ಯೂರೋಪಿಯನ್ ಟೂರ್ನಿಗಳಲ್ಲಿ ಮಿನರ್ವಾ ಬಾಲಕರ ಸವಾರಿ..! ಬ್ರಜಿಲ್ ಮಣಿಸಿ ಗಾಥಿಯಾ ಕಪ್ ಗೆದ್ದ ಭಾರತದ ಎಂಎಫ್ಸಿ..!
ನಿಮಗಿದು ಗೊತ್ತಿರಲಿ.. ಭಾರತÀದಲ್ಲೂ ಸದ್ದಿಲ್ಲದೇ ನಡೆಯುತ್ತಿದೆ ಫುಟ್ಬಾಲ್ ಕ್ರೀಡೆಯ ಮಹಾಕ್ರಾಂತಿ. ಈ ಕ್ರಾಂತಿಯ ಕಿಡಿ ವಿದೇಶಿ ನೆಲದಲ್ಲಿ ಸಣ್ಣ ದೀಪವಾಗಿ ಬೆಳಗುತ್ತಿದೆ. ಯುರೋಪ್, ಅಮೆರಿಕಾ, ಆಫ್ರಿಕನ್ ದೇಶಗಳಂತೆ ಭಾರತದಲ್ಲೂ ಫುಟ್ಬಾಲ್ ಸಂಸ್ಕøತಿ ಬೆಳೆಯುತ್ತಿದೆ. ಕ್ರಿಕೆಟ್ನ ಜನಪ್ರಿಯತೆಯ ನಡುವೆಯೂ ಭಾರತದಲ್ಲಿ ಫುಟ್ಬಾಲ್ ಉತ್ತುಂಗಕ್ಕೇರುವ ಒಂದು ಸಣ್ಣ ಸೂಚನೆ ಸಿಕ್ಕಿದೆ.
ಹೌದು, ಭಾರತದ ಪ್ರತಿಷ್ಠಿತ ವಿನರ್ವಾ ಫುಟ್ಬಾಲ್ ಕ್ಲಬ್ನ ಎಳೆಯ ಹುಡುಗರು ವಿದೇಶದ ಪ್ರತಿಷ್ಠಿತ ಕ್ಲಬ್ ತಂಡಗಳಿಗೆ ಸೋಲಿನ ರುಚಿ ತೋರಿಸುತ್ತಿದ್ದಾರೆ. ಫಿಫಾ ವಿಶ್ವಕಪ್ನಲ್ಲಿ ಭಾರತ ಯಾವಾಗ ಆಡುವುದು ಅನ್ನೋ ಶತಮಾನಗಳ ಕೂಗಿಗೆ ಒಂದು ಚಿಕ್ಕ ಧ್ವನಿ ಕೇಳಿಬರುತ್ತಿದೆ. ಆದ್ರೆ ಈ ಧ್ವನಿ ಎಷ್ಟರ ಮಟ್ಟಿಗೆ ಜೋರಾಗಿ ಮೊಳಗುತ್ತೆ ಅನ್ನೋದಕ್ಕೆ ಸದ್ಯಕ್ಕಂತೂ ಉತ್ತರವವಿಲ್ಲ.
ಆದ್ರೂ 2026ರ ಫಿಫಾ ವಿಶ್ವಕಪ್ ಮುಗಿಯುವ ಮುನ್ನವೇ ಭಾರತದ ಹುಡುಗರು ವಿದೇಶಿ ನೆಲದಲ್ಲಿ ಸಂಚಲನವನ್ನೇ ಸೃಷ್ಟಿಸಿದ್ದಾರೆ. ಸ್ವೀಡನ್ನ ಪ್ರತಿಷ್ಠಿತ 12 ವಯೋಮಿತಿಯ ಗಾಥಿಯಾ ಕಪ್ ಅನ್ನು ಮಿನರ್ವಾ ಅಕಾಡೆಮಿಯ ಹುಡುಗರು ಗೆದ್ದುಕೊಂಡಿದ್ದಾರೆ. ಅದು ಕೂಡ ಬ್ರೆಜಿಲ್ನ ಪ್ರತಿಷ್ಠಿತ ಆರ್.ಎಸ್. ಸ್ಪೋಟ್ರ್ಸ್ ಯಲ್ಲೋ ಅಕಾಡೆಮಿ ತಂಡವನ್ನು ಫೈನಲ್ನಲ್ಲಿ 2-1 ಗೋಲುಗಳಿಂದ ಮಣಿಸಿದ್ದಾರೆ.
