ನವದೆಹಲಿ: ಭಾರತದ ಅಭಿವೃದ್ಧಿಯ ಪಥವನ್ನು ಜಗತ್ತೇ ಬೆರಗಿನಿಂದ ನೋಡುತ್ತಿರುವ ಈ ಸಂದರ್ಭದಲ್ಲಿ, ದೇಶದ ಒಳಗಿರುವ ಕೆಲವು ಶಕ್ತಿಗಳು ಅವ್ಯವಸ್ಥೆ ಮತ್ತು ಅಶಾಂತಿಯ ಕನಸು ಕಾಣುತ್ತಿವೆ ಎಂದು ಪ್ರಧಾನಿ ನರೇಂದ್ರ ಮೋದಿ ಅವರು ಕಾಂಗ್ರೆಸ್ ಮತ್ತು ಲೋಕಸಭೆಯ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ವಿರುದ್ಧ ಕೆಂಡ ಕಾರಿದ್ದಾರೆ. ಎನ್‌ಡಿಟಿವಿ ವಿಶ್ವ ಸಮಾವೇಶ 2026ರ ಉದ್ಘಾಟನಾ ಭಾಷಣದಲ್ಲಿ ದೇಶದ ಭವಿಷ್ಯದ ಬಗ್ಗೆ ಮಾತನಾಡಿದ ಪ್ರಧಾನಿ, ಅತಿ ಹೆಚ್ಚು ಸಮಯವನ್ನು ಕಾಂಗ್ರೆಸ್ ಪಕ್ಷದ ಸಿದ್ಧಾಂತ ಮತ್ತು ಒಂದು ಕುಟುಂಬದ ಹಠಮಾರಿತನವನ್ನು ಟೀಕಿಸಲು ಬಳಸಿಕೊಂಡರು. ಕಾಂಗ್ರೆಸ್ ಎಂಬುದು ಒಂದು ಪರಾವಲಂಬಿ ಸಸ್ಯವಾಗಿದ್ದು, ಅದು ಇತರರನ್ನು ಬೆಳೆಯಲು ಬಿಡುವುದಿಲ್ಲ ಎಂದು ಅವರು ಕಿಡಿಕಾರಿದ್ದಾರೆ.
ಶ್ರೀಹರಿಕೋಟಾದ ಉಡಾವಣೆಗಿಂತಲೂ ಹೆಚ್ಚಾಗಿದೆ ಕಾಂಗ್ರೆಸ್ ನಾಯಕನ ಲಾಂಚ್
Related posts
ರಾಹುಲ್ ಗಾಂಧಿ ಅವರ ಹೆಸರನ್ನು ನೇರವಾಗಿ ಪ್ರಸ್ತಾಪಿಸದೆ ತೀವ್ರ ವ್ಯಂಗ್ಯವಾಡಿದ ಪ್ರಧಾನಿ ಮೋದಿ, ಕಾಂಗ್ರೆಸ್ ತನ್ನ ವಿಫಲ ಯೋಜನೆಯನ್ನು ಲಾಂಚ್ ಮಾಡಲು ದೇಶವನ್ನೇ ಪಣಕ್ಕಿಟ್ಟಿದೆ ಎಂದು ಕುಟುಕಿದ್ದಾರೆ. ಶ್ರೀಹರಿಕೋಟಾದ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದಲ್ಲಿ ವರ್ಷಕ್ಕೆ ಎಷ್ಟು ಕ್ಷಿಪಣಿ ಉಡಾವಣೆಗಳಾಗುತ್ತವೆಯೋ, ಅದಕ್ಕಿಂತಲೂ ಹೆಚ್ಚು ಬಾರಿ ಕಾಂಗ್ರೆಸ್ ತನ್ನ ನಾಯಕನನ್ನು ಮುಂಚೂಣಿಗೆ ತರಲು ಪ್ರಯತ್ನಿಸಿ ವಿಫಲವಾಗಿದೆ. ಪದೇ ಪದೇ ಅದೇ ಹಳೆಯ ಬಾಟಲಿಯಲ್ಲಿ ಹೊಸ ಮದ್ಯ ತುಂಬುವಂತೆ ವಿಫಲ ನಾಯಕತ್ವವನ್ನು ಜನರ ಮೇಲೆ ಹೇರಲು ಕಾಂಗ್ರೆಸ್ ಹವಣಿಸುತ್ತಿದೆ ಎಂದು ಅವರು ಛೇಡಿಸಿದ್ದಾರೆ.
