ಟಿ-ಟ್ವೆಂಟಿ ಸರಣಿ- ಆಸ್ಟ್ರೇಲಿಯಾ ವಿರುದ್ಧ ಇಂಗ್ಲೆಂಡ್ಗೆ ರೋಚಕ ಜಯ
ಪ್ರವಾಸಿ ಆಸ್ಟ್ರೇಲಿಯಾ ಮೊದಲ ಟಿ-ಟ್ವೆಂಟಿ ಪಂದ್ಯದಲ್ಲಿ ಇಂಗ್ಲೆಂಡ್ ವಿರುದ್ಧ ಎರಡು ರನ್ ಗಳಿಂದ ಸೋಲು ಅನುಭವಿಸಿದೆ. ಕಡೆಯ ಓವರ್ನಲ್ಲಿ ಆಸ್ಟ್ರೇಲಿಯಾ ತಂಡ ಗೆಲ್ಲಲು 15 ರನ್ ಗಳು ಬೇಕಾಗಿದ್ದವು. ಆದ್ರೆ ಇಂಗ್ಲೆಂಡ್ ಬೌಲರ್ ಟಾಮ್ ಕುರನ್ ಅವರು 12 ರನ್ ನೀಡಿ ತಂಡವನ್ನು ಗೆಲುವಿನ ದಡ ಸೇರಿಸಿದ್ರು. ಆಸ್ಟ್ರೇಲಿಯಾದ ಮಾರ್ಕಸ್ ಸ್ಟೋರಿಸ್ ಅವರು ದಿಟ್ಟ ಹೋರಾಟ ನೀಡಿದ್ರೂ ತಂಡಕ್ಕೆ ಗೆಲುವು ದಕ್ಕಿಸಿಕೊಡಲು ವಿಫಲರಾದ್ರು.
ಸೌತಾಂಪ್ಟನ್ ನಲ್ಲಿ ಟಾಸ್ ಗೆದ್ದ ಆಸ್ಟ್ರೇಲಿಯಾ ಮೊದಲು ಇಂಗ್ಲೆಂಡ್ ತಂಡವನ್ನು ಬ್ಯಾಟಿಂಗ್ಗೆ ಆಹ್ವಾನಿಸಿತ್ತು. ಆರಂಭದಿಂದಲೇ ಜೋಸ್ ಬಟ್ಲರ್ ಅವರು ಅಬ್ಬರದ ಬ್ಯಾಟಿಂಗ್ ಪ್ರದರ್ಶನ ನೀಡಿದ್ರು. ಕೇವಲ 4 ಓವರ್ ಗಳಲ್ಲಿ ಇಂಗ್ಲೆಂಡ್ ತಂಡ 43 ರನ್ ಗಳಿಸಿತ್ತು. ಈ ಹಂತದಲ್ಲಿ ಎಂಟು ರನ್ ಗಳಿಸಿದ್ದ ಜೋನಿ ಬೇರ್ ಸ್ಟೋವ್ ಅವರು ಎಂಟು ರನ್ ಗಳಿಸಿ ಪೆವಿಲಿಯನ್ ಹಾದಿ ಹಿಡಿದ್ರು. ಹಾಗೇ 29 ಎಸೆತಗಳಲ್ಲಿ 5 ಬೌಂಡರಿ ಮತ್ತು ಎರಡು ಸಿಕ್ಸರ್ ಸಿಡಿಸಿ 44 ರನ್ ಗಳಿಸಿದ್ದ ಜೋಸ್ ಬಟ್ಲರ್ ಕೂಡ ತನ್ನ ಹೋರಾಟವನ್ನು ಮುಗಿಸಿದ್ರು.
ನಂತರ ಡೇವಿಡ್ ಮಲಾನ್ ಅವರು ಆಕ್ರಮಣಕಾರಿ ಆಟದ ಜೊತೆ ಜವಾಬ್ದಾರಿಯುತವಾಗಿ ಬ್ಯಾಟ್ ಬೀಸಿ ತಂಡದ ಮೊತ್ತವನ್ನು ಏರಿಸಿದ್ರು. ಒಂದು ಕಡೆ ವಿಕೆಟ್ ಉರುಳುತ್ತಿದ್ರೂ ಡೇವಿಡ್ ಮಲಾನ್ ಅವರು 18 ಓವರ್ ಗಳ ತನಕ ಕ್ರೀಸ್ ನಲ್ಲಿ ಉಳಿದು ತಂಡದ ಮೊತ್ತವನ್ನು 150ರ ಗಡಿ ಸಮೀಪಿಸಿದ್ರು. ಅಂತಿಮವಾಗಿ ಇಂಗ್ಲೆಂಡ್ ತಂಡ ಏಳು ವಿಕೆಟ್ ನಷ್ಟಕ್ಕೆ 162 ರನ್ ದಾಖಲಿಸಿತ್ತು.
ಗೆಲ್ಲಲು 163 ರನ್ ಗಳ ಸವಾಲನ್ನು ಬೆನ್ನಟ್ಟಿದ್ದ ಆಸ್ಟ್ರೇಲಿಯಾ ತಂಡಕ್ಕೆ ಡೇವಿಡ್ ವಾರ್ನರ್ ಮತ್ತು ನಾಯಕ ಆರೋನ್ ಫಿಂಚ್ ಅವರು ಮೊದಲ ವಿಕೆಟ್ಗೆ 98 ರನ್ ಕಲೆ ಹಾಕಿದ್ರು. ಈ ಹಂತದಲ್ಲಿ ನಾಯಕ ಆರೋನ್ ಫಿಂಚ್ ಅವರು 46 ರನ್ ಗಳಿಸಿ ಔಟಾದ್ರು. ನಂತರ ಸ್ಟೀವನ್ ಸ್ಮಿತ್ 18 ರನ್ ಗೆ ಸೀಮಿತವಾದ್ರೆ, ಗ್ಲೇನ್ ಮ್ಯಾಕ್ಸ್ ವೆಲ್ ಒಂದು ರನ್ ಗಳಿಸಿ ನಿರಾಸೆ ಅನುಭವಿಸಿದ್ರು. ಮತ್ತೊಂದೆಡೆ ಡೆವಿಡ್ ವಾರ್ನರ್ 58 ರನ್ ದಾಖಲಿಸಿ ಪೆವಿಲಿಯನ್ಗೆ ಹಿಂತಿರುಗಿದ್ರು. ಹಾಗೇ ಅಲೆಕ್ಸ್ ಕಾರೇಯ್ 1 ರನ್ ಹಾಗೂ ಆಶ್ಟನ್ ಆಗರ್ ರನ್ ಗಳಿಸುವ ಆತುರದಲ್ಲಿ ರನೌಟಾದ್ರು. ಅಂತಿಮವಾಗಿ ಮಾರ್ಕಸ್ ಸ್ಟೋರಿಸ್ (ಅಜೇಯ 23) ಗೆಲುವಿಗಾಗಿ ಹೋರಾಟ ನಡೆಸಿದ್ರೂ ಪ್ರಯೋಜನವಾಗಲಿಲ್ಲ. ಡೇವಿಡ್ ಮಲಾನ್ ಅವರು ಪಂದ್ಯ ಶ್ರೇಷ್ಠರಾಗಿ ಹೊರಹೊಮ್ಮಿದ್ರು. ಈ ಗೆಲುವಿನೊಂದಿಗೆ ಇಂಗ್ಲೆಂಡ್ ಸರಣಿಯಲ್ಲಿ 1-0ಯಿಂದ ಮುನ್ನಡೆ ಸಾಧಿಸಿದೆ.
