ಬರಗಾಲದ ತೀವ್ರತೆ ಅರ್ಥ ಮಾಡಿಕೊಳ್ಳಲು ಕರ್ನಾಟಕಕ್ಕೆ ಭೇಟಿ ನೀಡಿ, ರೈತರಿಗೆ ಹೆಚ್ಚಿನ ಪರಿಹಾರ ಕೊಡಿಸಿ ಎಂದು ಕಾಂಗ್ರೆಸ್ ನಾಯಕ ರಾಹುಲ್‌ ಗಾಂಧಿಗೆ ಪ್ರತಿಪಕ್ಷ ನಾಯಕ ಆರ್‌.ಅಶೋಕ ಆಗ್ರಹ
ಹಿಂದೆ ಬಿಜೆಪಿ ಸರ್ಕಾರ ನೀಡಿದ್ದಂತೆ ಪರಿಹಾರ ವಿತರಿಸಲು ನಿಮ್ಮ ಶಿವಕುಮಾರ್ ಸರ್ಕಾರಕ್ಕೆ ಏನು ಸಮಸ್ಯೆ ಎಂದು ಪ್ರಶ್ನೆ
ಸಮರೋಪದಿಯಲ್ಲಿ ಪರಿಹಾರ ಕಾರ್ಯ ಕೈಗೊಳ್ಳಲು ಸೂಚಿಸಿ ಎಂದು ಒತ್ತಾಯಿಸಿ ಪತ್ರ ಬರೆದ ಆರ್‌.ಅಶೋಕ
ಬೆಂಗಳೂರು, ಅಕ್ಟೋಬರ್‌ 14
ಬರಪೀಡಿತ ಪ್ರದೇಶಗಳಿಗೆ ಮುಖ್ಯಮಂತ್ರಿ ಹಾಗೂ ಸಚಿವರು ಭೇಟಿ ನೀಡಿ ಬರಗಾಲದ ಭೀಕರತೆಯನ್ನು ಅರ್ಥ ಮಾಡಿಕೊಂಡು ರೈತರಿಗೆ ತಕ್ಷಣ ಹೆಚ್ಚಿನ ಪರಿಹಾರ ಕೊಡಬೇಕು, ಇದಕ್ಕಾಗಿ ರಾಜ್ಯಕ್ಕೆ ಭೇಟಿ ನೀಡಿ ಎಂದು ಕಾಂಗ್ರೆಸ್ ನಾಯಕ ಹಾಗೂ ಲೋಕಸಭೆಯ ವಿರೋಧ ಪಕ್ಷದ ನಾಯಕ ರಾಹುಲ್‌ ಗಾಂಧಿ ಅವರಿಗೆ ಪ್ರತಿಪಕ್ಷ ನಾಯಕ ಆರ್‌.ಅಶೋಕ ಆಗ್ರಹಿಸಿದ್ದಾರೆ.
ಈ ಕುರಿತು ರಾಹುಲ್‌ ಗಾಂಧಿ ಅವರಿಗೆ ಪತ್ರ ಬರೆದಿರುವ ಅವರು, ನಾಲ್ಕು ತಿಂಗಳು ಕಳೆದರೂ ರೈತರಿಗೆ ನಯಾಪೈಸೆ ಪರಿಹಾರ ನೀಡಿಲ್ಲ ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಕರ್ನಾಟಕವು ಇತ್ತೀಚಿನ ವರ್ಷಗಳಲ್ಲೇ ಅತ್ಯಂತ ತೀವ್ರವಾದ ಬರ ಪರಿಸ್ಥಿತಿಗೆ ಸಿಲುಕಿದೆ. ನೈಋತ್ಯ ಮುಂಗಾರು ಮಳೆಯಲ್ಲಿ ಶೇ.35 ರಷ್ಟು ಕೊರತೆ ಉಂಟಾಗಿದೆ. 