ಪ್ರಧಾನಿ ನರೇಂದ್ರ ಮೋದಿಯವರು ಇತ್ತೀಚೆಗೆ ದೇಶದ ಜನತೆಗೆ ಕೆಲವು ಮಹತ್ವದ ಮನವಿಗಳನ್ನು ಮಾಡಿದ್ದಾರೆ. ಚಿನ್ನ ಖರೀದಿಸಬೇಡಿ, ವಾಹನ ಬಳಕೆ ತಗ್ಗಿಸಿ, ವಿದೇಶಿ ಪ್ರವಾಸ ಬೇಡ ಎಂಬಂತಹ ಸಲಹೆಗಳ ಹಿಂದೆ ದೇಶದ ಆರ್ಥಿಕತೆಯನ್ನು ಸದೃಢಗೊಳಿಸುವ ದೊಡ್ಡ ಉದ್ದೇಶ ಅಡಗಿದೆ. ಈ ಕರೆಯ ನಿಜವಾದ ಕಾರಣ ಮತ್ತು ಅಂಕಿ ಅಂಶಗಳ ಸಂಪೂರ್ಣ ಮಾಹಿತಿ ಇಲ್ಲಿದೆ.
ಮೋದಿಯವರು ಜನರಿಗೆ ನೀಡಿದ ಪ್ರಮುಖ ಸಲಹೆಗಳು
ಕೆಲಸದ ಸ್ಥಳಕ್ಕೆ ಹೋಗುವ ಬದಲು ಸಾಧ್ಯವಾದಷ್ಟು ಮನೆಯಿಂದಲೇ ಕೆಲಸ ಅಂದರೆ ವರ್ಕ್ ಫ್ರಂ ಹೋಮ್ ಮಾಡುವುದಕ್ಕೆ ಆದ್ಯತೆ ನೀಡಿ. ಸ್ವಂತ ವಾಹನಗಳ ಬದಲಾಗಿ ಮೆಟ್ರೋ ಅಥವಾ ಸಾರ್ವಜನಿಕ ಸಾರಿಗೆ ಬಳಸಿ. ಅನಿವಾರ್ಯವಿದ್ದರೆ ಕಾರ್ ಪೂಲಿಂಗ್ ಮಾಡಿ ಅಥವಾ ಎಲೆಕ್ಟ್ರಿಕ್ ವಾಹನಗಳನ್ನು ಬಳಸಿ. ಒಂದು ವರ್ಷದವರೆಗೆ ಮದುವೆ ಸಮಾರಂಭಗಳಿಗೆ ಚಿನ್ನ ಖರೀದಿಸುವುದನ್ನು ನಿಲ್ಲಿಸಿ ಮತ್ತು ವಿದೇಶಿ ಪ್ರವಾಸಗಳನ್ನು ಮುಂದೂಡಿ. ಕೃಷಿಯಲ್ಲಿ ರಾಸಾಯನಿಕ ರಸಗೊಬ್ಬರ ಬಳಕೆಯನ್ನು ಶೇಕಡಾ 50 ರಷ್ಟು ಕಡಿಮೆ ಮಾಡಿ ಸಾವಯವ ಪದ್ಧತಿಗೆ ಒತ್ತು ನೀಡಿ. ಡೀಸಲ್ ಪಂಪ್ ಬದಲು ಸೋಲಾರ್ ಪಂಪ್ ಬಳಸಿ. ಅಡುಗೆ ಎಣ್ಣೆಯ ಬಳಕೆಯನ್ನು ಮಿತಿಗೊಳಿಸಿ ಹಾಗೂ ವಿದೇಶಿ ಬ್ರ್ಯಾಂಡ್ ಗಳ ಬದಲಾಗಿ ಸ್ವದೇಶಿ ವಸ್ತುಗಳನ್ನೇ ಬಳಸಿ.
ಈ ಸಲಹೆಗಳ ಹಿಂದಿರುವ ಅಸಲಿ ಕಾರಣವೇನು
ಭಾರತವು ವಿದೇಶಗಳಿಂದ ಆಮದು ಮಾಡಿಕೊಳ್ಳುವ ವಸ್ತುಗಳಿಗೆ ಅತಿ ಹೆಚ್ಚು ಹಣವನ್ನು ಪಾವತಿಸುತ್ತಿದೆ. ಇದರಿಂದ ದೇಶದ ವಿದೇಶಿ ವಿನಿಮಯ ಮೀಸಲು ನಿಧಿ ಕಡಿಮೆಯಾಗುತ್ತಿದೆ ಮತ್ತು ಕರೆಂಟ್ ಅಕೌಂಟ್ ಡೆಫಿಸಿಟ್ ಅಂದರೆ ಚಾಲ್ತಿ ಖಾತೆ ಕೊರತೆ ಗಣನೀಯವಾಗಿ ಹೆಚ್ಚುತ್ತಿದೆ. ಪ್ರಧಾನಿಯವರ ಈ ಎಲ್ಲಾ ಕರೆಗಳು ಭಾರತದ ಆಮದು ವೆಚ್ಚವನ್ನು ತಗ್ಗಿಸಿ ದೇಶದ ಆರ್ಥಿಕತೆಯನ್ನು ಸುಧಾರಿಸುವ ಗುರಿ ಹೊಂದಿವೆ. ಮೋದಿಯವರು ಪಟ್ಟಿ ಮಾಡಿದ ಎಲ್ಲಾ ವಸ್ತುಗಳು ವಿದೇಶದಿಂದ ಆಮದು ಮಾಡಿಕೊಳ್ಳುವಂತಹವುಗಳೇ ಆಗಿವೆ.
