಾಖಲೆಯನ್ನು ಮತ್ತೆ ಬರೆಯಲು ಸಜ್ಜಾಗಿದೆ. 8ನೇ ಬಾರಿಗೆ ಪ್ಲೇಆಫ್ ನಲ್ಲಿ ಆಡಲಿರುವ ಆರ್ಸಿಬಿ 2009, 2011 ಮತ್ತು 2016 ರ ಸೀಸನ್ಗಳಲ್ಲಿ ಫೈನಲ್ ತಲುಪಿತ್ತು.
ಆದರೆ ಡೆಕ್ಕನ್ ಚಾರ್ಜರ್ಸ್, ಚೆನ್ನೈ ಸೂಪರ್ ಕಿಂಗ್ಸ್ ಮತ್ತು ಸನ್ರೈಸರ್ಸ್ ಹೈದರಾಬಾದ್ ವಿರುದ್ಧ ಸೋಲು ಕಂಡಿತ್ತು.