1971 ರಿಂದ ಇತ್ತೀಚಿನವರೆಗೆ ಇದು ರಾಜ್ಯದಲ್ಲಿ ದಾಖಲಾದ ಅತ್ಯಂತ ಕೆಟ್ಟ ಪರಿಸ್ಥಿತಿ. ರಾಜ್ಯ ಸರ್ಕಾರದಿಂದ 217 ತಾಲ್ಲೂಕುಗಳನ್ನು ಬರಪೀಡಿತ ಎಂದು ಘೋಷಿಸಲಾಗಿದೆ. ಸುಮಾರು 47.09 ಲಕ್ಷ ಹೆಕ್ಟೇರ್ ಪ್ರದೇಶದಲ್ಲಿ ಅಂದಾಜು ₹46,324.50 ಕೋಟಿ ನಷ್ಟವಾಗಿದೆ. ಈ ಅಂಕಿ ಅಂಶಗಳು ಲಕ್ಷಾಂತರ ರೈತ ಕುಟುಂಬಗಳ ಜೀವನೋಪಾಯ, ಆರ್ಥಿಕ ಭದ್ರತೆ ಮತ್ತು ಭವಿಷ್ಯದ ಮೇಲಿನ ಭೀಕರತೆಯನ್ನು ತಿಳಿಸುತ್ತದೆ. ಇಂತಹ ನಿರ್ಣಾಯಕ ಸಂದರ್ಭದಲ್ಲಿ ಸಂಕಷ್ಟಕ್ಕೆ ಸಿಲುಕಿರುವ ರೈತರಿಗೆ ಸಕಾಲದಲ್ಲಿ, ಸಮರ್ಪಕವಾಗಿ ಮತ್ತು ಅರ್ಥಪೂರ್ಣವಾಗಿ ಪರಿಹಾರ ಒದಗಿಸುವುದು ರಾಜ್ಯ ಸರ್ಕಾರದ ಪ್ರಮುಖ ಜವಾಬ್ದಾರಿ. ಆದರೆ, ಕಾಂಗ್ರೆಸ್ ಸರ್ಕಾರದ ನಡೆ ಮತ್ತು ಕ್ರಮಗಳನ್ನು ನೋಡಿದರೆ, ರೈತರ ಬಗ್ಗೆ ಸರ್ಕಾರಕ್ಕೆ ನಿಜವಾದ ಬದ್ಧತೆ ಇದೆಯೇ ಹಾಗೂ ಕೈಗೊಂಡ ನಿರ್ಧಾರಗಳಿಗೆ ಹೊಣೆಗಾರಿಕೆ ಇದೆಯೇ ಎಂದು ಅನುಮಾನ ಮೂಡುತ್ತದೆ. ರಾಜ್ಯ ಸರ್ಕಾರ ಪ್ರತಿ ರೈತನಿಗೆ ಕೇವಲ ₹2,500 ಇನ್‌ಪುಟ್ ಸಬ್ಸಿಡಿ ಘೋಷಿಸಿದೆ. ಇದು ಕನಿಷ್ಠ ಭೂಮಿ ಹದ ಮಾಡುವ ವೆಚ್ಚಕ್ಕೂ ಸಾಲುವುದಿಲ್ಲ.
ಬೆಳೆ ನಷ್ಟದ ಪ್ರಮಾಣ, ಹೆಚ್ಚುತ್ತಿರುವ ಕೃಷಿ ಸಾಲಗಳು ಮತ್ತು ಕೃಷಿ ವೆಚ್ಚಗಳ ಏರಿಕೆಯನ್ನು ಗಮನಿಸಿದರೆ, ಈ ಮೊತ್ತ ಸೂಕ್ತವಲ್ಲ. ಇಡೀ ಕೃಷಿ ಋತುವಿನ ಆದಾಯವನ್ನೇ ಕಳೆದುಕೊಂಡಿರುವ ರೈತರಿಗೆ ಇಷ್ಟು ಅಲ್ಪ ಮೊತ್ತದಿಂದ ಯಾವುದೇ ಪರಿಹಾರ ದೊರೆಯುವುದಿಲ್ಲ. ಕಷ್ಟಪಟ್ಟು ದುಡಿಯುವ ಅನ್ನದಾತರಿಗೆ ಇದು ದೊಡ್ಡ ಅನ್ಯಾಯ. ಕೇವಲ ಹೆಸರಿಗಷ್ಟೇ ಅಲ್ಲದೆ, ನೈಜ ಮತ್ತು ಪರಿಣಾಮಕಾರಿ ಬೆಂಬಲದ ಅಗತ್ಯವಿದೆ ಎಂದು ಅವರು ಹೇಳಿದ್ದಾರೆ.
