ಐಪಿಎಲ್ 2021 -ಹತ್ತಿರ.. ಮತ್ತಷ್ಟು ಹತ್ತಿರ.. ಆರ್ ಸಿಬಿಯ ಪ್ಲೇ ಆಫ್ ಕನಸು..
ಆರಂಭದಲ್ಲಿ ಅಬ್ಬರಿಸಿದ ರಾಜಸ್ಥಾನ ರಾಯಲ್ಸ್ ಕೊನೆಯಲ್ಲಿ ಮುಗ್ಗರಿಸಿತು. ಆರ್ಸಿಬಿಯ ಪ್ಲಾನಿಂಗ್ ಮತ್ತು ಎಕ್ಸಿಕ್ಯುಷನ್ ಮುಂದೆ ರಾಯಲ್ಸ್ ಸಾಟಿಯಾಗಲಿಲ್ಲ. ದುಬೈನಲ್ಲಿ ಜಯಗಳಿಸಿದ ಆರ್ಸಿಬಿ ಪ್ಲೇ-ಆಫ್ಗೆ ಮತ್ತಷ್ಟು ಹತ್ತಿರವಾಯಿತು.
ಬ್ಯಾಟಿಂಗ್ ಆರಂಭಿಸಿದ ರಾಜಸ್ಥಾನ ರಾಯಲ್ಸ್ಗೆ ಸ್ಪೋಟಕ ಆರಂಭ ಸಿಕ್ಕಿತ್ತು. ಎವಿನ್ ಲೆವಿಸ್ ಮತ್ತು ಯಶಸ್ವಿ ಜೈಸ್ವಾಲ್ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಬೌಲರ್ಗಳ ಬೆವರಿಳಿಸಿದ್ದರು. ಸಿಕ್ಸರ್ಗಳು, ಬೌಂಡರಿಗಳು ಮಾಮೂಲು ಅನ್ನುವಂತಾಗಿದೆ. ಮೊದಲ ಆರು ಓವರುಗಳಲ್ಲೇ ರಾಯಲ್ಸ್ 56 ರನ್ ಸೇರಿಸಿತ್ತು. ಆರ್ಸಿಬಿಗೆ ಮೊದಲ ಯಶಸ್ಸು ಸಿಕ್ಕಿದ್ದು 9ನೇ ಓವರ್ನಲ್ಲಿ. ಜೈಸ್ವಾಲ್ 22 ಎಸೆತಗಳಲ್ಲಿ 3 ಫೋರ್ ಮತ್ತು 2 ಸಿಕ್ಸರ್ ನೆರವಿನಿಂದ 31 ರನ್ಗಳಿಸಿದ್ದಾಗ ಡ್ಯಾನ್ ಕ್ರಿಶ್ಚಿಯನ್ ಎಸೆತದಲ್ಲಿ ಔಟಾದರು. ಇದು ರಾಯಲ್ಸ್ ಕುಸಿತಕ್ಕೆ ವೇದಿಕೆ ಒದಗಿಸಿಕೊಟ್ಟಿತ್ತು.
