Cricket 2022 : ಕ್ಯಾಪ್ಟನ್‌ ಸ್ಥಾನದಿಂದ ಕೆಳಗಿಳಿದ ಸ್ಟಾರ್‌ ಪ್ಲೇಯರ್ಸ್‌
2022ರಲ್ಲಿ ಹತ್ತಾರು ಕ್ರಿಕೆಟಿಂಗ್‌ ಆಕ್ಷನ್‌ಗಳ ಜೊತೆಗೆ ಹಲವು ಆಟಗಾರರ ಏಳು-ಬೀಳಿನ ಪ್ರದರ್ಶನಗಳು ನಡೆದಿದೆ. ಇದೇ ವರ್ಷದಲ್ಲಿ ವಿಶ್ವ ಕ್ರಿಕೆಟ್‌ನ ಹಲವು ಸ್ಟಾರ್‌ ಆಟಗಾರರು ತಮ್ಮ ನಾಯಕತ್ವಕ್ಕೂ ಸಹ ವಿದಾಯವನ್ನ ಹೇಳಿದ್ದಾರೆ. ಹೀಗೆ ಕ್ಯಾಪ್ಟೆನ್ಸಿಯಿಂದ ಕೆಳಗಿಳಿದ ಶ್ರೇಷ್ಠ ಆಟಗಾರರ ವಿವರ ಇಲ್ಲಿದೆ.
ವಿರಾಟ್‌ ಕೊಹ್ಲಿ:
2022ರ ವರ್ಷಾರಂಭದಲ್ಲೇ ಕ್ರಿಕೆಟ್ ಅಭಿಮಾನಿಗಳಿಗೆ ಶಾಕ್‌ ನೀಡಿದ್ದು ಟೀಂ ಇಂಡಿಯಾದ ರನ್‌ ಮಷಿನ್‌ ವಿರಾಟ್‌ ಕೊಹ್ಲಿ, ಸೌತ್‌ ಆಫ್ರಿಕಾ ವಿರುದ್ಧ ನಡೆದ ಟೆಸ್ಟ್‌ ಸರಣಿ ಸೋಲಿನ ಬಳಿಕ 2022ರ ಜನವರಿ 15ರಂದು ವಿರಾಟ್‌ ಕೊಹ್ಲಿ ಭಾರತ ಟೆಸ್ಟ್‌ ತಂಡದ ನಾಯಕತ್ವದಿಂದ ಕೆಳಗಿಳಿದರು. ಟೀಂ ಇಂಡಿಯಾವನ್ನು 68 ಟೆಸ್ಟ್‌ಗಳಲ್ಲಿ ಮುನ್ನಡೆಸಿದ್ದ ಕಿಂಗ್‌ ಕೊಹ್ಲಿ, 40 ಪಂದ್ಯಗಳಲ್ಲಿ ಗೆಲುವು ಸಾಧಿಸುವ ಮೂಲಕ ಅತ್ಯಂತ ಯಶಸ್ವಿ ಕ್ಯಾಪ್ಟನ್‌ ಎಂಬ ಹೆಗ್ಗಳಿಕೆಯೊಂದಿಗೆ ತಮ್ಮ ನಾಯಕತ್ವಕ್ಕೆ ಅಂತ್ಯವಾಡಿದರು.
ಕೇನ್‌ ವಿಲಿಯಂಸನ್‌ :
ನ್ಯೂಜಿ಼ಲೆಂಡ್‌ ತಂಡದ ಯಶಸ್ವಿ ಕ್ಯಾಪ್ಟನ್‌ಗಳ ಲಿಸ್ಟ್‌ನಲ್ಲಿ ಕೇನ್‌ ವಿಲಿಯಂಸನ್‌ ಹೆಸರನ್ನ ಮರೆಯುವಂತಿಲ್ಲ. ಕಿವೀಸ್‌ ತಂಡಕ್ಕೆ ವಿಶ್ವ ಟೆಸ್ಟ್‌ ಚಾಂಪಿಯನ್‌ಪಟ್ಟ ತಂದುಕೊಟ್ಟ ಕೀರ್ತಿ ಪಡೆದಿರುವ ಕೇನ್‌ ವಿಲಿಯಂಸನ್‌, ಡಿಸೆಂಬರ್‌ 15ರಂದು ನಾಯಕನ ಸ್ಥಾನದಿಂದ ಕೆಳಗಿಳಿದರು.