ಹಿಂದೆ ನಮ್ಮ ಬಿಜೆಪಿ ಸರ್ಕಾರದ ಅವಧಿಯಲ್ಲಿ ಬರ ಪರಿಸ್ಥಿತಿ ಸಂದರ್ಭದಲ್ಲಿ ಹೆಚ್ಚಿನ ನೆರವನ್ನು ನೀಡಲಾಗಿತ್ತು. 2019–20ರಿಂದ 2022–23ರ ಅವಧಿಯಲ್ಲಿ, ಆಗಿನ ಬಿಜೆಪಿ ನೇತೃತ್ವದ ಸರ್ಕಾರವು ಒಟ್ಟು 57.43 ಲಕ್ಷ ಹೆಕ್ಟೇರ್ ಬೆಳೆ ನಷ್ಟಕ್ಕೆ, 51.90 ಲಕ್ಷ ರೈತರಿಗೆ ₹6,651.15 ಕೋಟಿ ಇನ್‌ಪುಟ್ ಸಬ್ಸಿಡಿ ನೀಡಿತ್ತು. 2019 ರಲ್ಲಿ 9,72,517 ಹೆಕ್ಟೇರ್‌ನಲ್ಲಿ ಬೆಳೆ ನಷ್ಟವಾಗಿದ್ದು, 6,71,314 ರೈತರಿಗೆ ₹1,232.20 ಕೋಟಿ ನೀಡಲಾಗಿತ್ತು. 2020 ರಲ್ಲಿ 19,68,247 ಹೆಕ್ಟೇರ್‌ನಲ್ಲಿ ಬೆಳೆ ನಷ್ಟವಾಗಿದ್ದು, 12,00,346 ರೈತರಿಗೆ ₹941.70 ಕೋಟಿ ನೀಡಲಾಗಿತ್ತು. 2021 ರಲ್ಲಿ 14,93,811 ಹೆಕ್ಟೇರ್‌ನಲ್ಲಿ ಬೆಳೆ ನಷ್ಟವಾಗಿದ್ದು, 18,56,083 ರೈತರಿಗೆ ₹2,446.10 ಕೋಟಿ ನೀಡಲಾಗಿತ್ತು. 2022 ರಲ್ಲಿ 13,09,421 ಹೆಕ್ಟೇರ್‌ನಲ್ಲಿ ಬೆಳೆ ನಷ್ಟವಾಗಿದ್ದು, 14,62,841 ರೈತರಿಗೆ ₹2,031.15 ಕೋಟಿ ನೀಡಲಾಗಿತ್ತು. ಒಟ್ಟು 57.43 ಲಕ್ಷ ಹೆಕ್ಟೇರ್‌ನಲ್ಲಿ ಬೆಳೆ ನಷ್ಟವಾಗಿದ್ದು, 51.90 ಲಕ್ಷ ರೈತರಿಗೆ ₹6,651.15 ಕೋಟಿ ನೀಡಲಾಗಿತ್ತು. ಆ ಅವಧಿಯಲ್ಲಿ ಜಾರಿಯಲ್ಲಿದ್ದ ಪರಿಹಾರದ ದರಗಳೂ ಸಹ, ಕಾಂಗ್ರೆಸ್ ರಾಜ್ಯ ಸರ್ಕಾರ ಈಗ ಘೋಷಿಸಿರುವ ₹2,500 ಕ್ಕಿಂತ ಗಣನೀಯವಾಗಿ ಹೆಚ್ಚಾಗಿದ್ದವು. ಮಳೆಯಾಶ್ರಿತ ಬೆಳೆಗಳಿಗೆ ಪ್ರತಿ ಹೆಕ್ಟೇರ್‌ಗೆ ₹13,600 (SDRF/NDRF ನಿಧಿಗಳಿಂದ ₹8,500 + ರಾಜ್ಯ ಸರ್ಕಾರದ ಪಾಲು ₹5,100), ನೀರಾವರಿ ಬೆಳೆಗಳಿಗೆ ಪ್ರತಿ ಹೆಕ್ಟೇರ್‌ಗೆ ₹25,000 (SDRF/NDRF ನಿಧಿಗಳಿಂದ ₹17,000 + ರಾಜ್ಯ ಸರ್ಕಾರದ ಪಾಲು ₹8,000), ಬಹುವಾರ್ಷಿಕ ಬೆಳೆಗಳಿಗೆ ಪ್ರತಿ ಹೆಕ್ಟೇರ್‌ಗೆ ₹28,000 (SDRF/NDRF ನಿಧಿಗಳಿಂದ ₹22,500 + ರಾಜ್ಯ ಸರ್ಕಾರದ ಪಾಲು ₹4,500) ನೀಡಲಾಗಿತ್ತು ಎಂದು ಪತ್ರದಲ್ಲಿ ವಿವರಿಸಿದ್ದಾರೆ.