ಈ ಮೂಲಕ ಸತತ ಎರಡನೇ ಬಾರಿ ಪ್ರಶಸ್ತಿ ಗೆದ್ದ ಹಿರಿಮೆಗೂ ಪಾತ್ರವಾಗಿದೆ. ಅಲ್ಲದೆ ಈ ಬಾರಿಯ ಹೆಲ್ಸಿಂಕಿ ಕಪ್, ಡ್ಯಾನಾ ಕಪ್, ನಾರ್ವೆ ಕಪ್, ಮಿನಾ ಕಪ್ ಸೇರಿದಂತೆ ಹಲವು ಟ್ರೋಫಿಗಳು ಮಿನರ್ವಾ ಎಫ್ಸಿ ಹೆಸರಿಗೆ ಅಂಟಿಕೊಂಡಿವೆ.
ಅದರಲ್ಲೂ ಯೂರೋಪ್ನ ಪ್ರತಿಷ್ಠಿತ ಕ್ಲಬ್ಗಳಿಗೆ ಭಾರತದ ಎಳೆಯ ಆಟಗಾರರು ಆಘಾತದ ಮೇಲೆ ಆಘಾತ ನೀಡಿದ್ದಾರೆ. ಮುಖ್ಯವಾಗಿ ಲಿವರ್ಪೂಲ್ ಕ್ಲಬ್ ಹುಡುಗರನ್ನು 6-0 ಗೋಲುಗಳಿಂದ ಸೋಲಿಸಿದಾಗ ಯೂರೋಪಿಯನ್ ಮಾಧ್ಯಮಗಳು ಕೂಡ ಬೆಚ್ಚಿ ಬಿದ್ದಿದ್ದವು.
ಭಾರತದಲ್ಲಿ ಫುಟ್ಬಾಲ್ಗೆ ಭವಿಷ್ಯವಿಲ್ಲ. ಫಿಫಾ Àವಿಶ್ವಕಪ್ ನಲ್ಲಿ ಆಡೋದು ಕನಸಿನ ಮಾತು. ಹೀಗೆ ಅಂದುಕೊಂಡವರಿಗೆ ಇದೀಗ ಮಿನರ್ವಾ ಫುಟ್ಬಾಲ್ ಕ್ಲಬ್ ಭರವಸೆಯ ಮಿಂಚಾಗಿ ಹೊಳೆಯುತ್ತಿದೆ. ಹೌದು, ಯೂರೋಪಿನ ಹಸಿರು ಮೈದಾನಗಳಲ್ಲಿ ಭಾರತದ ಹುಡುಗರ ಗೆಲುವಿನ ಕಲರವದ ಹಿಂದಿನ ಶಕ್ತಿಯೇ ಮಿನರ್ವಾ ಫುಟ್ಬಾಲ್ ಅಕಾಡೆಮಿ.
ಭಾರತದ ಫುಟ್ಬಾಲ್ ಕ್ರಾಂತಿಗೆ ಮಿನರ್ವಾ ಎಫ್ಸಿ ಕಿಡಿ..!
