ದೆಹಲಿಯಲ್ಲಿ ನಡೆದ ಭಾರತ ಹಾಗೂ ಅಫ್ಘಾನಿಸ್ತಾನ ನಡುವಿನ ಪಂದ್ಯ ವಿರಾಟ್ ಕೊಹ್ಲಿ ಹಾಗೂ ನವೀನ್-ಉಲ್-ಹಕ್ ನಡುವಿನ ಸ್ನೇಹದ ಬೆಸುಗೆಗೆ ಸಾಕ್ಷಿಯಾಯಿತು.
ಈ ಬಾರಿಯ ಐಪಿಎಲ್ ಟೂರ್ನಿಯಲ್ಲಿ ವಿರಾಟ್ ಕೊಹ್ಲಿ ಹಾಗೂ ನವೀನ್-ಉಲ್-ಹಕ್ ನಡುವೆ ದೊಡ್ಡಮಟ್ಟದ ಮನಸ್ತಾನ ಉಂಟಾಗಿತ್ತು. ಲಕ್ನೋದಲ್ಲಿ ನಡೆದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಹಾಗೂ ಲಕ್ನೋ ಸೂಪರ್ ಜೈಂಟ್ಸ್ ನಡುವಿನ ಪಂದ್ಯದ ವೇಳೆ ಈ ಇಬ್ಬರು ಆಟಗಾರರು ಮೈದಾನದಲ್ಲೇ ಕಿತ್ತಾಡಿಕೊಂಡಿದ್ದರು. ಪರಿಣಾಮ ಕೊಹ್ಲಿ ಅವರಿಗೆ ಪಂದ್ಯದ ಶೇ.100% ಹಾಗೂ ನವೀನ್-ಉಲ್-ಹಲ್ ಅವರಿಗೆ ಶೇ.50% ದಂಡ ವಿಧಿಸಲಾಗಿತ್ತು.
ಹೀಗಾಗಿ ಭಾರತ ಹಾಗೂ ಅಫ್ಘಾನಿಸ್ತಾನ ನಡುವಿನ ಪಂದ್ಯ ವಿರಾಟ್ ಕೊಹ್ಲಿ ಹಾಗೂ ನವೀನ್-ಉಲ್-ಹಕ್ ನಡುವಿನ ಮುಖಾಮುಖಿ ಸಾಕಷ್ಟು ಕುತೂಹಲ ಮೂಡಿಸಿತ್ತು. ಈ ನಡುವೆ ಅಫ್ಘಾನಿಸ್ತಾನ ತಂಡದ ಬ್ಯಾಟಿಂಗ್ ವೇಳೆ ನವೀನ್-ಉಲ್-ಹಕ್ ಬ್ಯಾಟಿಂಗ್ ಮಾಡಲು ಬಂದ ವೇಳೆ ದೆಹಲಿ ಮೈದಾನದಲ್ಲಿ ಜಮಾಯಿಸಿದ್ದ ಕೊಹ್ಲಿ ಅಭಿಮಾನಿಗಳು, “ಕೊಹ್ಲಿ… ಕೊಹ್ಲಿ…” ಎಂಬ ಘೋಷಣೆ ಕೂಗುವ ಮೂಲಕ ಅಫ್ಘಾನ್ ಆಟಗಾರನಿಗೆ ಟಾಂಗ್ ಕೊಡುವ ಪ್ರಯತ್ನ ಮಾಡಿದ್ದರು.
ಇನ್ನೂ ಭಾರತದ ಬ್ಯಾಟಿಂಗ್ ವೇಳೆ ವಿರಾಟ್ ಕೊಹ್ಲಿ ಕಣಕ್ಕಿಳಿದ ವೇಳೆಯೂ ಸಹ ಅಭಿಮಾನಿಗಳು ಕೊಹ್ಲಿ ಪರವಾಗಿ ಘೋಷಣೆ ಕೂಗುತ್ತಿದ್ದರು. ಈ ವೇಳೆ ಕಿಂಗ್ ಕೊಹ್ಲಿ ತಮ್ಮ ತವರಿನ ಅಭಿಮಾನಿಗಳಿಗೆ ಆ ರೀತಿ ಮಾಡದಂತೆ ಸೂಚಿಸಿದರು. ಇದಾದ ಕೆಲವೇ ಹೊತ್ತಿನಲ್ಲಿ ಬೌಲಿಂಗ್ ಮಾಡಲು ಬಂದ ವೇಳೆ ವಿರಾಟ್ ಕೊಹ್ಲಿ ಹಾಗೂ ನವೀನ್-ಉಲ್-ಹಕ್ ಅವರನ್ನ ಪರಸ್ಪರ ಅಪ್ಪಿಕೊಂಡು, ನಗೆಬೀರುವ ಮೂಲಕ ತಮ್ಮಿಬ್ಬರ ನಡುವಿನ ದ್ವೇಷಕ್ಕೆ ಅಂತ್ಯವಾಡಿದರು. ಈ ಇಬ್ಬರು ಆಟಗಾರರ ನಡುವಿನ ಸ್ನೇಹದ ಬೆಸುಗೆ ಕೇವಲ ದೆಹಲಿ ಅಂಗಳದಲ್ಲಿ ನೆರೆದಿದ್ದ ಕ್ರಿಕೆಟ್ ಅಭಿಮಾನಿಗಳಷ್ಟೇ ಅಲ್ಲದೇ ಕೋಟ್ಯಾಂತರ ಕ್ರಿಕೆಟ್ ಅಭಿಮಾನಿಗಳ ಮುಖದಲ್ಲಿ ಸಂತಸ ಮೂಡುವಂತೆ ಮಾಡಿತು.
IND v AFG, Team India, Virat Kohli, Naveen-Ul-Huq, World Cup, ODI Cricket