ಇವು ರಾಜಕೀಯ ಆರೋಪಗಳಲ್ಲ. ಸರ್ಕಾರದ ದಾಖಲೆಗಳಲ್ಲೇ ಈ ಅಂಕಿ ಅಂಶ ಇದೆ. 2022 ರಲ್ಲಿ 13.09 ಲಕ್ಷ ಹೆಕ್ಟೇರ್ ಪ್ರದೇಶದಲ್ಲಿ ಬೆಳೆ ನಷ್ಟ ಉಂಟಾಗಿ, 14.62 ಲಕ್ಷ ರೈತರಿಗೆ ಬಿಜೆಪಿ ಸರ್ಕಾರದಿಂದ ₹2,031.15 ಕೋಟಿ ಇನ್‌ಪುಟ್ ಸಬ್ಸಿಡಿ ನೀಡಲಾಗಿತ್ತು. ಹೀಗಾಗಿ ಹಿಂದಿನ ಬರ ಪರಿಸ್ಥಿತಿಗಳಲ್ಲಿ ರಾಜ್ಯ ಸರ್ಕಾರವು ಗಣನೀಯ ಪ್ರಮಾಣದ ಪರಿಹಾರ ನೀಡಲು ಸಾಧ್ಯವಾಗಿರುವಾಗ, ಈಗ ಬರ ತೀವ್ರತೆ ಇಷ್ಟಿದ್ದರೂ ಪ್ರತಿ ರೈತನಿಗೆ ಕೇವಲ ₹2,500ಕ್ಕೆ ನೆರವನ್ನು ಏಕೆ ನೀಡಲಾಗುತ್ತಿದೆ? ಕರ್ನಾಟಕದ ರೈತರ ವಿಚಾರದಲ್ಲಿ ಹಿಂದಿನ ಸರ್ಕಾರಗಳಂತೆಯೇ ಬದ್ಧತೆಯನ್ನು ಪ್ರದರ್ಶಿಸಲು ಕಾಂಗ್ರೆಸ್ ಸರ್ಕಾರ ಏಕೆ ವಿಫಲವಾಗಿದೆ ಎಂಬುದನ್ನು ಸ್ಪಷ್ಟಪಡಿಸಬೇಕು.
ಬರದಿಂದ ಉಂಟಾಗಿರುವ ಆರ್ಥಿಕ ಹೊರೆಯನ್ನು ಈಗಾಗಲೇ ತಮ್ಮ ಬೆಳೆ, ಆದಾಯ ಮತ್ತು ಹೂಡಿಕೆಗಳನ್ನು ಕಳೆದುಕೊಂಡಿರುವ ರೈತರ ಮೇಲೆ ಹೊರಿಸಲು ಸಾಧ್ಯವಿಲ್ಲ. ಬರಪೀಡಿತ ತಾಲ್ಲೂಕುಗಳನ್ನು ಗುರುತಿಸುವಲ್ಲಿ ಮತ್ತು ಅವುಗಳನ್ನು ಬರಪೀಡಿತ ಎಂದು ಘೋಷಿಸುವಲ್ಲಿ ವಿಳಂಬ ಮಾಡಿರುವುದು ಮತ್ತೊಂದು ಆತಂಕದ ಸಂಗತಿ. ರೈತರು ಆಡಳಿತಾತ್ಮಕ ವೇಳಾಪಟ್ಟಿಗೆ ಅನುಗುಣವಾಗಿ ಬರವನ್ನು ಎದುರಿಸುವುದಿಲ್ಲ. ಮಳೆಯಿಲ್ಲದಾದಾಗ ಅವರ ಬೆಳೆಗಳು ಒಣಗುತ್ತವೆ. ಸಾಲಗಳು, ಕೃಷಿ ವೆಚ್ಚಗಳು ಮತ್ತು ಕುಟುಂಬದ ಖರ್ಚುಗಳು ಸರ್ಕಾರದ ಅಧಿಸೂಚನೆಗಾಗಿ ಕಾಯುವುದಿಲ್ಲ. ನಿರ್ಧಾರ ತೆಗೆದುಕೊಳ್ಳುವಲ್ಲಿ ಪ್ರತಿಯೊಂದು ದಿನದ ವಿಳಂಬವೂ ಅವರ ಸಂಕಷ್ಟವನ್ನು ಹೆಚ್ಚಿಸಬಹುದು ಮತ್ತು ದುರ್ಬಲ ರೈತ ಕುಟುಂಬಗಳನ್ನು ಮತ್ತಷ್ಟು ಆರ್ಥಿಕ ಅನಿಶ್ಚಿತತೆಗೆ ತಳ್ಳಬಹುದು ಎಂದು ಅವರು ಪ್ರತಿಪಾದಿಸಿದ್ದಾರೆ.