ಮಿನರ್ವಾ ಎಫ್ಸಿ ಭಾರತದ ಫುಟ್ಬಾಲ್ಗೆ ಹೊಸ ದಿಕ್ಸೂಚಿಯಾಗಿದೆ. ಪಂಜಾಬ್ನ ಹತ್ತು ಎಕರೆ ವಿಸ್ತೀರ್ಣದಲ್ಲಿ ರೂಪುಗೊಂಡಿರುವ ಎಂಎಫ್ಸಿ, ಅತ್ಯಾಧುನಿಕ ಸೌಲಭ್ಯಗಳನ್ನು ಹೊಂದಿದೆ. ಯೂರೋಪ್ನ ಪ್ರತಿಷ್ಠಿತ ಕ್ಲಬ್ಗಳಿಗೆ ಸರಿಸಮಾನವಾದ ಸೌಲಭ್ಯಗಳನ್ನು ಹೊಂದಿದೆ. ಫಿಫಾದಿಂದಲೇ ಮಾನ್ಯತೆ ಪಡೆದಿರುವ ಆರು ಅಂತಾರಾಷ್ಟ್ರೀಯ ಮೈದಾನಗಳಿವೆ.
ಜಿಮ್, ಸ್ವಿಮ್ಮಿಂಗ್ ಪೂಲ್, ಫಿಸಿಯೋಥೆರಪಿ, ಮೆಡಿಕಲ್ ಕ್ಲಿನಿಕ್ ಸೇರಿದಂತೆ ಎಲ್ಲವೂ ಹೈಟೆಕ್ ಸೌಲಭ್ಯಗಳಿಂದ ಕೂಡಿದೆ. ಜೊತೆಗೆ ಮಿನರ್ವಾ ಸ್ಕೂಲ್ ಆಫ್ ಎಕ್ಸಲೆನ್ಸ್ ಮೂಲಕ ಗುಣಮಟ್ಟದ ಶಿಕ್ಷಣವನ್ನು ಕೂಡ ನೀಡಲಾಗುತ್ತಿದೆ. ಹಾಗೇ ಮಿನರ್ವಾ ಕ್ರಿಕೆಟ್ ಅಕಾಡೆಮಿಯೂ ಇದೆ.
ರಂಜಿತ್ ಬಜಾಜ್ ಕನಸಿನ ಕೂಸು ಮಿನರ್ವಾ ಎಫ್ಸಿ..!
ರಂಜಿತ್ ಬಜಾಜ್ ಅವರು ಮಾಜಿ ಫುಟ್ಬಾಲ್ ಆಟಗಾರರು. ಭಾರತದ ಫುಟ್ಬಾಲ್ ವ್ಯವಸ್ಥೆಯನ್ನು ಬದಲಾಯಿಸಲೇಬೇಕು ಎಂದು ಪಣತೊಟ್ಟಿರುವ ಇವ್ರು, 2005ರಲ್ಲಿ ಈ ಅಕಾಡೆಮಿಯನ್ನು ಶುರು ಮಾಡಿದ್ದರು.
2013ರಲ್ಲಿ ಈ ಅಕಾಡೆಮಿ ವೃತ್ತಿಪರ ಅಕಾಡೆಮಿಯಾಗಿ ರೂಪುಗೊಂಡಿತ್ತು. ಈಗಾಗಲೇ ಸುಮಾರು 240ಕ್ಕೂ ಹೆಚ್ಚು ಆಟಗಾರರನ್ನು ಭಾರತದ ವಿವಿಧ ವಯೋಮಿತಿ ತಂಡಗಳಿಗೆ ಕೊಡುಗೆಯಾಗಿ ನೀಡಿದೆ. ವಿವಿಧ ವಯೋಮಿತಿ ಸೇರಿದಂತೆ ಪ್ರತಷ್ಠಿತ ಟೂರ್ನಿಗಳಲ್ಲೂ ಆಡುತ್ತಿದೆ. ಮುಂದಿನ ಎಂಟು ವರ್ಷಗಳಲ್ಲಿ ಭಾರತ ಫಿಫಾ ವಿಶ್ವಕಪ್ಗೆ ಅರ್ಹತೆ ಪಡೆಯಲೇಬೇಕು ಎಂಬುದು ರಂಜಿತ್ ಅವರ ಮುಖ್ಯ ಗುರಿಯಾಗಿದೆ.