ಜೋ ರೂಟ್‌ :
ಇಂಗ್ಲೆಂಡ್‌ ತಂಡದ ಜೋ ರೂಟ್‌, ಕಳೆದ ಏಪ್ರಿಲ್‌ 15ರಂದು ಟೆಸ್ಟ್‌ ತಂಡದ ನಾಯಕ ಸ್ಥಾನದಿಂದ ಕೆಳಗಿಳಿದರು. ಆಸ್ಟ್ರೇಲಿಯಾ ವಿರುದ್ಧ ನಡೆದ ʼಆಷಸ್‌ʼ ಸೋಲಿನ ಹಿನ್ನೆಲೆಯಲ್ಲಿ ಜೋ ರೂಟ್‌, ಇಂಗ್ಲೆಂಡ್‌ ತಂಡದ ಕ್ಯಾಪ್ಟನ್‌ ಹುದ್ದೆಯಿಂದ ಕೆಳಗಿಳಿದರು.
ಒಯಾನ್‌ ಮಾರ್ಗನ್‌ :
ಇಂಗ್ಲೆಂಡ್‌ನ ವೈಟ್‌ ಬಾಲ್‌ ಕ್ರಿಕೆಟ್ ತಂಡದ ಕ್ಯಾಪ್ಟನ್‌ ಒಯಾನ್‌ ಮಾರ್ಗನ್‌ ಅವರ ನಾಯಕತ್ವದ ಯುಗ ಅಂತ್ಯಗೊಂಡಿದ್ದು ಸಹ 2022ರಲ್ಲಿ. ಇಂಗ್ಲೆಂಡ್‌ ತಂಡಕ್ಕೆ ಟಿ20 ಹಾಗೂ ಏಕದಿನ ಕ್ರಿಕೆಟ್ ವಿಶ್ವಕಪ್‌ ಗೆದ್ದುಕೊಟ್ಟ ಹೆಗ್ಗಳಿಕೆ ಹೊಂದಿದ್ದ ಮಾರ್ಗನ್‌, ಜೂನ್‌ 28ರಂದು ತಂಡದ ನಾಯಕ ಸ್ಥಾನಕ್ಕೆ ರಿಸೈನ್‌ ಮಾಡಿದರು.
ಆರನ್‌ ಫಿಂಚ್‌ :
ಆಸ್ಟ್ರೇಲಿಯಾ ತಂಡದ ಸ್ಪೋಟಕ ಬ್ಯಾಟ್ಸ್‌ಮನ್‌ ಆರನ್‌ ಫಿಂಚ್‌, ವೈಟ್‌ ಬಾಲ್‌ ಕ್ರಿಕೆಟ್‌ನಲ್ಲಿ ತಂಡದ ನಾಯಕತ್ವಕ್ಕೆ ವಿದಾಯ ಹೇಳಿದರು. ಆಸೀಸ್‌ ತಂಡದ ಆರಂಭಿಕ ಬ್ಯಾಟ್ಸ್‌ಮನ್‌ ಆಗಿಯೂ ಮಿಂಚಿರುವ ಫಿಂಚ್‌, ಸೆಪ್ಟೆಂಬರ್‌ 10ರಂದು ಆಸ್ಟ್ರೇಲಿಯಾದ ODI ತಂಡದ ಕ್ಯಾಪ್ಟನ್‌ ಹುದ್ದೆಯಿಂದ ಕೆಳಗಿಳಿದಿದ್ದು, ಟಿ20 ತಂಡದ ನಾಯಕನಾಗಿ ಮುಂದುವರಿದಿದ್ದಾರೆ.
ಮಿಥಾಲಿ ರಾಜ್‌ :
ಮಹಿಳಾ ಕ್ರಿಕೆಟ್ ಭಾರತ ತಂಡದ ಸೂಪರ್‌ ಸ್ಟಾರ್‌ ಮಿಥಾಲಿ ರಾಜ್‌ ಸಹ ತಂಡದ ನಾಯಕತ್ವದಿಂದ ಕೆಳಗಿಳಿದರು. ಕಳೆದ ಜೂನ್‌ 8ರಂದು ಭಾರತ ತಂಡದ ಏಕದಿನ ಮತ್ತು ಟಿ20 ತಂಡದ ಕ್ಯಾಪ್ಟನ್‌ ಹುದ್ದೆಯಿಂದ ಕೆಳಗಿಳಿದ ಮಿಥಾಲಿ ರಾಜ್‌, ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೂ ಗುಡ್‌ ಬೈ ಹೇಳಿದ್ದಾರೆ.
Cricket 2022 , players resigned captainship