ಬರಪೀಡಿತ ಪ್ರದೇಶಗಳನ್ನು ಘೋಷಿಸುವಲ್ಲಿ ವಿಳಂಬವಾಗಿದೆ. ಕಾಂಗ್ರೆಸ್ ಪಕ್ಷದೊಳಗೂ ಈ ಬಗ್ಗೆ ಅಸಮಾಧಾನ ವ್ಯಕ್ತವಾಗಿದೆ. ತಮ್ಮ ಕ್ಷೇತ್ರಗಳನ್ನು ಬರಪೀಡಿತ ಎಂದು ಘೋಷಿಸುವಲ್ಲಿ ಆಗುತ್ತಿರುವ ವಿಳಂಬದ ಕುರಿತು ಕಾಂಗ್ರೆಸ್ ಶಾಸಕರು ಬಹಿರಂಗವಾಗಿಯೇ ಕಳವಳ ವ್ಯಕ್ತಪಡಿಸಿದ್ದಾರೆ. ಇಂತಹ ವಿಳಂಬಗಳು ಸರ್ಕಾರದ ಸಿದ್ಧತೆ, ಆಡಳಿತಾತ್ಮಕ ಸ್ಪಂದನೆ ಮತ್ತು ಸಂಕಷ್ಟದ ಸಮಯದಲ್ಲಿ ರೈತರನ್ನು ರಕ್ಷಿಸುವ ಬದ್ಧತೆಯ ಕುರಿತು ಪ್ರಶ್ನೆಗಳನ್ನು ಹುಟ್ಟುಹಾಕುತ್ತವೆ. ರೈತರ ಪರ ನಿಲ್ಲುತ್ತೇವೆ ಎಂದು ಹೇಳುವ ಸರ್ಕಾರ, ರೈತರು ಸಂಕಷ್ಟದಲ್ಲಿರುವಾಗ ತಕ್ಷಣ ಸ್ಪಂದಿಸುವ ಮತ್ತು ಅಗತ್ಯ ನೆರವಿನ ಮೂಲಕ ತನ್ನ ಬದ್ಧತೆಯನ್ನು ಸಾಬೀತುಪಡಿಸಬೇಕು. ಆದರೆ, ಬಿಕ್ಕಟ್ಟಿನ ಗಂಭೀರತೆ ಗೊತ್ತಿದ್ದರೂ ಸರ್ಕಾರ ಬಹಳ ತಡವಾಗಿ ನಿರ್ಧಾರಗಳನ್ನು ತೆಗೆದುಕೊಳ್ಳುತ್ತಿದೆ, ಬರ ಘೋಷಣೆ ವಿಷಯದಲ್ಲಿ ವಿಳಂಬ ಮಾಡಿರುವುದೇ ಇದಕ್ಕೆ ನಿದರ್ಶನ ಎಂದು ಪತ್ರದಲ್ಲಿ ವಿವರಿಸಿದ್ದಾರೆ.