.
ರಂಜಿತ್ ಕನಸಿಗೆ ಬೆಂಬಲವಾಗಿ ನಿಂತ ಪತ್ನಿ ಹೆನ್ನಾ ಸಿಂಗ್..!
ರಂಜಿತ್ ಬಜಾಜ್ ಅವರು ತಮ್ಮ ಸ್ವಂತ ಬಲದಿಂದಲೇ ಈ ಅಕಾಡೆಮಿಯನ್ನು ಶುರು ಮಾಡಿದ್ದರು. ಆರಂಭದಲ್ಲಿ ಕ್ಲಬ್ಗೆ ಪ್ರಾಯೋಜಕತ್ವ ನೀಡಲು ಯಾರು ಮುಂದೆ ಬಂದಿರಲಿಲ್ಲ. ಹಾಗಾಗಿ ಪತ್ನಿ ಹೆನ್ನಾ ಸಿಂಗ್ ತಮ್ಮ ಒಡವೆಗಳನ್ನು 56 ಲಕ್ಷ ರೂಪಾಯಿಗೆ ಅಡವಿಟ್ಟಿದ್ದರು. ಈ ದುಡ್ಡಿನಿಂದಲೇ ಹುಡುಗರು ಯೂರೋಪ್ ಟೂರ್ನಿಗಳಲ್ಲಿ ಭಾಗವಹಿಸಿದ್ರು. ಇವರಿಬ್ಬರ ತ್ಯಾಗದ ಫಲದಿಂದಾಗಿ ಇವತ್ತು ಮಿನರ್ವಾ ಕ್ಲಬ್ ಹುಡುಗರು ಯೂರೋಪ್ನಲ್ಲಿ ಭಾರತವನ್ನು ತಿರುಗಿ ನೋಡುವಂತೆ ಮಾಡಿದ್ದಾರೆ.
ಪ್ರಾಜೆಕ್ಟ್ 2034ರ ರೋಡ್ ಮ್ಯಾಪ್..!
ಇದು ಕೇವಲ ಒಂದು ಖಾಸಗಿ ಕ್ಲಬ್ ಅಲ್ಲ. 2034ರ ಫಿಫಾ ವಿಶ್ವಕಪ್ಗೆ ಅರ್ಹತೆ ಪಡೆಯುವಂತೆ ಮಾಡುವ ಮಹತ್ವಾಕಾಂಕ್ಷೆ ಯೋಜನೆಯನ್ನು ಹೊಂದಿರುವ ಕ್ಲಬ್. ದಕ್ಷಿಣ ಭಾರತದ ಬೆಂಗಳೂರು, ಚೆನ್ನೈ, ಕೇರಳ ಹಾಗೂ ಹೈದ್ರಬಾದ್ನಲ್ಲಿ ಅಕಾಡೆಮಿಯನ್ನು ಹೊಂದಿದೆ.
ವಿಶ್ವಕಪ್ ಬ್ಯಾಚ್ ಯೋಜನೆಯ ಮೂಲಕ ದೇಶದ 10ರಿಂದ 18 ವಯೋಮಿತಿಯ ಪ್ರತಿಭಾವಂತ ಹುಡುಗರನ್ನು ಆಯ್ಕೆ ಮಾಡಲಾಗುತ್ತದೆ. ಬಳಿಕ ಉಚಿತ ಸ್ಕಾಲರ್ಶಿಪ್ನಲ್ಲಿ ಮಿನರ್ವಾ ಅಕಾಡೆಮಿಯಲ್ಲಿ ತರಬೇತಿ ಹಾಗೂ ಶಿಕ್ಷಣವನ್ನು ನೀಡಲಾಗುತ್ತದೆ. ಅಲ್ಲದೆ ಹುಡುಗರಿಗೆ ಜಾಗತಿಕ ಮಟ್ಟದಲ್ಲಿ ಆಡುವ ಅವಕಾಶಗಳನ್ನು ನೀಡಲಾಗುತ್ತದೆ.