ಲೆವಿಸ್ ಮತ್ತು ಸಂಜು ಸ್ಯಾಮ್ಸನ್ ಕೂಡ ಅಪಾಯಕಾರಿ ಆಗಿದ್ದರು. ಆದರೆ 5 ಫೋರ್, 3 ಸಿಕ್ಸರ್ ನೆರವಿನಿಂದ 37 ಎಸೆತಗಳಲ್ಲಿ 58 ರನ್ ಸಿಡಿಸಿದ್ದ ಲೆವಿಸ್ ಗಾರ್ಟನ್ಗೆ ವಿಕೆಟ್ ಒಪ್ಪಿಸಿದ್ರು. ಇವರ ಬೆನ್ನ ಹಿಂದೆಯೇ 19 ರನ್ಗಳಿಸಿದ್ದ ಸಂಜಯ ಸ್ಯಾಮ್ಸನ್ ಶಹಬಾಝ್ ಅಹ್ಮದ್ ಮ್ಯಾಜಿಕ್ಗೆ ಬಲಿಯಾದ್ರು. ಚಹಲ್ ಲೊಮ್ರೊರ್ ಮತ್ತು ಲಿವಿಂಗ್ ಸ್ಟೋನ್ ವಿಕೆಟ್ ಪಡೆದು ರಾಯಲ್ಸ್ಗೆ ಶಾಕ್ ನೀಡಿದ್ರು. ಹರ್ಷಲ್ ಪಟೇಲ್ ಪರಾಗ್, ಮೊರಿಸ್ ಮತ್ತು ಸಕಾರಿಯಾ ವಿಕೆಟ್ ಹಾರಿಸಿದ್ರು. 10 ಓವರುಗಳಲ್ಲಿ 91ರನ್ಗಳಿಸಿದ್ದ ರಾಯಲ್ಸ್ ಕೊನೆಯಲ್ಲಿ ಗಳಿಸಿದ್ದು 149 ರನ್ ಮಾತ್ರ. ಆರ್ಸಿಬಿ ಬೌಲಿಂಗ್ನಲ್ಲಿ ಪಟೇಲ್ 3 ವಿಕೆಟ್ ಪಡೆದರೆ, ಚಹಲ್ ಮತ್ತು ಶಹಬಾಝ್ ತಲಾ 2 ವಿಕೆಟ್ ಹಂಚಿಕೊಂಡರು.
ಗುರಿ ಬೆನ್ನಟ್ಟಿದ ರಾಯಲ್ ಚಾಲೆಂಜರ್ಸ್ ಮೊದಲ ಓವರ್ನಲ್ಲೇ ಅಬ್ಬರದ ಆಟಕ್ಕೆ ಕೈ ಹಾಕಿತ್ತು. ವಿರಾಟ್ ಕೊಹ್ಲಿ, ಮೊರಿಸ್ ಓವರ್ನಲ್ಲಿ 3 ಬೌಂಡರಿ ಸಿಡಿಸಿ ಅಬ್ಬರಿಸಿದರು. ಪಡಿಕಲ್ಕೂಡ ಮಿಂಚಿನ ಆಟ ಆಡಿದ್ರು. ಈ ಜೋಡಿ 48 ರನ್ಗಳನ್ನು ಸೇರಿಸಿತ್ತು. ಈ ಹಂತದಲ್ಲಿ ಮುಸ್ತಫಿಝುರ್ 22 ರನ್ಗಳಿಸಿದ್ದ ಪಡಿಕಲ್ ವಿಕೆಟ್ ಪಡೆದು ಬ್ರೇಕ್ ಒದಗಿಸಿಕೊಟ್ಟರು. ಇಲ್ಲದ ರನ್ ಕದಿಯಲು ಹೋಗಿ ವಿರಾಟ್ ಕೊಹ್ಲಿ 25 ರನ್ಗಳಿಸಿದ್ದಾಗ ರನೌಟ್ ಆದರು.
ಶ್ರೀಕರ್ ಭರತ್ ಮತ್ತು ಗ್ಲೆನ್ ಮ್ಯಾಕ್ಸ್ ವೆಲ್ ಇನ್ನಿಂಗ್ಸ್ ಬೆಳೆಸಿದ್ರು. ಭರತ್ 35 ಎಸೆತಗಳಲ್ಲಿ 44 ರನ್ಗಳಿಸಿ ಔಟಾದರೂ ಆರ್ಸಿಬಿಯ ಬ್ಯಾಟಿಂಗ್ ಲೈನ್ ಅಪ್ನಲ್ಲಿ ಮಿಂಚಿದರು. ಆದರೆ ಮ್ಯಾಕ್ಸ್ವೆಲ್ ಅಬ್ಬರಿಸಿದ್ದು ಮಾತ್ರವಲ್ಲದೆ ಅಜೇಯ ಅರ್ಧಶತಕವನ್ನೂ ಗಳಿಸಿದರು. ಆರ್ಸಿಬಿ ಇನ್ನೂ 17 ಎಸೆತಗಳು ಬಾಕಿ ಇರುವಂತೆ ಪಂದ್ಯ ಗೆದ್ದು ಬೀಗಿತು. ಮ್ಯಾಕ್ಸ್ವೆಲ್ 30 ಎಸೆತಗಳಲ್ಲಿ ಅಜೇಯ 50 ರನ್ಗಳಿಸಿ ಮಿಂಚಿದರು.