ಪರಿಹಾರಕ್ಕೆ ಸಂಬಂಧಿಸಿದಂತೆ ಘೋಷಣೆ ಮಾತ್ರ ಸಾಕಾಗುವುದಿಲ್ಲ. ನೆರವು ಅಸಮರ್ಪಕವಾಗಿದ್ದರೆ, ಬರ ಪ್ರದೇಶಗಳನ್ನು ತಡವಾಗಿ ಗುರುತಿಸಿದರೆ ಮತ್ತು ರೈತರು ತಮ್ಮ ಮೂಲಭೂತ ಅಗತ್ಯಗಳನ್ನು ಪೂರೈಸಲು ಪರದಾಡುವಂತಾದರೆ, ಇಂತಹ ಘೋಷಣೆಗಳಿಗೆ ಯಾವುದೇ ಅರ್ಥವಿರುವುದಿಲ್ಲ.
ರೈತರು ಕೇವಲ ಘೋಷಣೆಗಳ ಆಧಾರದ ಮೇಲೆ ಬದುಕಲು ಸಾಧ್ಯವಿಲ್ಲ. ಅವರಿಗೆ ಸಮರ್ಪಕ ಪರಿಹಾರ, ಸಕಾಲದಲ್ಲಿ ಹಣದ ವಿತರಣೆ ಆಗಬೇಕು ಈ ವಿಷಯದಲ್ಲಿ ರಾಜ್ಯದ ಕಾಂಗ್ರೆಸ್ ಸರ್ಕಾರ ಹೊಣೆಗಾರಿಕೆ ಯಿಂದ ಕೆಲಸ ಮಾಡಿಲ್ಲ ಎಂದು ವಿವರಿಸಿದ್ದಾರೆ.
ಕರ್ನಾಟಕ ವಿಧಾನಸಭೆಯ ವಿರೋಧ ಪಕ್ಷದ ನಾಯಕನಾಗಿ, ಈ ವಾಸ್ತವಾಂಶಗಳನ್ನು ನಿಮ್ಮ ಮುಂದಿಡುವುದು ಮತ್ತು ನಿಮ್ಮ ಮಧ್ಯಸ್ಥಿಕೆಗೆ ಮನವಿ ಮಾಡುವುದು ನನ್ನ ಜವಾಬ್ದಾರಿ. ನೀವು ಲೋಕಸಭೆಯ ವಿರೋಧ ಪಕ್ಷದ ನಾಯಕರು ಹಾಗೂ ಕಾಂಗ್ರೆಸ್ ಪಕ್ಷದ ಹಿರಿಯ ನಾಯಕರು. ನಿಮ್ಮದೇ ಪಕ್ಷದ ಸರ್ಕಾರ ಇಲ್ಲಿ ಆಡಳಿತ ಮಾಡುತ್ತಿದೆ. ಆದ್ದರಿಂದ ನಿಮ್ಮದೇ ಸರ್ಕಾರದಿಂದ ನೀವು ಉತ್ತರ ಕೇಳಬೇಕು ಮತ್ತು ನೆಪ ಹೇಳದಂತೆ ಕರ್ತವ್ಯ ನಿರ್ವಹಿಸಲು ಸೂಚಿಸಬೇಕು. ವಾಸ್ತವ ಪರಿಸ್ಥಿತಿ ಅರ್ಥ ಮಾಡಿಕೊಳ್ಳಲು ರಾಜ್ಯಕ್ಕೆ ಖುದ್ದು ಭೇಟಿ ನೀಡಬೇಕು ಎಂದು ಪತ್ರದಲ್ಲಿ ಆಗ್ರಹಿಸಿದ್ದಾರೆ.
ಕರ್ನಾಟಕ ಸರ್ಕಾರದಿಂದ ಕೆಳಗಿನ ಪ್ರಶ್ನೆಗಳಿಗೆ ಉತ್ತರ ಕೇಳಿ ಎಂದು ನಿಮ್ಮನ್ನು ಒತ್ತಾಯಿಸುತ್ತೇನೆ:
1. ಬೆಳೆ ನಷ್ಟದ ಪ್ರಮಾಣ ಮತ್ತು ಬರದ ತೀವ್ರತೆ ಇದ್ದರೂ, ಪ್ರತಿ ರೈತನಿಗೆ ಕೇವಲ ₹2,500 ಮಾತ್ರ ಏಕೆ ನೀಡಲಾಗುತ್ತಿದೆ?
