ಹಿಂದೂ ಸಮುದಾಯದಂತೆ ಮುಸ್ಲಿಮರಲ್ಲಿ ಕೂಡ 93 ಜಾತಿ ಮತ್ತು ಉಪಜಾತಿಗಳು ಅಸ್ತಿತ್ವದಲ್ಲಿದ್ದು, ಜಾತಿ ಸಮೀಕ್ಷೆಯಲ್ಲಿ ಈ ಅಂಶಗಳು ಹೊರಹೊಮ್ಮಿರುವುದಾಗಿ ರಾಜ್ಯ ಹಿಂದುಳಿದ ವರ್ಗಗಳ ಆಯೋಗದ ಅಧ್ಯಕ್ಷ ಜಯಪ್ರಕಾಶ್ ಹೆಗ್ಡೆ ಮಾಧ್ಯಮಗಳಿಗೆ ತಿಳಿಸಿದರು.
ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, “ಮುಸ್ಲಿಮರ ಮನವಿಯ ಮೇರೆಗೆ ಜಾತಿ, ಉಪಜಾತಿಗಳ ವಿವರಗಳನ್ನು ಪರಿಶೀಲನೆ ಮಾಡಿ ನಾವು ನಿರ್ಧಾರ ಕೈಗೊಂಡಿದ್ದೇವೆ. ಮುಸ್ಲಿಮರನ್ನು ಸಾಮಾನ್ಯವಾಗಿ ಒಂದೇ ವಿಭಾಗದಲ್ಲಿ ಸೇರಿಸಿದ್ದೇವೆ, ಆದರೆ ಕೆಲವು ಉಪಜಾತಿಗಳನ್ನು ಪ್ರತ್ಯೇಕವಾಗಿ ಗುರುತಿಸಲಾಗಿದೆ,” ಎಂದು ಹೇಳಿದರು.
ಹೆಗ್ಡೆ ಅವರು ‘ಪಿಂಜಾರ’ ಮತ್ತು ‘ಪಿಂಜಾರ ಜಪ್ಪರ್’ ಎಂಬಂತಹ ಉಪಜಾತಿಗಳ ಉದಾಹರಣೆ ನೀಡುತ್ತಾ, ಕೆಲವು ಸಮುದಾಯಗಳನ್ನು ಅಲೆಮಾರಿಗಳ ವಿಭಾಗದಲ್ಲೂ ಸೇರಿಸಲಾಗಿದೆ ಎಂಬುದನ್ನು ಖಚಿತಪಡಿಸಿದರು.
ಜಾತಿ ಗಣತಿ ವರದಿಯ ವಿಷಯದಲ್ಲಿ ಮಾತನಾಡಿದ ಅವರು, “ರಾಜ್ಯ ಸರ್ಕಾರ ಸಿದ್ಧಪಡಿಸಿದ ವರದಿಯಲ್ಲಿ ಯಾವುದೇ ಪ್ರಮುಖ ದೋಷವಿಲ್ಲ. ಸಣ್ಣ ತಪ್ಪುಗಳು ಇರಬಹುದು, ಆದರೆ ಅದನ್ನು ಕ್ಯಾಬಿನೆಟ್ನಲ್ಲಿ ಚರ್ಚಿಸಿ ಅಂತಿಮ ನಿರ್ಧಾರ ಕೈಗೊಳ್ಳಲಾಗುವುದು,” ಎಂದರು.
ಜಾತಿ ಗಣತಿ ಕುರಿತಾಗಿ ಕೆಲವರು ವರದಿಯನ್ನು ಓದದೆ ಕೇವಲ ಅಸಮಾಧಾನ ವ್ಯಕ್ತಪಡಿಸುತ್ತಿರುವ ಬಗ್ಗೆ ಕಳವಳ ವ್ಯಕ್ತಪಡಿಸಿದ ಹೆಗ್ಡೆ, “ಆಯೋಗದ ಸದಸ್ಯರು ಹಾಗೂ ಕಾರ್ಯದರ್ಶಿಯವರು ವರದಿಗೆ ಸಹಿ ಹಾಕಿದ ಬಳಿಕವೇ ಸರ್ಕಾರಕ್ಕೆ ಸಲ್ಲಿಸಲಾಗಿದೆ,” ಎಂದು ಸ್ಪಷ್ಟಪಡಿಸಿದರು.
EWS ಮೀಸಲಾತಿ ಕುರಿತು ಸ್ಪಷ್ಟನೆ
ಆರ್ಥಿಕವಾಗಿ ಹಿಂದುಳಿದ ವರ್ಗದ (EWS) ಮೀಸಲಾತಿಯನ್ನು ಕೇಂದ್ರ ಸರ್ಕಾರ ಶೇಕಡಾ 10ರಷ್ಟು ಹೆಚ್ಚಿಸಿದ್ದು, ಸಂವಿಧಾನ ತಿದ್ದುಪಡಿಯ ಮೇಲ್ವಿಚಾರಣೆಗೆ ನ್ಯಾಯಾಲಯ ಸಮ್ಮತಿ ನೀಡಿದೆ. “ಈ ಬಗ್ಗೆ ಭವಿಷ್ಯದಲ್ಲಿ ಏನು ನಿರ್ಧಾರವಾಗುತ್ತದೋ ತಿಳಿಯದು. ಹಾಗೂ ಇದು ನ್ಯಾಯಾಂಗದ ವಿವೇಚನೆಗೆ ಒಳಪಟ್ಟಿವೆ,” ಎಂದು ಹೆಗ್ಡೆ ಹೇಳಿದರು.