ಆಮದು ವೆಚ್ಚದ ಆಘಾತಕಾರಿ ಅಂಕಿ ಅಂಶಗಳು
ಭಾರತದ ಒಟ್ಟು ಆಮದು ವೆಚ್ಚದಲ್ಲಿ ಕೇವಲ ನಾಲ್ಕು ಪ್ರಮುಖ ವಸ್ತುಗಳ ಪಾಲು ಅತಿ ಹೆಚ್ಚಾಗಿದೆ. 2025 26ರ ಅಂದಾಜಿನ ಪ್ರಕಾರ ಭಾರತದ ಆಮದು ವೆಚ್ಚದ ಸ್ಥಿತಿಗತಿ ಹೀಗಿದೆ.
ಕಚ್ಚಾ ತೈಲಕ್ಕೆ ಭಾರತವು 134.7 ಬಿಲಿಯನ್ ಡಾಲರ್ ವೆಚ್ಚ ಮಾಡುತ್ತಿದೆ.
ಚೀನಾ ಬಿಟ್ಟರೆ ಅತಿ ಹೆಚ್ಚು ಚಿನ್ನ ಆಮದು ಮಾಡಿಕೊಳ್ಳುವ ದೇಶ ಭಾರತವಾಗಿದ್ದು ಚಿನ್ನದ ಆಮದಿಗೆ 72 ಬಿಲಿಯನ್ ಡಾಲರ್ ಖರ್ಚಾಗುತ್ತಿದೆ. ಇದು ದೇಶದ ಒಟ್ಟು ಆಮದು ವೆಚ್ಚದ ಶೇಕಡಾ 9 ರಷ್ಟಿದೆ.
ಅಡುಗೆ ಎಣ್ಣೆ ಆಮದಿಗೆ 19.5 ಬಿಲಿಯನ್ ಡಾಲರ್ ನೀಡಲಾಗುತ್ತಿದೆ.
ರಸಗೊಬ್ಬರ ಆಮದಿಗೆ 14.5 ಬಿಲಿಯನ್ ಡಾಲರ್ ವ್ಯಯವಾಗುತ್ತಿದೆ.
ಈ ನಾಲ್ಕು ವಸ್ತುಗಳ ಆಮದಿಗೆ ಮಾತ್ರ ಭಾರತವು ಒಟ್ಟು 240.7 ಬಿಲಿಯನ್ ಡಾಲರ್ ಹಣವನ್ನು ವಿದೇಶಕ್ಕೆ ನೀಡುತ್ತಿದೆ. ಇದು ಭಾರತದ ಒಟ್ಟು ಆಮದು ವೆಚ್ಚದ ಶೇಕಡಾ 31.1 ರಷ್ಟಿದೆ ಎಂಬುದು ಗಮನಿಸಬೇಕಾದ ಅಂಶ.
ಬದಲಾವಣೆಯಿಂದ ಆಗುವ ಪ್ರಯೋಜನವೇನು
ಜನರು ಪ್ರಧಾನಿಯವರ ಈ ಕರೆಯನ್ನು ಅರ್ಧದಷ್ಟಾದರೂ ಪಾಲಿಸಿದರೆ ಭಾರತದ ಆಮದು ವೆಚ್ಚ ಶೇಕಡಾ 20 ರಷ್ಟು ಕಡಿಮೆಯಾಗುವ ಸಾಧ್ಯತೆಯಿದೆ. ಇದರಿಂದ ದೇಶದ ವಿದೇಶಿ ವಿನಿಮಯ ಉಳಿತಾಯವಾಗುತ್ತದೆ ಮತ್ತು ವ್ಯಾಪಾರ ಕೊರತೆ ಕಡಿಮೆಯಾಗಿ ರೂಪಾಯಿಯ ಮೌಲ್ಯ ಕೂಡ ವೃದ್ಧಿಯಾಗಲಿದೆ. ಇದು ಯಾವುದೇ ವಿಪತ್ತಿನ ಮುನ್ಸೂಚನೆಯಲ್ಲ ಬದಲಾಗಿ ದೇಶವನ್ನು ಆರ್ಥಿಕವಾಗಿ ಸ್ವಾವಲಂಬಿಯನ್ನಾಗಿ ಮಾಡುವ ಮಹತ್ವದ ಹೆಜ್ಜೆಯಾಗಿದೆ. ಮೋದಿಯವರ ಈ ಕರೆಗೆ ಸಾರ್ವಜನಿಕರು ಹೇಗೆ ಸ್ಪಂದಿಸುತ್ತಾರೆ ಎನ್ನುವುದರ ಮೇಲೆ ದೇಶದ ಆರ್ಥಿಕ ಭವಿಷ್ಯ ಅಡಗಿದೆ.