2. ಹಿಂದಿನ ಬರ ಪರಿಸ್ಥಿತಿಗಳಲ್ಲಿ ನೀಡಿದಂತೆ, ರಾಜ್ಯದ ಸ್ವಂತ ಸಂಪನ್ಮೂಲಗಳಿಂದ ಹೆಚ್ಚಿನ ನೆರವನ್ನು ಒದಗಿಸಲು ಸರ್ಕಾರ ಏಕೆ ವಿಫಲವಾಗಿದೆ?
3. ಬೆಳೆ ನಷ್ಟ ಮತ್ತು ರೈತರ ಸಂಕಷ್ಟದ ಕುರಿತು ಪದೇ ಪದೇ ವರದಿಗಳು ಬಂದಿದ್ದರೂ, ಹಲವು ಬರಪೀಡಿತ ತಾಲ್ಲೂಕುಗಳನ್ನು ಸರಿಯಾದ ಸಮಯದಲ್ಲಿ ಬರಪೀಡಿತ ಎಂದು ಏಕೆ ಘೋಷಿಸಲಿಲ್ಲ?
4. ಬರದಿಂದ ಬಾಧಿತರಾದ ಪ್ರತಿ ರೈತನಿಗೂ ಸಮರ್ಪಕ ಪರಿಹಾರವನ್ನು ತಕ್ಷಣ ವಿತರಿಸಲು ಸರ್ಕಾರ ಯಾವ ಕ್ರಮಗಳನ್ನು ಕೈಗೊಳ್ಳುತ್ತಿದೆ?
5. ಕುಡಿಯುವ ನೀರು ಮತ್ತು ಮೇವು ಕೊರತೆ ನಿವಾರಿಸಲು, ಜಾನುವಾರುಗಳನ್ನು ರಕ್ಷಿಸಲು ಹಾಗೂ ತೀವ್ರ ಸಂಕಷ್ಟ ಎದುರಿಸುತ್ತಿರುವ ಗ್ರಾಮೀಣ ಕುಟುಂಬಗಳಿಗೆ ನೆರವು ನೀಡಲು ಯಾವ ಕ್ರಮಗಳನ್ನು ಜಾರಿಗೊಳಿಸಲಾಗುತ್ತಿದೆ?
6. ಬೆಳೆ ನಷ್ಟ ಅಂದಾಜಿಸಲು, ಎಲ್ಲ ಫಲಾನುಭವಿಗಳನ್ನು ಗುರುತಿಸಲು ಮತ್ತು ಯಾವುದೇ ರೈತ ಪರಿಹಾರದಿಂದ ವಂಚಿತರಾಗದಂತೆ ನೋಡಿಕೊಳ್ಳಲು ಸರ್ಕಾರವು ನಿಗದಿತ ಕಾಲಮಿತಿಯೊಂದಿಗೆ ಯಾವ ಕಾರ್ಯಯೋಜನೆಯನ್ನು ರೂಪಿಸಿದೆ?
ಕರ್ನಾಟಕದ ಬರಪೀಡಿತ ಪ್ರದೇಶಗಳಿಗೆ ಭೇಟಿ ನೀಡಿ, ರೈತರು ಮತ್ತು ಕೃಷಿ ಸಮುದಾಯದ ಜನರನ್ನು ನೇರವಾಗಿ ಭೇಟಿಯಾಗಿ, ಅವರ ಸಂಕಷ್ಟಗಳನ್ನು ಅರ್ಥಮಾಡಿಕೊಂಡು, ಮುಖ್ಯಮಂತ್ರಿಗಳು ಮತ್ತು ಉಪಮುಖ್ಯಮಂತ್ರಿಗಳಿಂದ ತಕ್ಷಣದ ಕ್ರಮಗಳನ್ನು ಕೈಗೊಳ್ಳುವಂತೆ ಆಗ್ರಹಿಸಬೇಕೆಂದೂ ನಿಮ್ಮನ್ನು ಒತ್ತಾಯಿಸುತ್ತೇನೆ. ಇದು ಕೇವಲ ಆರ್ಥಿಕ ನೆರವಿನ ಪ್ರಶ್ನೆಯಲ್ಲ. ಇದು