ಅಫ್ಘಾನಿಸ್ತಾನದ ಕೈಯಲ್ಲಿ ಟೀಮ್ ಇಂಡಿಯಾದ ಭವಿಷ್ಯ, ನಮಿಬಿಯಾ ವಿರುದ್ಧ ಗೆದ್ದರೂ ಸೋಲಬೇಕು ನ್ಯೂಜಿಲೆಂಡ್..!
ಎರಡು ಹೀನಾಯ ಸೋಲುಗಳ ಬಳಿಕ ಎರಡು ಭರ್ಜರಿ ಜಯಗಳು ಟೀಮ್ ಇಂಡಿಯಾಕ್ಕೆ ಜೀವ ತುಂಬಿದೆ. ಆದರೆ ಐಸಿಸಿ ಟಿ20 ವಿಶ್ವಕಪ್ನಲ್ಲಿ ವಿರಾಟ್ ಬಳಗ ಸೆಮಿಫೈನಲ್ ಪ್ರವೇಶ ಪಡೆಯಬೇಕಾದರೆ ಬೇರೆ ತಂಡದ ಸಹಾಯ ಬೇಕಿದೆ. ಪಾಕಿಸ್ತಾನ ಮತ್ತು ನ್ಯೂಜಿಲೆಂಡ್ ವಿರುದ್ಧದ ಸೋಲು ಟೀಮ್ ಇಂಡಿಯಾವನ್ನು ಇನ್ನಿಲ್ಲದಂತೆ ಕಾಡುತ್ತಿದೆ. ಆದರೂ ಆಸೆ ಕೈ ಬಿಡದ ಟೀಮ್ ಇಂಡಿಯಾ ಈಗ ಅಫ್ಘಾನಿಸ್ತಾನದ ಗೆಲುವಿಗೆ ಪ್ರಾರ್ಥಿಸುತ್ತಿದೆ.
ಸೂಪರ್ 12 ಹಂತದ ಕೊನೆಯ ಪಂದ್ಯದಲ್ಲಿ ಟೀಮ್ ಇಂಡಿಯಾ ನಮಿಬಿಯಾ ತಂಡವನ್ನು ಎದುರಿಸಲಿದೆ. ನ್ಯೂಜಿಲೆಂಡ್ ಅಫ್ಘಾನ್ ತಂಡದ ಸವಾಲು ಎದುರಿಸಬೇಕಿದೆ. ಪಾಕಿಸ್ತಾನ ಮತ್ತು ಸ್ಕಾಟ್ಲೆಂಡ್ ನಡುವೆ ಇನ್ನೊಂದು ಪಂದ್ಯ ನಡೆಯಲಿದೆ. ಪಾಕಿಸ್ತಾನ ಈಗಾಗಲೇ 4 ಪಂದ್ಯಗಳನ್ನು ಗೆದ್ದು ಸೆಮಿಫೈನಲ್ ಪ್ರವೇಶಿಸಿದೆ.
ಆದರೆ ಗ್ರೂಪ್ 2ರಲ್ಲಿ ಸೆಮಿಫೈನಲ್ ಪ್ರವೇಶ ಪಡೆಯುವ ಇನ್ನೊಂದು ತಂಡದ ಬಗ್ಗೆ ಕುತೂಹಲವಿದೆ. ಸದ್ಯ ನ್ಯೂಜಿಲೆಂಡ್ 6 ಅಂಕಗಳನ್ನು ಪಡೆದು 2ನೇ ಸ್ಥಾನದಲ್ಲಿದೆ. ಅಫ್ಘಾನ್ ವಿರುದ್ಧದ ಪಂದ್ಯ ಗೆದ್ದರೆ 8 ಅಂಕಗಳೊಂದಿಗೆ 2ನೇ ತಂಡವಾಗಿ ಸೆಮೀಸ್ ಪ್ರವೇಶ ಪಡೆಯಲಿದೆ. ಆದರೆ ಅಫ್ಘಾನ್ ತಂಡದ ವಿರುದ್ದ ನ್ಯೂಜಿಲೆಂಡ್ ಸೋತು, ನಮಿಬಿಯಾ ವಿರುದ್ಧ ಟೀಮ್ ಇಂಡಿಯಾ ಗೆದ್ದರೆ ಮೂರೂ ತಂಡಗಳು 6 ಅಂಕ ಸಂಪಾದಿಸಲಿವೆ. ಆಗ ರನ್ ರೇಟ್ ಗಣನೆಗೆ ಬರಲಿದೆ. ಸದ್ಯ ಟೀಮ್ ಇಂಡಿಯಾ +1.619ರನ್ ಹೊಂದಿದ್ದರೆ, ಕಿವೀಸ್ +1.277 ಹಾಗೂ ಅಪ್ಘಾನಿಸ್ತಾನ +1.481 ರನ್ರೇಟ್ ಹೊಂದಿದೆ.
ಸದ್ಯ ಇರುವ ಕ್ಲೀಯರ್ ಲೆಕ್ಕಾಚಾರದ ಪ್ರಕಾರ ಅಫ್ಘಾನಿಸ್ತಾನದ ವಿರುದ್ಧ ನ್ಯೂಜಿಲೆಂಡ್ ಸೋಲಬೇಕು. ಆದರೆ ಅಫ್ಘಾನಿಸ್ತಾನ 50 ಅಥವಾ ಅದಕ್ಕಿಂತ ಹೆಚ್ಚಿನ ರನ್ಗಳ ಅಂತರದಲ್ಲಿ ಮಾತ್ರ ಗೆಲ್ಲಬಾರದು ಅನ್ನುವುದಷ್ಟೇ ಲೆಕ್ಕಾಚಾರದಲ್ಲಿದೆ. ಒಟ್ಟಿನಲ್ಲಿ ಟೀಮ್ ಇಂಡಿಯಾದ ಸೆಮಿಫೈನಲ್ ಭವಿಷ್ಯ ಅಫ್ಘಾನಿಸ್ತಾನದ ಕೈಯಲ್ಲಿ ಅಡಗಿದೆ ಅನ್ನುವುದು ಪಕ್ಕಾ..!