ದ್ರಾಕ್ಷಿ ಹುಳಿ ಎಂದ ಮಾತ್ರಕ್ಕೆ ಬಳ್ಳಿಯನ್ನೇ ನಾಶ ಮಾಡುವುದು ಸರಿಯೇ?
ಅಧಿಕಾರ ಕಳೆದುಕೊಂಡ ನಂತರ ಕಾಂಗ್ರೆಸ್ ಪಕ್ಷಕ್ಕೆ ದೇಶದ ಸಾಧನೆಗಳು ಜೀರ್ಣಿಸಿಕೊಳ್ಳಲು ಸಾಧ್ಯವಾಗುತ್ತಿಲ್ಲ. ತನಗೆ ಎಟುಕದ ದ್ರಾಕ್ಷಿ ಹುಳಿ ಎಂಬ ಗಾದೆಯಂತೆ, ಅಧಿಕಾರ ಸಿಗದ ಕೋಪಕ್ಕೆ ಇಡೀ ಪ್ರಜಾಪ್ರಭುತ್ವದ ಬಳ್ಳಿಯನ್ನೇ ನಾಶ ಮಾಡಲು ಹೊರಟಿದೆ ಎಂದು ಮೋದಿ ಆರೋಪಿಸಿದ್ದಾರೆ. ಇಡೀ ಜಗತ್ತು ಭಾರತವನ್ನು ಹೊಸ ವ್ಯವಸ್ಥೆಯ ನಾಯಕ ಎಂದು ಗುರುತಿಸುತ್ತಿದ್ದರೆ, ಕಾಂಗ್ರೆಸ್ ನಾಯಕರು ವಿದೇಶಗಳಿಗೆ ಹೋಗಿ ದೇಶಕ್ಕೆ ಅಪಖ್ಯಾತಿ ತರುತ್ತಿದ್ದಾರೆ. ಭಾರತದ ಆಂತರಿಕ ವಿಚಾರಗಳಲ್ಲಿ ವಿದೇಶಿಯರು ಮಧ್ಯಪ್ರವೇಶ ಮಾಡಬೇಕು ಎಂದು ಹಂಬಲಿಸುವುದು ದೇಶದ ಸಾರ್ವಭೌಮತ್ವಕ್ಕೆ ಮಾಡುವ ಅವಮಾನ ಎಂದು ಅವರು ಗುಡುಗಿದ್ದಾರೆ.
ಒಂದು ಕುಟುಂಬದ ಹೊರೆಯಿಂದ ಕುಸಿಯುತ್ತಿದೆ ಕಾಂಗ್ರೆಸ್
ನೆಹರೂ ಗಾಂಧಿ ಕುಟುಂಬದ ನಾಯಕತ್ವವು ಕಾಂಗ್ರೆಸ್ ಪಕ್ಷಕ್ಕೆ ಶಾಪವಾಗಿ ಪರಿಣಮಿಸಿದೆ ಎಂಬ ಸತ್ಯ ಸ್ವತಃ ಆ ಪಕ್ಷದ ಹಿರಿಯ ನಾಯಕರಿಗೂ ತಿಳಿದಿದೆ. ಆದರೆ ಅವರು ಅದನ್ನು ಬಹಿರಂಗವಾಗಿ ಹೇಳಲು ಹೆದರುತ್ತಾರೆ ಎಂದು ಮೋದಿ ವಿಶ್ಲೇಷಿಸಿದ್ದಾರೆ. ಒಂದು ಕುಟುಂಬದ ವೈಫಲ್ಯದ ಕಳಂಕವನ್ನು ಮರೆಮಾಚಲು ದೇಶದ ಅಭಿವೃದ್ಧಿಯನ್ನು ಬಲಿ ಕೊಡಲಾಗುತ್ತಿದೆ. ಈ ಪರಾವಲಂಬಿ ಬುದ್ಧಿಯಿಂದಾಗಿ ಕಾಂಗ್ರೆಸ್ ತನ್ನ ಅಸ್ತಿತ್ವವನ್ನೇ ಕಳೆದುಕೊಳ್ಳುತ್ತಿದೆ ಮತ್ತು ದೇಶದ ಹಿತಾಸಕ್ತಿಯನ್ನು ಗಾಳಿಗೆ ತೂರುತ್ತಿದೆ ಎಂದು ಪ್ರಧಾನಿ ಮೋದಿ ತಮ್ಮ ಭಾಷಣದುದ್ದಕ್ಕೂ ಕಾಂಗ್ರೆಸ್ ವಿರುದ್ಧ ಬೆಂಕಿ ಉಗುಳಿದ್ದಾರೆ.
