ಐಪಿಎಲ್ ಸೀಸನ್ 14ರಲ್ಲಿ ಕ್ಯಾಪ್ಟನ್ ಕೂಲ್ ಮಹೇಂದ್ರ ಸಿಂಗ್ ಧೋನಿ ಆಟ ಇಲ್ಲಿ ತನಕ ನಡೆದಿರಲಿಲ್ಲ. ಆದರೆ ಕ್ವಾಲಿಫೈಯರ್ನ ಮೊದಲ ಮ್ಯಾಚ್ನಲ್ಲಿ ಧೋನಿ ಆರ್ಭಟಿಸಿದರು. ರುತುರಾಜ್ ಅದ್ಭುತ ಇನ್ನಿಂಗ್ಸ್ ಕಟ್ಟಿದರು. ರಾಬಿನ್ ಉತ್ತಪ್ಪ ಫಾರ್ಮ್ ಕಂಡುಕೊಂಡುಕೊಂಡ್ರು. ಚೆನ್ನೈ ಸುಲಭವಾಗಿ ಪಂದ್ಯ ಗೆದ್ದು ಫೈನಲ್ ಪ್ರವೇಶ ಪಡೆಯಿತು.
ದುಬೈನಲ್ಲಿ ಟಾಸ್ ಗೆದ್ದ ಚೆನ್ನೈ ಸೂಪರ್ ಕಿಂಗ್ಸ್ ಡೆಲ್ಲಿ ಕ್ಯಾಪಿಟಲ್ಸ್ ತಂಡವನ್ನು ಬ್ಯಾಟಿಂಗ್ಗೆ ಇಳಿಸಿತು. ಶಿಖರ್ ಧವನ್ ಮತ್ತು ಪೃಥ್ವಿ ಷಾ ಸ್ಪೋಟಕ ಆರಂಭ ಒದಗಿಸಿದರು. ಪೃಥ್ವಿ ಷಾ ಬೌಂಡರಿಗಳ ಮೇಲೆ ಬೌಂಡರಿ, ಸಿಕ್ಸರ್ಗಳ ಹಿಂದೆ ಸಿಕ್ಸರ್ ಸಿಡಿಸಿದರು. ಆದರೆ ಜೋಶ್ ಹ್ಯಾಜಲ್ವುಡ್ ಶಿಖರ್ ಧವನ್ ವಿಕೆಟ್ ಪಡೆದರು. ಇವರ ಬೆನ್ನಹಿಂದಯೇ ಶ್ರೇಯಸ್ ಅಯ್ಯರ್ ಕೂಡ ಔಟಾದರು.
ಪೃಥ್ವಿ ಷಾ ಅಬ್ಬರಿಸುತ್ತಾ ಸಾಗಿ ಅರ್ಧಶತಕದ ಗಡಿ ಕೂಡ ದಾಟಿದರು. ಆದರೆ ಅಕ್ಸರ್ ಪಟೇಲ್ 10 ರನ್ಗಳಿಸಿ ಔಟಾದರು.34 ಎಸೆತಗಳಲ್ಲಿ 7 ಬೌಂಡರಿ ಮತ್ತು 3 ಸಿಕ್ಸರ್ ನೆರವಿನಿಂದ 60 ರನ್ಗಳಿಸಿದ್ದ ಪೃಥ್ವಿ ಜಡೇಜಾ ಎಸೆತದಲ್ಲಿ ಫಾಫ್ ಡು ಪ್ಲೆಸಿಸ್ಗೆ ಕ್ಯಾಚ್ ನೀಡಿದರು. ಸಂಕಷ್ಟಕ್ಕೆ ಸಿಲುಕುತ್ತಿದ್ದ ಡೆಲ್ಲಿ ಕ್ಯಾಪಿಟಲ್ಸ್ಗೆ ನಾಯಕ ರಿಷಭ್ ಪಂತ್ ಮತ್ತು ಶಿಮ್ರನ್ ಹೆಟ್ಮಯರ್ ಆಸರೆಯಾದರು. ಹೆಟ್ಮಯರ್ 24 ಎಸೆತಗಳಲ್ಲಿ 37 ರನ್ ಸಿಡಿಸಿ ಔಟಾದರೆ, ಪಂತ್ 35 ಎಸೆತಗಳಲ್ಲಿ ಅಜೇಯ 51 ರನ್ಗಳಿಸಿದರು. 20 ಓವರುಗಳಲ್ಲಿ ಡೆಲ್ಲಿ 5 ವಿಕೆಟ್ ಕಳೆದುಕೊಂಡು 172 ರನ್ಗಳಿಸಿತ್ತು.