ಮಿನರ್ವಾ ಕ್ಲಬ್ನ ಆಯ್ಕೆ ಪ್ರಕ್ರಿಯೆ ಹೇಗಿರುತ್ತದೆ..?
ಈ ಅಕಾಡೆಮಿಗೆ ಸೇರಲು ಎರಡು ಅವಕಾಶಗಳಿವೆ. ಅಖಿಲ ಭಾರತ ಓಪನ್ ಟ್ರಯಲ್ಸ್ಗಳನ್ನು ದೇಶದ ಪ್ರಮುಖ ನಗರಗಳಲ್ಲಿ ನಡೆಸಲಾಗುತ್ತದೆ. 10ರಿಂದ 18 ವಯೋಮಿತಿ ಹುಡುಗರಿಗೆ ಮಾತ್ರ ಅವಕಾಶ. ಇಲ್ಲಿ ಯಾವುದೇ ನೋಂದಣಿ ಶುಲ್ಕಗಳು ಇರುವುದಿಲ್ಲ. ತರಬೇತುದಾರರು ಹುಡುಗರ ಕೌಶಲ್ಯಗಳನ್ನು ಆಧರಿಸಿ ವಿಶ್ವಕಪ್ ಬ್ಯಾಚ್ಗೆ ಆಯ್ಕೆ ಮಾಡ್ತಾರೆ. ಇನ್ನು ನೇರ ಪಾವತಿ ಪ್ರವೇಶದ ಮೂಲಕವೂ ಅಕಾಡೆಮಿಯ ಮಾಸಿಕ ಹಾಗೂ ವಾರ್ಷಿಕ ಶಿಬಿರಗಳನ್ನು ಸೇರಿಕೊಳ್ಳಬಹುದು.
ಒಟ್ಟಿನಲ್ಲಿ ಭಾರತದ ಫುಟ್ಬಾಲ್ ಭವಿಷ್ಯಕ್ಕೆ ಮಿನರ್ವಾ ಫುಟ್ಬಾಲ್ ಅಕಾಡೆಮಿ ಭದ್ರವಾದ ಬುನಾದಿ ಹಾಕುತ್ತಿದೆ. ಈ ನಿಟ್ಟಿನಲ್ಲಿ ಭಾರತ ಸರ್ಕಾರ ಮತ್ತು ಫುಟ್ಬಾಲ್ ಸಂಸ್ಥೆಗಳು ಮನಪೂರ್ವಕವಾಗಿ ಸಹಕಾರ ನೀಡಿದ್ರೆ ಭಾರತಕ್ಕೆ ಫಿಫಾ ವಿಶ್ವಕಪ್ಗೆ ಅರ್ಹತೆ ಪಡೆಯುವುದು ಕಷ್ಟವೇನೂ ಅಲ್ಲ.
ಯಾಕಂದ್ರೆ, ಅಸಾಧ್ಯವಾದದ್ದು ಯಾವುದು ಇಲ್ಲ. ಆದ್ರೆ ಮನಸ್ಸು, ಗುರಿ, ಧೈರ್ಯ, ದೂರದೃಷ್ಟಿಯ ಚಿಂತನೆ, ಸ್ಪಷ್ಟವಾದ ಯೋಜನೆ ಇರಬೇಕು ಅಷ್ಟೇ..! ಜಗತ್ತಿನ ಸಣ್ಣ ಸಣ್ಣ ರಾಷ್ಟ್ರಗಳು ಫಿಫಾ ಅಂಗಣದಲ್ಲಿ ಆಡುತ್ತವೆ. ಆದ್ರೆ ನಮಗೆ ಯಾಕೆ ಆಗಲ್ಲ..? ಆಗುತ್ತೆ.. ಒಂದಲ್ಲ ಒಂದು ದಿನ ಟೈಮ್ ಬಂದೇ ಬರುತ್ತೆ..!
ಸನತ್ ರೈ
