ಟ್ರಾವಿಸ್‌ ಹೆಡ್‌(62) ಆಕರ್ಷಕ ಅರ್ಧಶತಕ ಹಾಗೂ ಬೌಲರ್‌ಗಳ ಸಂಘಟಿತ ಪ್ರದರ್ಶನದ ನೆರವಿನಿಂದ ಸೌತ್‌ ಆಫ್ರಿಕಾ ವಿರುದ್ಧದ ಸೆಮಿಫೈನಲ್‌ ಪಂದ್ಯದಲ್ಲಿ 3 ವಿಕೆಟ್‌ಗಳ ರೋಚಕ ಗೆಲುವು ಸಾಧಿಸಿದ ಆಸ್ಟ್ರೇಲಿಯಾ 2023ರ ಏಕದಿನ ವಿಶ್ವಕಪ್ ಫೈನಲ್‌ ಪ್ರವೇಶಿಸಿದೆ.
ಕೊಲ್ಕತ್ತಾದ ಈಡನ್‌ ಗಾರ್ಡನ್ಸ್‌ನಲ್ಲಿ ನಡೆದ ಪಂದ್ಯದಲ್ಲಿ ಟಾಸ್‌ ಗೆದ್ದು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡ ಸೌತ್‌ ಆಫ್ರಿಕಾ ಡೇವಿಡ್‌ ಮಿಲ್ಲರ್‌(101) ಅವರ ಶತಕದ ನೆರವಿನಿಂದ 49.4 ಓವರ್‌ಗಳಲ್ಲಿ 212 ರನ್‌ಗಳಿಸಿ ಆಲೌಟ್‌ ಆಯಿತು. ಈ ಟಾರ್ಗೆಟ್‌ ಬೆನ್ನತ್ತಿದ ಆಸ್ಟ್ರೇಲಿಯಾ ಸಂಘಟಿತ ಬ್ಯಾಟಿಂಗ್ ಪ್ರದರ್ಶನದ ಮೂಲಕ 47.2 ಓವರ್‌ಗಳಲ್ಲಿ 7 ವಿಕೆಟ್‌ ಕಳೆದುಕೊಂಡು 215 ರನ್‌ಗಳಿಸುವ ಮೂಲಕ 3 ವಿಕೆಟ್‌ಗಳಿಂದ ಗೆದ್ದುಬೀಗಿತು. ಈ ಜಯದ ಮೂಲಕ ಆಸ್ಟ್ರೇಲಿಯಾ ಏಕದಿನ ವಿಶ್ವಕಪ್‌ನಲ್ಲಿ 8ನೇ ಬಾರಿಗೆ ಫೈನಲ್‌ ಪ್ರವೇಶಿಸಿದರೆ. ಸೌತ್‌ ಆಫ್ರಿಕಾ ಮತ್ತೊಮ್ಮೆ ಸೆಮೀಸ್‌ನಲ್ಲಿ ಮುಗ್ಗರಿಸಿತು.
ಮಿಲ್ಲರ್‌ ಶತಕದ ಆಸರೆ:
ಮೊದಲು ಬ್ಯಾಟಿಂಗ್ ಆರಂಭಿಸಿದ ಸೌತ್‌ ಆಫ್ರಿಕಾ, ಇನ್ನಿಂಗ್ಸ್‌ನ ಆರಂಭಿಕ ಓವರ್‌ನಿಂದಲೇ ಆಸೀಸ್‌ ಬೌಲಿಂಗ್‌ ದಾಳಿಗೆ ಸಿಲುಕಿತು. ಇದರ ಪರಿಣಾಮ 11.5 ಓವರ್‌ಗಳಲ್ಲಿ 24 ರನ್‌ಗಳಿಗೆ ಬವುಮಾ(0), ಡಿಕಾಕ್‌(3), ದುಸೇನ್‌(6) ಮತ್ತು ಮಾರ್ಕ್ರಂ(10) ವಿಕೆಟ್‌ಗಳನ್ನ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತು. ಆದರೆ ಈ ಹಂತದಲ್ಲಿ ಕಣಕ್ಕಿಳಿದ ಅನುಭವಿ ಡೇವಿಡ್‌ ಮಿಲ್ಲರ್‌(101 ರನ್‌, 116 ಬಾಲ್‌, 8 ಬೌಂಡರಿ, 5 ಸಿಕ್ಸ್‌) ಭರ್ಜರಿ ಶತಕ ಸಿಡಿಸಿ ತಂಡಕ್ಕೆ ಆಸರೆಯಾದರು. ಇವರಿಗೆ ಹೆನ್ರಿಚ್‌ ಕ್ಲಾಸೆನ್‌(47 ರನ್‌, 48 ಬಾಲ್‌, 4 ಬೌಂಡರಿ, 2 ಸಿಕ್ಸ್‌) ಉತ್ತಮ ಸಾಥ್‌ ನೀಡಿದರು. ನಂತರ ಕೆಳ ಕ್ರಮಾಂಕದಲ್ಲಿ ಬಂದ ಕಾಟ್ಸಿಯಾ(19), ಮಹಾರಾಜ್‌(4), ರಬಾಡ(10) ಹಾಗೂ ಶಮ್ಸಿ(1*) ರನ್‌ಗಳಿಸಲಷ್ಟೇ ಶಕ್ತರಾದರು. ಇದರ ಪರಿಣಾಮ ಸೌತ್‌ ಆಫ್ರಿಕಾ 49.4 ಓವರ್‌ಗಳಲ್ಲಿ 212 ರನ್‌ಗಳಿಸಿ ಆಲೌಟ್‌ ಆಯಿತು. ಆಸ್ಟ್ರೇಲಿಯಾದ ಪರ ವೇಗಿ ಮಿಚೆಲ್‌ ಸ್ಟಾರ್ಕ್‌(3/34), ಪ್ಯಾಟ್‌ ಕಮ್ಮಿನ್ಸ್‌(3/51), ಹೇಜಲ್ವುಡ್‌(2/12) ಹಾಗೂ ಟ್ರಾವಿಸ್‌ ಹೆಡ್‌(2/21) ಉತ್ತಮ ಬೌಲಿಂಗ್‌ ಮೂಲಕ ಸೌತ್‌ ಆಫ್ರಿಕಾದ ಬ್ಯಾಟಿಂಗ್ ಬೆನ್ನೆಲುಬು ಮುರಿದರು.