ದೊಡ್ಡ ಗುರಿ ಬೆನ್ನಟ್ಟ ಹೊರಟ ಚೆನ್ನೈಗೆ ಆರಂಭದಲ್ಲೇ ಆಘಾತ ಎದುರಾಯಿತು. ಫಾಫ್ ಡು ಪ್ಲೆಸಿಸ್ ಮೊದಲ ಓವರ್ನಲ್ಲೇ ಕ್ಲೀನ್ ಬೌಲ್ಡ್ ಆಗಿದ್ದರು. ಕಣಕ್ಕಿಳಿದ ರಾಬಿನ್ ಉತ್ತಪ್ಪ ಬೇರೆಯದ್ದೇ ಟಚ್ನಲ್ಲಿದ್ದರು. ರಾಬಿನ್ ಮತ್ತು ರುತುರಾಜ್ ಪವರ್ ಪ್ಲೇನಲ್ಲಿ ಡೆಲ್ಲಿ ಬೌಲರ್ಗಳ ಬೆವರಿಳಿಸಿದರು. ಈ ಜೋಡಿ 110 ರನ್ಗಳ ಜೊತೆಯಾಟ ಆಡಿ ಸಿಎಸ್ಕೆ ಗೆಲುವಿಗೆ ಬುನಾಧಿ ಹಾಕಿತ್ತು. 44 ಎಸೆತಗಳಲ್ಲಿ 63 ರನ್ಗಳಿಸದ್ದ ಉತ್ತಪ್ಪ ಕರ್ರನ್ಗೆ ವಿಕೆಟ್ ಒಪ್ಪಿಸಿದರು. ಇದು ಚೆನ್ನೈ ಕುಸಿತಕ್ಕೆ ಕಾರಣವಾಯಿತು.
ರಾಬಿನ್ ಔಟಾದ ಬೆನ್ನಲ್ಲೇ ಭಡ್ತಿ ಪಡೆದು ಬ್ಯಾಟಿಂಗ್ಗೆ ಬಂದಿದ್ದ ಶಾರ್ದೂಲ್ ಠಾಕೂರ್ ಔಟಾದರು. ಅಂಬಟಿ ರಾಯುಡು ರನೌಟ್ ಬಲೆಯಲ್ಲಿ ಬಿದ್ದರು. ಇದರ ನಡುವೆ ಮೊಯಿನ್ ಅಲಿ ಮತ್ತು ರುತುರಾಜ್ ಗಾಯಕ್ವಾಡ್ ರನ್ಬೇಟೆಯಾಡಿ ಗೆಲುವನ್ನು ಹತ್ತಿರವಾಗಿಸಿದರು. 19ನೇ ಓವರ್ನಲ್ಲಿ 50 ಎಸೆತಗಳಲ್ಲಿ 70 ರನ್ಗಳಿಸಿದ್ದ ರುತುರಾಜ್ ಔಟಾದರು. ಧೋನಿ ಬ್ಯಾಟಿಂಗ್ಗೆ ಇಳಿಸಿದರು. ಆವೇಶ್ ಖಾನ್ ಎಸೆತವನ್ನು ಸಿಕ್ಸರ್ಗೆ ಅಟ್ಟಿದ ಧೋನಿ ಕೊನೆಯ ಓವರ್ನಲ್ಲಿ ಗೆಲುವಿಗಾಗಿ 13 ರನ್ಗಳಿಸುವ ಅವಶ್ಯಕತೆ ಇರುವಂತೆ ನೋಡಿಕೊಂಡರು.
ಕೊನೆಯ ಓವರ್ನಲ್ಲಿ ಸಿಎಸ್ಕೆ ಗೆಲುವಿಗೆ 13 ರನ್ ಬೇಕಿತ್ತು. ಮೊದಲ ಎಸೆತದಲ್ಲಿ ಮೊಯಿನ್ ಅಲಿ ಔಟಾದಾಗ ಚೆನ್ನೈಗೆ ಸಂಕಷ್ಟ ಎದುರಾಯಿತು. ಆದರೆ ನಂತರ 3 ಎಸೆತಗಳನ್ನು ಬೌಂಡರಿಗೆ ಅಟ್ಟಿದ ನಾಯಕ ಧೋನಿ ಸಿಎಸ್ಕೆ ತಂಡಕ್ಕೆ ಅಮೋಘ 4 ವಿಕೆಟ್ಗಳ ಜಯ ತಂದುಕೊಟ್ಟರು. ಚೆನ್ನೈ 19.4 ಓವರುಗಳಲ್ಲಿ ಪಂದ್ಯ ಗೆದ್ದು ಫೈನಲ್ ಪ್ರವೇಶ ಪಡೆದರೆ, ಡೆಲ್ಲಿ ಫೈನಲ್ ಆಡಲು ಕ್ವಾಲಿಫೈಯಯರ್ 2ರಲ್ಲಿ ಗೆಲ್ಲಲೇಬೇಕಾದ ಅನಿವಾರ್ಯತೆಗೆ ಸಿಕ್ಕಿದೆ.