ಬಗೆದಷ್ಟು ಬಹಿರಂಗಗೊಳ್ಳುತ್ತಿದೆ ಚಂದ್ರನಲ್ಲಿನ ನಿಗೂಢ ಅಂಶ: ಗಂಧಕ ಪತ್ತೆ
A mysterious element in the moon is being revealed: Sulfur discovered
ಚಂದ್ರನ ದಕ್ಷಿಣ ಧ್ರುವದ ಮೇಲೆ ಭಾರತ ಕಾಲಿಟ್ಟು ಏಳು ದಿನಗಳು ಕಳೆದವು. ಚಂದ್ರನ ದಕ್ಷಿಣ ಧ್ರುವದ ತನ್ನ ಸಂಶೋಧನೆ ಆರಂಭಿಸಿರುವ ಪ್ರಜ್ಞಾನ್ ರೋವರ್ ಇತ್ತೀಚೆಗೆ ಅಲ್ಲಿನ ತಾಪಮಾನದ ಬಗ್ಗೆ ತಿಳಿಸಿತ್ತು. ಇದೀಗ ರೋವರ್ ಮತ್ತೊಂದು ಸಂದೇಶವನ್ನು ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ ಅಂದರೆ ಇಸ್ರೋಗೆ ರವಾನಿಸಿದೆ. ಅದು ದಕ್ಷಿಣ ಧ್ರುವದಲ್ಲಿ ಗಂಧಕ ಅಂದರೆ ಸಲ್ಟರ್ ಮೂಲಧಾತು ಇರುವುದನ್ನು ಖಚಿತಪಡಿಸಿದೆ.
ಅಲ್ಲದೇ ಗಂಧಕ ಸ್ಥಳದಲ್ಲಿ ಘನೀಕೃತ ಸ್ಥಿತಿಯಲ್ಲಿ ನೀರು ಇದೆ ಎಂದು ಹೇಳುವ ಮೂಲಕ ಇಸ್ರೋ ವಿಜ್ಞಾನಿಗಳ ಊಹೆ ನಿಜವಾಗಿದೆ. ರೋವರ್ನಲ್ಲಿ ಅಳವಡಿಸಿರುವ ಲೇಸರ್- ಇಂಡ್ಯೂಸ್ಟ್ ಬ್ರೇಕ್ಡೌನ್ ಸ್ಪೆಕ್ಟೋಸ್ಕೋಪ್ (ಲಿಬ್) ತನ್ನ ಕೆಲಸವನ್ನು ಆರಂಭಿಸಿದ್ದು, ತನ್ನ ಮೊದಲ ಯತ್ನದಲ್ಲೇ ಚಂದ್ರನ ದಕ್ಷಿಣ ಧ್ರುವದಲ್ಲಿ ಗಂಧಕ ಇರುವುದನ್ನು ಪತ್ತೆ ಮಾಡಿದೆ.
ಆರ್ಬಿಟರ್ಗಳಿಂದ ಸಾಧ್ಯವಾಗದ ಸಂಶೋಧನೆಯನ್ನು ರೋವರ್ ಮಾಡಿದೆ. ಇದರೊಂದಿಗೆ ಈ ಮೊದಲೇ ನಿರೀಕ್ಷಿಸಿದ್ದಂತೆ ಅಲ್ಯುಮಿನಿಯಂ, ಕ್ಯಾಲ್ಸಿಯಂ, ಕಬ್ಬಿಣ, ಕ್ರೋಮಿಯಂ, ಟೈಟಾನಿಯಂ, ಮ್ಯಾಂಗನೀಸ್, ಸಿಲಿಕಾನ್ ಮತ್ತು ಆಮ್ಲಜನಕ ಪತ್ತೆಯಾಗಿದೆ. ಇನ್ನೂ ಜಲಜನಕಕ್ಕಾಗಿ ಹುಡುಕಾಟ ಮುಂದುವರೆದಿದೆ.
ದೇಶದ ಮಹಾತ್ವಾಕಾಂಕ್ಷಿ ಚಂದ್ರಯಾನ-2ರ ನೌಕೆಯ ಅರ್ಧ ಅವಧಿ ಮಂಗಳವಾರಕ್ಕೆ ಮುಕ್ತಾಯಗೊಂಡಿದೆ. ಅಂದರೇ ಇಸ್ರೋ ಹೇಳಿದ್ದ 14 ದಿನಗಳಲ್ಲಿ 7 ದಿನಗಳಲ್ಲಿ ಮುಕ್ತಾಯಗೊಂಡಿದೆ.
ಚಂದ್ರಯಾನ 3 ನೌಕೆಯ ಭಾಗವಾಗಿದ್ದ ವಿಕ್ರಂ ಲ್ಯಾಂಡರ್ ಮತ್ತು ಪ್ರಜ್ಞಾನ್ ರೋವರ್ ಆಗಸ್ಟ್ 23ರಂದು ಇವು ಚಂದ್ರನ ದಕ್ಷಿಣ ಧ್ರುವದ ಮೇಲೆ ಇಳಿದಿದ್ದವು. ಇವು ಚಂದ್ರನಲ್ಲಿ 14 ದಿನಗಳು ಕಾರ್ಯನಿರ್ವಹಿಸುತ್ತವೆ ಎಂದು ಇಸ್ರೋ ಹೇಳಿತ್ತು. ಈ ಪೈಕಿ 7 ದಿನ ಇದೀಗ ಪೂರ್ಣಗೊಂಡಿದ್ದು, ಸೆಪ್ಟೆಂಬರ್ 5 ರವರೆಗೆ ಅಂದರೆ ಇನ್ನು 7 ದಿನ ಕಾರ್ಯಾಚರಣೆಯ ಅವಕಾಶ ಉಳಿಸಿಕೊಂಡಿದೆ.