ಆಡಳಿತ, ಹೊಣೆಗಾರಿಕೆ ಮತ್ತು ಚುನಾಯಿತ ಸರ್ಕಾರವು ತನ್ನ ಜನರ ಬಗ್ಗೆ ಹೊಂದಿರುವ ಕರ್ತವ್ಯದ ಪ್ರಶ್ನೆಯಾಗಿದೆ. ರೈತರು ತಮ್ಮ ತಪ್ಪಿಲ್ಲದೆ ಬೆಳೆಗಳನ್ನು ಕಳೆದುಕೊಂಡಾಗ, ರಾಜ್ಯ ಸರ್ಕಾರವು ಸಮರ್ಪಕ ನೆರವು ಮತ್ತು ಸಕಾಲಿಕ ಕ್ರಮಗಳ ಮೂಲಕ ಅವರ ಬೆಂಬಲಕ್ಕೆ ನಿಲ್ಲಬೇಕು. ಬರಪೀಡಿತ ಪ್ರದೇಶಗಳನ್ನು ಗುರುತಿಸುವಲ್ಲಿ ವಿಳಂಬ ಮಾಡುತ್ತಾ, ಅಸಮರ್ಪಕ ಪರಿಹಾರವನ್ನು ನೀಡುತ್ತಾ ಮತ್ತು ರೈತರ ಸಂಕಷ್ಟಕ್ಕೆ ಸ್ಪಂದಿಸಲು ವಿಫಲವಾಗುತ್ತಾ, ಕಾಂಗ್ರೆಸ್ ಸರ್ಕಾರ ತಾನು ರೈತರ ಪರ ಎಂದು ಹೇಳಿಕೊಳ್ಳಲು ಸಾಧ್ಯವಿಲ್ಲ. ರೈತರಿಗೆ ವಾಸ್ತವವಾಗಿ ತಲುಪಿರುವ ನೆರವಿನ ಆಧಾರದ ಮೇಲೆ ಸರ್ಕಾರದ ಭರವಸೆಗಳನ್ನು ಅಳೆಯಬೇಕಾಗುತ್ತದೆ ಎಂದು ಅವರು ಹೇಳಿದ್ದಾರೆ.
ರೈತರಿಗೆ ಈಗಲೇ ನಿಜವಾದ ಪರಿಹಾರ ಕೊಡಬೇಕಾಗಿದೆ. ಹೆಸರಿಗಷ್ಟೇ ಇರುವ ನೆರವು, ವಿಳಂಬ ನಿರ್ಧಾರಗಳು ಅಥವಾ ಖಾಲಿ ಭರವಸೆಗಳು ಬೇಕಾಗಿಲ್ಲ. ಈ ವಿಷಯದ ಗಂಭೀರತೆಯನ್ನು ಗಮನದಲ್ಲಿಟ್ಟುಕೊಂಡು ನೀವು ತುರ್ತಾಗಿ ಕ್ರಮ ಕೈಗೊಳ್ಳುತ್ತೀರೆಂದು ನಾನು ಆಶಿಸುತ್ತೇನೆ. ಕಾಂಗ್ರೆಸ್ ಪಕ್ಷದ ಹಿರಿಯ ನಾಯಕರಾಗಿ ನಿಮ್ಮ ಸ್ಥಾನವನ್ನು ಬಳಸಿಕೊಂಡು, ಕರ್ನಾಟಕ ಸರ್ಕಾರವು ತನ್ನ ಜವಾಬ್ದಾರಿಯನ್ನು ಒಪ್ಪಿಕೊಳ್ಳುವಂತೆ, ತನ್ನ ವೈಫಲ್ಯಗಳನ್ನು ಸರಿಪಡಿಸಿಕೊಳ್ಳುವಂತೆ ಮತ್ತು ಭೀಕರ ಬರದಿಂದ ಬಾಧಿತರಾಗಿರುವ ಪ್ರತಿ ರೈತನಿಗೂ ಸಮರ್ಪಕ ಹಾಗೂ ಸಕಾಲಿಕ ಪರಿಹಾರ ಒದಗಿಸುವಂತೆ ನೋಡಿಕೊಳ್ಳಬೇಕೆಂದು ಅಶೋಕ್ ಪತ್ರದಲ್ಲಿ ಆಗ್ರಹಿಸಿದ್ದಾರೆ.
