ಮಹಾರಾಷ್ಟ್ರದ ಪೆಟ್ರೋಲ್ ಪಂಪ್‌ಗಳಲ್ಲಿ ಡಿಜಿಟಲ್ ಪಾವತಿಗೆ ತಾತ್ಕಾಲಿಕ ಬ್ರೇಕ್ ಬಿದ್ದಿದೆ. ಇಂದಿನಿಂದ UPI ಮತ್ತು ಕಾರ್ಡ್ ಇತರ ಡಿಜಿಟಲ್ ಮಾಧ್ಯಮಗಳ ಮೂಲಕ ಪಾವತಿಯನ್ನು ಸ್ವೀಕರಿಸದೇ ಇರುವುದು ಎಂಬ ನಿರ್ಧಾರವನ್ನು ಪೆಟ್ರೋಲ್ ಪಂಪ್ ಮಾಲೀಕರು ಘೋಷಿಸಿದ್ದಾರೆ. ಇದರ ಹಿಂದೆ ಸೈಬರ್ ವಂಚನೆ ಪ್ರಕರಣಗಳ ಏರಿಕೆ ಪ್ರಮುಖ ಕಾರಣವಾಗಿದೆ.
ಹಲವು ನಗರಗಳ ಪೆಟ್ರೋಲ್ ಡೀಲರ್ಸ್ ಅಸೋಸಿಯೇಷನ್‌ಗಳು ಈ ನಿರ್ಧಾರಕ್ಕೆ ಬೆಂಬಲ ವ್ಯಕ್ತಪಡಿಸಿವೆ. ಅವರ ಪ್ರಕಾರ, ವಂಚಕರು ಬೇರೆಯವರ ಬ್ಯಾಂಕ್ ಡಿಟೇಲ್ಸ್ ಬಳಸಿಕೊಂಡು ಪಾವತಿ ಮಾಡುತ್ತಿದ್ದಾರೆ. ನಂತರ ನಿಜವಾದ ಖಾತೆದಾರರು ದೂರು ನೀಡಿದಾಗ, ವಹಿವಾಟು ರದ್ದಾಗುತ್ತಿದ್ದು, ಪಂಪ್ ಮಾಲೀಕರಿಗೆ ನಷ್ಟವಾಗುತ್ತಿದೆ.
ಬ್ಯಾಂಕ್ ಖಾತೆಗಳು ಬ್ಲಾಕ್ ಆಗುವ ಭೀತಿ
ವಿದರ್ಭ ಹಾಗೂ ನಾಸಿಕ್‌ನ ಪೆಟ್ರೋಲ್ ಡೀಲರ್ಸ್ ಅಸೋಸಿಯೇಷನ್‌ಗಳ ಪ್ರಕಾರ, ಹಲವು ಪಂಪ್ ಮಾಲೀಕರ ಬ್ಯಾಂಕ್ ಖಾತೆಗಳು ಈ ಕಾರಣದಿಂದ ಬ್ಲಾಕ್ ಆಗಿವೆ. ಇದರಿಂದ ಆರ್ಥಿಕ ನಷ್ಟವಷ್ಟೇ ಅಲ್ಲ, ಇತರ ವ್ಯವಹಾರಗಳಿಗೂ ತೊಂದರೆ ಉಂಟಾಗಿದೆ. ಅಧ್ಯಕ್ಷ ವಿಜಯ್ ಠಾಕ್ರೆ ಈ ಪರಿಸ್ಥಿತಿಯನ್ನು ಗಂಭೀರವಾಗಿ ನೋಡಿ, ತಾತ್ಕಾಲಿಕವಾಗಿ ಡಿಜಿಟಲ್ ಪಾವತಿ ನಿಲ್ಲಿಸಲು ಒತ್ತಾಯಿಸಿದ್ದಾರೆ.
ಇದೀಗ ಪೆಟ್ರೋಲ್ ಪಂಪ್‌ಗಳಲ್ಲಿ ನಗದು ಪಾವತಿಯೇ ಏಕೈಕ ಮಾರ್ಗವಾಗಿದ್ದು, ಸಾರ್ವಜನಿಕರು ಈ ಬದಲಾವಣೆಗೆ ಸಿದ್ಧರಾಗಬೇಕಿದೆ. ಸರಕಾರ ಮತ್ತು ಬ್ಯಾಂಕ್‌ಗಳು ಸೈಬರ್ ಭದ್ರತೆಯಲ್ಲಿ ಬಲವರ್ಧನೆ ಮಾಡುವ ತನಕ, ಈ ನಿರ್ಧಾರ ಮುಂದುವರಿಯಬಹುದೆಂಬ ನಿರೀಕ್ಷೆ ಇದೆ.
ಈ ನಿರ್ಧಾರದ ಬಗ್ಗೆ ನಿಮ್ಮ ಅನಿಸಿಕೆ ಏನು..?