ಹೆಡ್‌ ಅರ್ಧಶತಕದ ಮಿಂಚು:
ಸೌತ್‌ ಆಫ್ರಿಕಾ ನೀಡಿದ 213 ರನ್‌ಗಳ ಟಾರ್ಗೆಟ್‌ ಚೇಸ್‌ ಮಾಡಿದ ಆಸೀಸ್‌ ಸ್ಪೋಟಕ ಆರಂಭ ಪಡೆಯಿತು. ಇನ್ನಿಂಗ್ಸ್‌ ಆರಂಭಿಸಿದ ಟ್ರಾವಿಸ್‌ ಹೆಡ್‌(62 ರನ್‌, 48 ಬಾಲ್‌, 9 ಬೌಂಡರಿ, 2 ಸಿಕ್ಸ್‌) ಹಾಗೂ ಡೇವಿಡ್‌ ವಾರ್ನರ್‌(29) ಮೊದಲ ವಿಕೆಟ್‌ಗೆ 60 ರನ್‌ಗಳ ಆರಂಭ ನೀಡಿದರು. ಬಿರುಸಿನ ಆಟವಾಡಿದ ಹೆಡ್‌, ಆಕರ್ಷಕ ಅರ್ಧಶತಕ ಸಿಡಿಸಿ ತಂಡದ ಗೆಲುವಿಗೆ ಮುನ್ನುಡಿ ಬರೆದರು. ಆದರೆ ನಂತರ ಬಂದ ಮಾರ್ಷ್‌(0), ಲಬುಶೇನ್‌(18) ಹಾಗೂ ಮ್ಯಾಕ್ಸ್‌ವೆಲ್‌(1) ಬ್ಯಾಟಿಂಗ್ ವೈಫಲ್ಯ ಕಂಡರು. ಇದರ ಪರಿಣಾಮ 137 ರನ್‌ಗಳಿಗೆ 5 ವಿಕೆಟ್‌ ಕಳೆದುಕೊಂಡು ಆಘಾತಕ್ಕೆ ಸಿಲುಕಿತು.
ಈ ಹಂತದಲ್ಲಿ ಜೊತೆಯಾದ ಸ್ಟೀವ್‌ ಸ್ಮಿತ್‌(30) ಹಾಗೂ ಜೋಶ್‌ ಇಂಗ್ಲಿಸ್‌(28) ಎಚ್ಚರಿಕೆಯ ಆಟದಿಂದ ತಂಡದ ಗೆಲುವಿನ ಆಸೆಯನ್ನ ಜೀವಂತ ಇರಿಸಿದರು. ಅಂತಿಮವಾಗಿ ಮಿಚೆಲ್‌ ಸ್ಟಾರ್ಕ್‌(16*) ಹಾಗೂ ನಾಯಕ ಪ್ಯಾಟ್‌ ಕಮ್ಮಿನ್ಸ್‌(14*) ಜವಾಬ್ದಾರಿಯ ಆಟದ ಮೂಲಕ ತಂಡವನ್ನ ಗೆಲುವಿನ ದಡ ಮುಟ್ಟಿಸಿದರು. ಸೌತ್‌ ಆಫ್ರಿಕಾ ಪರವಾಗಿ ಕಾಟ್ಸಿಯಾ ಹಾಗೂ ಶಮ್ಸಿ 2 ವಿಕೆಟ್‌ ಪಡೆದರೆ. ರಬಾಡ, ಮಾರ್ಕ್ರಂ ಮತ್ತು ಮಹಾರಾಜ್‌ ತಲಾ 1 ವಿಕೆಟ್‌ ಪಡೆದರು.
ಈ ಗೆಲುವಿನೊಂದಿಗೆ 2023ರ ಏಕದಿನ ವಿಶ್ವಕಪ್ ಟೂರ್ನಿಯ ಫೈನಲ್‌ ಪ್ರವೇಶಿಸಿರುವ ಆಸ್ಟ್ರೇಲಿಯಾ ನವೆಂಬರ್‌ 19ರಂದು ಅಹ್ಮದಾಬಾದ್‌ನ ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ನಡೆಯುವ ಫೈನಲ್‌ ಪಂದ್ಯದಲ್ಲಿ ಟೀಂ ಇಂಡಿಯಾವನ್ನ ಎದುರಿಸಲಿದೆ.
RSA v AUS, Australia, South Africa, David Miller, World Cup
